Mwaomvya Ningo Miila

Umusambi Yakobo wakolinye Baibo kuli miila iikatwazwa ukulola vino twaya umukasi. (Yako. 1:​22-25) Uzye tungaomvya uli ningo Baibo iyaya wakwe miila?

Mwaikako mano lino mukubelenga. Ndi cakuti twailola muli miila lwilo lwilo, tutanga tulole ningo pano tulinzile ukuzifya. Mu nzila ili imwi kwene, ndi cakuti tukubelenga Baibo lwilo lwilo, tutanga tulole muno tukulondekwa ukusenuka. Nomba pakuti tulole muno tulinzile ukusenuka, tulinzile ukwikako mano lino tukubelenga Baibo.

Mwaika mano kuli vino mulinzile ukuombelapo, asi kuli vino yauze yalinzile ukuombelapo. Insita zimwi lino tukuilola muli miila, tungalolamo na yauze nupya tungatandika ukulola muno yalinzile ukuzifya. Mu nzila ili imwi kwene, tungabelenga Baibo nu kulalola ukuti yauze aliyo yalinzile ukuomvya ivyeo vino tukubelenga. Nomba ukucita vii kutanga kutwazwe ukuzifya muno tulinzile ukuzifya.

Mutaumilila sile pali vino mukwelenganya. Ndi cakuti tukuilola muli miila nu kwika sile mano kuli vino tutatemilwe, tungatoovoka. Tulinzile ukulasenuka lino tukubelenga Izwi lyakwe Leza ukupitila umu kukanaenekela ukucita ivintu ukucila pali vino Yeova akulonda ukuti tucite.—Yako. 3:17.