Ukusenula Ukongano wa Citungu Uwa mu 2020 Wakuti: Mwaya nu Luzango Lyonsi!

Umu Julai nu mu Ogasiti, pa muku wa kutandikilapo aina na yankazi yalatamba ukongano wa citungu uliumwi nupya pa nsita iliimwi. Pakuti cintu cii cicitike, ukongano walondekwanga ukukopelwa limwi umundimi ukucila pali 500. Cingasenda umwaka nanti ukucilapo pa kupekanya alino nu kukopa malyasi na ma vidyo. Nomba pa mulandu nu ulwale wakwe COVID-19, ya kasenula yalondekwanga ukusenula malyasi alino na mavidyo akuomvya pa Ukongano wa Citungu wakuti Mwaya nu Luzango Lyonsi umu myezi sile 4.

Aakaangalila Mulimo wa Kusenula alino na aakaangalila Mulimo wa Vyakukalakala aaku Maofesi Yakalamba mu Nsi Yonsi yakwe ya Nte Yakwe Yeova yazwilizye sana pakuti umulimo uu ukalamba sana uombwe. Aakaangalila Mulimo wa Kusenula ilwike ukuti ya kasenula aingi yalondekwanga iviombelo ivingi wakwe ya maikulofoni asuma sana pakuti yaombe ningo umulimo uu. Aakaangalila Mulimo wa Vyakukalakala yapekinye ukuti yakale ma maikulofoni 1,000 nu kuyatuma umu ncende mupipi na 200.

Pakuti yataomvya impiya izingi sana, yakazile ma maikulofoni aingi nu kuyatuma uku ncende yonga alino iyatumila ya kasenula aali umu ncende izipusanepusane. Pa mulandu wakuti twakazile ma maikulofoni aingi pa muku onga, calenzile ukuti twakala maikulofoni wenga pa mpiya Madola 170, kumwi nu kutuma—cii calenzile ukuti tutaomvya impiya izingi.

Aakaangalila Mulimo wa Vyakukalakala yali nu kukala alino nu kutuma vino yakala mu Epuleo nu mu Mei 2020—pa nsita ino antu aingi akaomba ivya uculuzi yataombanga wakwe vino yakaomba lyonsi pa mulandu wa ulwale wakwe COVID-19. Nanti cali vivyo, ku kusila kwakwe Mei, aingi aaku maofesi yakwe ya kasenula, maofesi ya misambo, ni ncende zyuze muno yakaombela mulimo wa kusenula yapokelile iviombelo ivyalondekwanga.

Ya Jay Swinney aakaangalila Mulimo wa Vyakukalakala mu nsi yonsi yalanzile ukuti: “Aamu madipatimenti ya pa Betele yalanzyanyanga ningo sana na antu apusanepusane ayakazyanga iviombelo.” Yalanzile nu kuti: “Twakwanisye ukuomba zuwa umulimo uu nu kuomvya ningo imisangulo pakuti twazwilizye aina na yankazi pa mulandu wakuti umupasi wakwe Yeova watwavwilizye.”

Ya Nicholas Ahladis, aakaombela muli Dipatimenti Iikaangalila Mulimo wa Kusenula, yatiile: “Ya kasenula aombelanga ku mang’anda apa nsita iya yakomeleziwe sana lino yapokeliile iviombelo vii. Nanti icakuti yatayanga capamwi na auze, yaombiile pamwi nu kusenula malyasi, ivyangalo alino ni nyimbo umu ndimi kucila pali 500.”

Umulimo uu aonga pa milimo iingi iyaomvilwe pakuti tupangile aina na yankazi Ukongano wa Citungu uwa mu 2020 uwakuti Mwaya nu Luzango Lyonsi! Imisangulo inu ino mukasangwilako ukuomvya donate.jw.org. alino ni nzila zyuze yalenga ukuti kuye ukukala iviombelo vii.