Kupalama Uku Ina na ya Nkazi Kwazipa Sana

1-2. I cintu ci icacindama kuli Yeova, nupya i vyani vino akalonda ukuti twacita?

VINO tukalola antu yauze vyacindama sana kuli Yeova. Yesu wasambilizye ukuti tulinzile ukutemwa anji wakwe vino twaitemwa. (Mate. 22:​37-39) Pa yantu yano tulinzile ukulanga icikuuku paya na yayo aasiombela Yeova. Nga tukucita vivyo, ale tukukolanya Yeova Leza aakaleka “akasanya ukuwala pa yantu aipe na asuma nu kuleka imvula ukutoonya pa yantu alungame na aatalungama.”—Mate. 5:45.

² Nanti cakuti Yeova watemwa antu yonsi, watemwisya sana yayo aakamuvwila. (Yoa. 14:21) Akalonda twamukolanya. Acino akatunenela ukuti ‘twatemwana sana wa ina’ nu kulanga ukuti twika sana amano ku ina itu na ya nkazi. (1 Pet. 4:8; Loma 12:10) Ukutemwa kuu kwakolana na kuno tukalanga kuli ya lupwa lwitu yano twatemwa sana nanti kuli cuza witu umupalamisye.

3. I vyani vino tulinzile ukwiusya pa kuya nu kutemwa?

³ Ukutemwa kwaya wa cilimwa icikalondekwa ukusakamalwa pakuti cikule ningo. Umutumwa Paulo wanenyile Aina Klistu ukuti: “Twalililini ukutemwana wa ina.” (Aeb. 13:1) Yeova akalonda twatwalilila ukulanga ukutemwa kuli yauze. Cipande cii cimalanda pa mulandu uno tulinzile ukutwalilila ukupalama uku ina na ya nkazi na vino tungacita pakuti tutwalilile ukucita vivyo.

MULANDU UNO TULINZILE UKUPALAMA SANA UKU INA NA YA NKAZI

4. Wakwe vino Masamu 133:1 ikalanda, uzye tungalanga uli ukuti ukulemana kuno twalemana na ina na ya nkazi kwacindama? (Loliniko ni vikope.)

⁴ Belengini Masamu 133:1. Tungazumilizyako uku mazwi yano kalemba wa masamu walemvile ukuti ukuya na ucuza na antu atemwa Yeova ‘kwazipa’ nupya ‘kukazanzya.’ Wakwe vivikwene vino umuntu umwi angafilwa ukulola usuma wa cimuti cino akalola cila wanda, ali vino naswe tungafilwa ukulola vino ukulemana kuno twalemana na ina na ya nkazi kwacindama. Tukalolana na ina na ya nkazi imiku iingi umu mulungu. Uzye tungacita uli pakuti twalanga ukuti tukayataizya? Ukutemwa kuno twatemwa aina itu na ya nkazi kulakulilako ndi cakuti tukwelenganya pali vino yacindama umu cilongano na kuli sweswe.

5. I vyani vino yamwi yangiluka ndi cakuti yalola vino twatemwana?

⁵ Yamwi aakalongana naswe pa muku wa kutandikilapo, yakauvwa ningo sana ndi cakuti yalola vino twatemwana. Ukulola vino twatemwana kukalenga yasininkizye ukuti iyazana icumi. Yesu watiile: “Nga mukutemwana, alino yonsi yalamanya ukuti mwemwe yasambi yane.” (Yoa. 13:35) Elenganyini pali vino vyacitikile Chaithra, kasukulu wa pa yunivesiti uwasambililanga Baibo na Ya Nte Yakwe Yeova. Yamwamile ukuti akazanwe uku ukongano wa citungu. Lino wazanyilweko pa wanda wa kutandikilapo, wanenyile amusambilizyanga Baibo ati: “Avyazi yane yatatala yankukulapo. Lelo pa ukongano, antu 52 yankukwile pa wanda sile onga. Nayuvwile ukuti Yeova wantemwa ukupitila umu yantu yaa. Nkulondesya ukuya umu lupwa luu.” Chaithra watwalilile ukulunduluka nupya wizile abatiziwa umu 2024. Ndi cakuti apya yalola imiyele itu isuma na vino twatemwana, yangatandika ukulondesya ukulaombela Yeova.—Mate. 5:16.

6. Uzye ukupalama sana uku ina na ya nkazi kungatucingilila uli?

⁶ Ukupalama sana uku ina na ya nkazi kungalenga tuye acingililwe. Paulo wakomelizye Aina Klistu yauze ukuti: “Mwakomelezyanya cila wanda . . . pakuti pali mwemwe pataya nanti a wenga uwakukoma umwenzo pa mulandu wa kubepwa ku maka ya luyembu.” (Aeb. 3:13) Ndi cakuti cikututalila ukutwalilila ukucita ivilungame, Yeova angaomvya kapepa munji uwatamanya uwavya uno tukweti pakuti atwazwe. (Masa. 73:​2, 17, 23) Ukwazwa kwa musango uwo kungatukomelezya.

7. Uzye ukulemana nu kutemwana vyalemana uli? (Kolose 3:​13, 14)

⁷ Twaya umwi iumba lya yantu akaombesya ukulanga ukutemwa kuli cila muntu, nupya tukaipakizya mapaalo aingi sana. (1 Yoa. 4:11) Wakwe, ukutemwa kukalenga ukuti ‘twatwalilila ukuteekelelana,’ nupya kukalenga tuye alemane na ina na ya nkazi. (Belengini Kolose 3:​13, 14; Efes. 4:​2-6) Fwandi lino tuli pa kulongana, tukaipakizya umutende uno kusi antu ali yonsi angaukwata pano nsi.

MWACINDIKANA

8. Uzye Yeova akatwazwa uli ukuya alemane na ina itu na ya nkazi?

⁸ Ukulemana kuno twalemana na ina na ya nkazi, kukazungusya. A Yeova uwalenga ukuti tuye alemane nanti cakuti tutamalilika. (1 Kol. 12:25) Baibo ikalanda ukuti ‘Leza watusambilizya ukuti tulinzile ukutemwana.’ (1 Tesa. 4:9) Cii cikupiliula ukuti Yeova akaomvya Baibo pa kutusambilizya vino tulinzile ukucita pakuti twapalama sana uku ina itu na ya nkazi. ‘Tungasambiliziwa na Leza’ ndi cakuti tukwelenganya pali vino akatusambilizya alino nu kuviomvya. (Aeb. 4:12; Yako. 1:25) Nupya vikwene ali vino Ya Nte Yakwe Yeova yakaezya na maka ukucita.

9. I vyani vino tukasambilila uku mazwi aaya pali Loma 12:​9-13, pali vino tulinzile ukucindikana?

⁹ Uzye Izwi lyakwe Leza likatwazwa uli ukupalama uku ina na ya nkazi? Elenganyini pali vino Paulo walanzile api lyasi lii, ivyalembwa pali Loma 12:​9-13. (Belengini.) Lolini amazwi yaa acindame yano walanzile aakuti, “mwatandikilapo ukucindika auzo.” Uzye mazwi yaa yakapiliula cani? Tulinzile ukutandikilapo ukulanga ‘ukutemwa’ ukupitila umu kwelela yauze, ukupokelela aenyi, ukuya na ukapekape alino na vyuze. (Efes. 4:32) Fwandi tutalinzile ukulolela ukuti umwina nanti nkazi aliwe atandikilepo ukupalama kuli sweswe. Lelo tulinzile ‘ukutandikilapo’ ukucita vivyo. Yesu walanzile ati: “Mu kupeela mwaya insansa izingi ukucila izyaya umu kupokelela.—Mili. 20:35.

10. Tungacita uli pakuti twaombesya “ukucindikana”? (Loliniko ni cikope.)

¹⁰ Pa cisila ca kulanda pali vino tulinzile ukutandikilapo ukucindikana, Paulo watukomelezya ukuti “mwaombesya, mutaya akasu.” Umuntu aakaombesya wacincila. Nga wapeelwa umulimo, akaombelapo zuwa. Ilembo lyakwe Mapinda 3:​27, 28 likatukomelezya ukuti: “Utakana ukucita ivisuma kuli wino wakulenga, uwamupeela uwila ndi cakuti watukwata.” Fwandi ndi cakuti twalola umwi akulondekwa uwazwilizyo, tulinzile ukumwazwa. Tutalinzile ukulolela nanti ukwelenganya ukuti yauze yamamwazwa.—1 Yoa. 3:​17, 18.

11. I vyani ivingatwazwa ukupalama sana kuli yauze?

¹¹ Inzila na yuze ino tungalangilamo ukuti twacindika yauze u kuyelela zuwa nga yatuluvyanya. Pali Efeso 4:26 pakalanda ukuti: “Mutaaleka ilanzi iliwa ala mucili asoke.” U mulandu ci? Cikomo 27 cikalanda ukuti ukucita vivyo kungalenga tupeele “Ciwa apa kwikala.” Pa miku iingi Yeova akatunena ukupitila umwi Izwi lyakwe ukuti twaelelana. Kolose 3:13 ikatukomelezya ukuti “twalililini . . . kuitemelwa ukwelelana.” Ukwelela yauze ndi cakuti yatuluvyanya i nzila isuma iyakupalamilamo kuli aliyo. Ndi cakuti tukucita vivyo ala tukuleka ‘umupasi wa muzilo walenga ukuti tuye alemane.’ (Efes. 4:3) Fwandi tungati ukwelela kukalenga tuye alemane nupya kukaleta umutende.

12. Uzye Yeova akatwazwa uli ukwelela yauze?

¹² Ukuya kwene, cingatutalila ukwelela uwatatusosya. Lelo umupasi wakwe Leza ungatwazwa ukwelela yauze. Baibo ikatukomelezya ukuti ‘twatemwana sana’ alino nu ‘kulaombesya,’ nupya ikatukomelezya nu kuti ‘twaleka umupasi watulenga ukuya acincile.’ Umuntu mucincile akaombesya nupya akalondesya ukucita icisuma pa mulandu wakuti umupasi wa muzilo ukumwazwa. Cii cikupililula ukuti umupasi wa muzilo ungalenga ukuti tuye acincile nu kulalondesya ukwelela anji. Fwandi ali mulandu uno tukalengela Yeova ukuti aliwe aatwazwa.—Luka 11:13.

“PATALINZILE UKUYA MALEKANO PALI MWEMWE”

13. I vyani ivingaleta malekano pali sweswe?

¹³ Umu cilongano mwaya “antu amisango yonsi” aakulila ukupusanepusane. (1 Tim. 2:​3, 4) Ndi cakuti tutacenjile, ivintu vii vingalenga twapusana sana sana muli vino cila muntu alinzile ukuisoolwelapo, wakwe ivyakuzwala nu kuiyemvya, milwazizye, nanti ivya kuizanzya. (Loma 14:4; 1 Kol. 1:10) Pa mulandu wakuti Leza watusambilizya ivya kutemwana, tutalinzile ukuleka ivintu vino tukasoololapo ukucita viye ali vintu ivicindame ukucila vino yauze yakasoololapo.—Filipi 2:3.

14. I vyani vino tulinzile ukwezya na amaka ukucita, nupya u mulandu ci?

¹⁴ Tungalenga ukuti mu cilongano mutaya amalekano ndi cakuti tukukomelezya yauze. (1 Tesa. 5:11) Mu manda anono apita, antu aingi atiile ukulongana pa nsita itali alino na afumiziwe mu cilongano yawela. Tulinzile ukuyapokelela ni nsansa. (2 Kol. 2:8) Elenganyini pali vino vyacitikiile nkazi umwi uwatandike ukulongana nupya pa cisila ca myaka 10. Watiile, “Yonsi kwene yamwentulanga pa kundamuka nupya yandamukanga mu minwe.” (Mili. 3:19) Uzye vino yamulangizye icikuuku vyamwazwile uli? Watiile, “Vyalenzile nauvwa ukuti ikasa lyakwe Yeova likuntungulula pakuti inje ni nsansa nupya.” Ndi cakuti tukukomelezya yauze, Klistu angatuomvya ukwazwa yayo ‘aakacula na yayo asenda ivisendo ivifine.’—Mate. 11:​28, 29.

15. I vyani na vyuze ivingatwazwa ukuya alemane? (Loliniko ni cikope.)

¹⁵ Milandile itu nayo ingalenga tuye alemane. Pali Yobo 12:11 pakalanda ukuti: “Uzye ikutwi lisiezya mazwi wakwe vino ululimi lukauvwa ndi cakuti ivyakulya ivilyompa nanti foo?” Wakwe viivi kwene vino keleka musuma akatala aezya ivyakulya ndi cakuti i vilyompe lino atatala wapeela yauze ukuti yalye, avino naswe kwene tulinzile ukwelenganya pali vino tukulonda ukulanda lino tutatala twalanda kuli yauze. (Masa. 141:3) Uyo witu ulinzile ukuya u wa kukomelezya nu kuteekezya ukupitila muli vino tukalanda pakuti ‘vingazwa akuvwa.’—Efes. 4:29.

16. Aaweni sana sana alinzile ukwika amano uku milandile isuma?

¹⁶ Imilandile yakwe ya iya na avyazi ilinzile ukuya iya kukomelezya. (Kolo. 3:​19, 21; Tito 2:4) Lyene na ya Eluda nayo kwene imilandile yao ilinzile ukuya iya kukomelezya nupya iya kuteekezya imfwele zyakwe Yeova. (Eza. 32:​1, 2; Gala. 6:1) Baibo ikatwiusyako ukuti: “Kulanda amazwi asuma kwazipa.”—Mapi. 15:23.

KUTEMWA “MU MILIMO NU MU CUMI”

17. Uzye tungasininkizya uli ukuti ukutemwa kuno twatemwa aina na ya nkazi u kwa cumi?

¹⁷ Mutumwa Yoani watukomelizye ukuti ‘tulinzile ukulanga ukutemwa asi sile umu mazwi nanti uku lulimi lelo mu milimo nu mu cumi.’ (1 Yoa. 3:18) Tukulonda twatemwa aina itu na ya nkazi nu mwenzo witu onsi. Tungakwanisya uli ukucita vivyo? Ndi cakuti tukukwata insita ya kuya pamwi na ina na ya nkazi tulapalama sana kuli aliyo nupya ucuza witu nayo ulakomelako. Fwandi twalondako inzila ya kuya pamwi na ina na ya nkazi lino tuli pa kulongana na lino tuli mu mulimo wa kusimikila. Mwayatandalila. Ndi icakuti tukucita vivyo tulalangilila ukuti ‘Leza watusambilizya ukuti tulinzile ukutemwana.’ (1 Tesa. 4:9) Nupya tulasininkizya mazwi yaa aakuti “lolini vino cazipa nupya vino cikazanzya aina ukwikala pamwi alemane.”—Masa. 133:1.