U Mulandu ci Uno Ulupato Lwavulila Sana?

U mulandu ci uno ulupato lwavulila sana muno nsi? Pakuti tumanye umulandu uno ulupato lwavulila, tulinzile ukumanya vino ulupato lwaya, icikalenga ukuti antu yapata auze, na vino ulupato lukasalangana.

Uzye Ulupato I Cani?

Ulupato u kutwalilila ukwelenganya iviipe sana pa muntu umwi nanti pa yantu yamwi. Nupya ulupato lwacila na pa kutwalilila ukusokela sile umwi.

IVIKALENGA UKUTI ANTU YAPATA AUZE

Kwaya ivintu ivingi vikalenga ukuti antu yapata auze. Ilingi, antu yakapata auze pa mulandu na vino yaya asi pa mulandu na vino yakacita. Yamwi yakapata iumba ilya yantu yamwi pano yakaelenganya ukuti antu yayo yaya aipe, yakaloleka ukuti yaya nu unkalwe, nupya yatanga yasenuke. Yakalola ukuti antu yayo yatacindama, nu kuti aakaleta intazi. Antu yayo aapata auze, kufwile kwali yamwi ayacitiilepo unkalwe, ukuyafyenga, nanti ukuyacitila vimwi ivyalenzile ukuti yatandike ukuya nu lupato.

VINO ULUPATO LUKASALANGANA

Insita zimwi antu yakapata antu yauze yano yatatala yalolapo nanti ukulanda nayo. Wakwe, antu yamwi yakatandika ukwelenganya iviipe nanti visuma pa yantu yamwi pa mulandu na vino ya lupwa yao nanti ya cuza yao yakaelenganya pa yantu yayo. Fwandi, ndi cakuti umwi umu lupwa nanti umu muzi watandika ukupata antu yamwi, cingalenga ukuti antu yauze yatandike ukupata antu yayo.

Nga twamanya vino ulupato lukasalangana zuwa, cingalenga tumanye umulandu uno antu aingi yapatila yauze. Nomba kwaya umulandu na uze uwalenga ukuti mu nsi muye sana ulupato. Pakuti tumanye umulandu uwo, tulinzile ukumanya vino ulupato lwatandike. Tungasambilila vivyo muli Baibo.

BAIBO YALONDOLOLA VINO ULUPATO LWATANDIKE

Tumanyililo utukuzinguluka tukulangilila vino ulupato lukasalangana. 1. Vyeo ivya ufi kufuma umu maumba yano antu yakalanzyanyizizyamo, pa intaneti, na pa milabasa nu mu manyunzipepa. 2. Kukanamanya ningo intambi, antu aa mu mitundu yuze, nanti antu aa mu mipepele yuze. 3. Yakatiina ukuti antu yauze yangalenga ivintu visenuke, ukuti antu yauze yangayapoka vino yakwata, ivintu ivya kwelenganya sile. 4. Lupato lukalenga, antu ukuya nu lufyengo, kapatulula, nanti unkalwe.

ANTU ASI YANO YATANDIKILEPO UKUYA NU LUPATO. Lupato lwatandike lino malaika umwi ukwi yulu, uwizile amanyikwa ukuti Satana ciwa wapondokiile Leza. Ciwa iinkomi ukufuma sile lino wapondwike, vino “u wa ufi nupya ali isi uwa ufi,” watwalilila ukulenga ukuti antu yaya nu lupato nu unkalwe. (Yoani 8:44; 1 Yoani 3:11, 12) Nupya Baibo ikamulondolola ukuti waya nu lupato, icipyu, nu unkalwe.—Yobo 2:7; Kusokolola 12:9, 12, 17.

CANGUPALA SANA UKU YANTU AATAMALILIKA UKUYA NU LUPATO. Adamu umuntu wa kutandikilapo, wapondokiile Leza wakwe vino Satana wacisile. Na cii, calenga ukuti antu yonsi yapyane uluyembu nu kukanamalilika. (Loma 5:12) Kaini umwana wa kutandikilapo wakwe Adamu, wakomile Abeli umwinakwe pa mulandu nu lupato. (1 Yoani 3:12) Ica cumi ukuti aingi yacili yakalanga ukutemwa ni cikuuku. Lelo pa mulandu nu luyembu luno twapyana, antu aingi sana yaya ni miyele iikalenga ukuti kuye ulupato kuli kuti, ukaitemwe, ulunkumbwa ni cilumba.—2 Timoti 3:1-5.

CANGUPALA UKUYA NU LUPATO UKU YANTU YAUZE NGA TWAPATA KUNO YAFUMA, VINO YAKALOLEKA, NI VINTU VYUZE. Antu aa mu nsi ii yakalenga ukuti ulupato lwakulilako ukupitila umu kukanaya nu luse alino nu kuya ni miyele ni vicitwa vyuze iviipe. Pa mulandu wakuti “insi yonsi ikatungululwa nu mwipe,” kuli kuti Satana Ciwa, calenga ukuti antu yataikaanya, yaye nu lufyengo, musaalula, ukulacuzya auze, alino nu kulaonona ivintu ku mufulo sile.—1 Yoani 5:19.

Lelo, Baibo italanda sile pali cino calenga ukuti kuye ulupato. Yalanda na pali vino tungacita pakuti tutaya nu lupato.