Ezila
3 Lino umwezi uwalenga 7 wafisile ala Aina Izlaeli yali umu misumba yao, yakolongine umu Yelusalemu pakuti yaombele pamwi. 2 Yesyua mwana Yeozadaki na ya simapepo yauze na Zelubabeli mwana Syeatieli na ina yakwe yakuuliile Leza wa Ina Izlaeli ulambo, pakuti yapeelelapo malambo ya koca wakwe vino calembwa umu masunde yakwe Mose umuntu wakwe Leza wa cumi.
3 Yakuuliile ulambo paapa kwene apayelile uwa mpiti nanti cakuti yatiinanga antu amu mpanga izyayazingulwike, nupya yatandike ukupeelelapo malambo ya koca kuli Yeova, malambo ya koca aa katondo na aa manguzi. 4 Lyene yapanzile Umutebeto wa Nsakwe ukulingana na vino calembwa, nupya cila wanda yapeelanga impendwa ya malambo ya koca ukulingana na ino yalinzile ukulapeela cila wanda. 5 Pa cisila, yatwalilile ukupeela malambo ya koca yano yapeelanga lyonsi, malambo yano yapeelanga pa kuzevya umwezi upya, malambo yano yapeelanga pa mitebeto ya muzilo ino yazevyanga kuli Yeova, alino na malambo ya kuitemelwa yano yonsi aitemelwanga yapeelanga kuli Yeova. 6 Pa wanda wa kutandikilako umu mwezi uwalenga 7, yatandike ukupeela malambo ya koca kuli Yeova nanti cakuti alanga umufula wi tempele lyakwe Yeova utatala wapangwa.
7 Yapeezile ya kaputula ya mawe impiya alino na yano yamanyile ivya kupangapanga, yapeezile na Ina Sidoni na Ina Tuli ivyakulya, ivyakumwa na mafuta pakuti yayaletele imbao zya mikedali ukupita pali yemba ukufuma uku Lebanoni ukutwala uku Yopa, wakwe vino Umwene Sailasi uwa ku Pesya wazumilizye.
8 Mu mwaka wakwe ciili pa cisila cakuti yafika uku Yelusalemu uku ng’anda yakwe Leza wa cumi, umu mwezi wakwe ciili, Zelubabeli mwana Syeatieli, Yesyua mwana Yeozadaki, na ina yao yonsi, kuli kuti ya simapepo na Ina Levi na yonsi aile uku Yelusalemu ukufuma umu uzya yatandike ukuomba umulimo; yasonsile Aina Levi aali ni myaka 20 nu kuya papela kuti yaangalila umulimo wa kukuula ing’anda yakwe Yeova. 9 Yesyua, anakwe na ina yakwe, Kadimiyeli na anakwe na ya mwana Yuda yaombiile pamwi ukwangalila aombanga umulimo wa kukuula ing’anda yakwe Leza wa cumi, kumwi na ya mwana Henedadi na ana yao na ina yao, kuli kuti Aina Levi.
10 Lino ya kakuula yapanzile umufula wi tempele lyakwe Yeova, ya simapepo yazwite ivyakuzwala vya usimapepo, yaali na mapenga nupya Aina Levi, kuli kuti ya mwana Asafu nayo yaali ni viwaya,* iimilile nu kutandika ukulumbanya Yeova wakwe vino Devedi Umwene wa Ina Izlaeli walanzile. 11 Yatandike ukwimba ala yakutolelezyanya, yalumbanyanga nu kutaizya Yeova, ala yakuti, “Leza u musuma, ukutemwa kwakwe ukwa cumi kuno wakwatila Aina Izlaeli u kwa manda pe.” Lyene antu yonsi iimvile na mazwi ya papela nu kulumbanya Yeova pano umufula wa ng’anda yakwe Yeova wapanzilwe. 12 Ya simapepo aingi, Aina Levi, intunguluzi zya ndupwa, kuli kuti aikolo aaweni itempele lya mpiti yalizile sana lino yaweni umufula wa ng’anda wapangwa, lelo aingi yapunzile sana ni nsansa. 13 Fwandi catalile antu ukupusanya ciunda ca nsansa ni ciunda ca kulila, pano antu yapundanga sana icakuti ciunda cafikanga ukutali.