U Mulandu ci Uno Ivikanza Vya Miteekele Vikapatukanyizizya Antu?—Uzye Baibo Yalandapo Uli?

Vikanza vya miteekele vikapatukanya antu umu mpanga izingi. Kulingana na vino kaungwe kamwi (Pew Research Center) kalondelizye umu 2022, kazanyile ukuti “kucila pali hafu uwa yantu aikolo aakaikala umu mpanga 19 yasiuvwana na antu aasitungilila kaugwe ka miteekele kano yatayamo.”

Uzye mwalola vino ivikanza vya miteekele vyatwalilila ukupatukanya antu kuno mukaikalila? U mulandu ci uno cayela vivyo? Uzye kwaya icingamala intazi ii? Lolini vino Baibo yalandapo.

Miyeele iikalenga antu kupatukana

Baibo yasoowile ukuti umu manda itu, ino ikaama nu kuti “manda akusyalikizya,” antu aingi yalaya ni miyeele ilalenga catala sana ukuya alemane.

• “Umu manda akusyalikizya mulaya insita izitale sana. Pano antu yalaitemwa, . . . aasizumilizyanya na auze.”— 2 Timoti 3:1-3.

Nanti cakuti antu aingi yakaombesya pakuti mauteeko yatungulula ningo, mauteeko yakavilwa ukucita vivyo. Antu aakaelenganya ivipusaneko na vino uteeko ukulonda ukucita, cikayatalila ukuombela pamwi na yauze pakuti yamale intazi. Ivikacitika vikalangilila ukuti vino Baibo yalanzile i vya cumi.

• “Antu yamwi a maka yakateeka auze mu unkalwe.”—Kasambilizya 8:9.

Lelo Baibo ikatunena icingamala intazi ii, kuli kuti uteeko uno kateeka wa uko wakwata maka akumala intazi izikalenga antu ukucula.

Intunguluzi ifikepo nupya iika mano uku yantu

Baibo yalanda pa ntunguluzi iiyele: Yesu Klistu. Yesu wakwata amaka, nupya akalondesya ukuleta umutende nu kulenga antu ukulemana.

• “Umu manda yakwe, antu aololoke yalavula, nupya kulaya umutende.”—Masamu 72:7.

• ‘Antu yonsi amu mitundu yalamuombela!’—Masamu 72:11.

Yesu walinga ukuya intunguluzi pano akasakamala nupya akalonda ukwazwa antu, sana sana yano yakacuzya.

• “Ali wino amapokololanga antu aulilwa akupunda iyati, tutuulwe! Ukwika penepo na alanda, atakwata akuyasunga. Aluvwila uluse aalanda na apiina, nupya alapususya apiina. Alayapokolola kuli yayo akayacuzya nu ku unkalwe.”—Masamu 72:12-14.

Sambililini na vyuze pa Wene Wakwe Leza, uteeko uwa kwi yulu uno Yesu ali ntunguluzi. Lolini vino Uwene uu ungamwazwa na vino mungautungilila.

• Tambini vidyo iyakut Uzye Uwene Wakwe Leza I Cani?

• Belengini icipande cakuti “Uwene Wakwe Leza Uteeko Uutaaya na Mafisakanwa.”