Pa Mulungu, Sepetemba 14
Mumanye vino icumi casalala, ukutalimpa, ukusanzama, nu kuzika.—Efes. 3:18.
Ndi cakuti mukulonda ukukala ing’anda, limwi mungika sana mano uku ng’anda iyo lino mutatala mwakala.Vikwene ali vino tungacita lino tukubelenga nu kusambilila Baibo. Ndi cakuti mukubelengamo zuwa zuwa, mungasambilila sile “visambilizyo vya kutandikilako ivya mazwi yakwe Leza.” (Aeb. 5:12) Lelo wakwe vino mungacita pa kukala ing’anda, mulinzile ukwingila “umukasi” pakuti muvwikisye ivyaya muli Baibo. Inzila isuma iya kusambililamo Baibo u kulola vino ivyeo ivyayamo vikauvwana. Mwaombesya ukumanya vino mwazumilamo nu mulandu uno mwazumilila ivyaya muli Baibo. Pakuti tuvwikisye ningo ivyaya umwi Izwi Lyakwe Leza, tulinzile ukuisambilizyapo sana. Umutumwa Paulo wakomeliizye Aina Klistu ukuti yalinzile ukulaisambilizya sana Izwi Lyakwe Leza pakuti yamanye “vino icumi casalala, ukutalimpa, ukusanzama, nu kuzika.” Nga yacita vivyo yali nu kuzyansya nu kulimba imisisi umu utailo. (Efes. 3:14-19) Naswe kwene ali vino tulinzile ukucita. w23.10 18 ¶1-3
Pa Mande, Sepetemba 15
Inane mwakolanya ukuzizimizya nu kuteeka umwenzo kwakwe ya kasesema aalandiile umwi zina lyakwe Yeova.—Yako. 5:10.
Muli Baibo mwaya malyasi na yauze aingi aakalanda pa yantu ateekile. Uzye citanga ciye ningo ukuisambilizya pa yantu yaa? Wakwe, nanti cakuti Devedi yamupasile ukuya umwene ala acili umwance, walinzile ukuloleela pa myaka ingi pakuti aize aye umwene. Simyoni na Ana yapepanga Yeova na ucisinka lino yaloleelanga Mesiya uwalavilwe. (Luka 2:25, 36-38) Lino mukuisambilizya pa malyasi yaa, mwalonda amasuko uku mauzyo alondelelapo: I cani icazwile umuntu wii ukuya umutekeele? I visuma ci ivyacitike pa mulandu na vino wali umuteekele? Uzye ningamukolanya uli? Mungasambiliilako nu ku yantu ataali atekeele. (1 Sam. 13:8-14) Mungayuzya muti: ‘I vyani ivyalenzile ukuti yataya ateekele? Iintazi cii zino yakweti pa mulandu nu kukanaya ateekele?’ w23.08 25 ¶15
Pali Ciili, Sepetemba 16
Twataila nu kumanya ukuti wewe wa Muzilo nupya watumwa na Leza. —Yoa. 6:69.
Mutumwa Petulo wali na ucisinka; atalesile icili consi cimulenge ukuta ukulondela Yesu. Petulo walangilile ukuti wali na ucisinka pa nsita imwi lino Yesu walanzile vimwi vino asambi yatuvwikisye. (Yoa. 6:68)Ukwaula ukuti yuvwikisye vino Yesu walandangapo, aingi yatile ukumulondela. Lelo Petulo wene atatiile. Wamanyile ukuti Yesu sile u wakweti “mazwi ya umi wa pe.” Yesu wamanyile ukuti Petulo na atumwa yauze yali nu kumusya. Nanti ciye vivyo, Yesu wamanyile ukuti Petulo wali nu kuwela nu kwatwalilila ukuya uwa cisinka. (Luka 22:31, 32) Yesu wamanyile ukuti “umwenzo wene ukulonda nomba umwili iutonta.” (Mako 14:38) Fwandi na pa cisila lino Petulo wakanyile Yesu, Yesu wene atakanyile Petulo. Pa cisila cakutuutululwa, Yesu waile alolekela kuli Petulo ala Petulo ali wenga. (Mako 16:7; Luka 24:34; 1 Kol. 15:5) Elenganyini pali vino Petulo wakomeleziwe nanti cakuti watoovwike pa mulandu na vino wacisile. w23.09 22 ¶9-10