1 Samweli
13 Saulo wali ni myaka . . .* lino watandike ukuteeka nupya wateesile imyaka iili umu Izlaeli. 2 Saulo wasoolwile aonsi 3,000 ukufuma pa Ina Izlaeli; aonsi 2,000 pali yayo, yaali na Saulo uku Mikimasyi nu mu ncende ya myamba iya Betele nupya aonsi 1,000 yaali na Yonatani mu Gibeya mu mpanga yakwe Benjamini. Antu asyala Saulo wayanenyile ukuswilila uku matenti yao. 3 Lyene Yonatani wacimvizye iumba lya yasilika ilya Ina Filisti ilyali umu Geba, na Ina Filisti yuvwile. Nupya Saulo wanenyile antu kuti yalizye ipenga umu mpanga yonsi, ala yakuti: “Lekini Aebele yuvwe!” 4 Aina Izlaeli yonsi yuvwile amazwi yakuti: “Saulo watacimvya iumba lya yasilika ilya Ina Filisti, nupya Aina Filisti iyapata sana Aina Izlaeli.” Fwandi yanenyile antu ukuti yalondele Saulo uku Giligali.
5 Aina Filisti nayo yakolongine pakuti yalwe na Ina Izlaeli, yaali na maceleta ya nkondo 30,000 na aonsi aakwezile pa mfwalasi yaali 6,000 alino na asilika avuzile wa mucanga wa mu mbali yakwe yemba nupya yaile iyapangila inkambi umu Mikimasyi ku ufumondaka uwa Beti-aveni. 6 Nupya Aina Izlaeli yaweni ukuti yaya umu ntazi pano yuvwile sana intete, fwandi antu yatandike ukufisama umu macele, mu viwina, mu vimawe, mu miputule ya pansi, nu mu viwina ivya kusungilamo manzi. 7 Aebele yamwi yalamvile nu Luzi Lwa Yodani iyaya uku mpanga iya Ina Gadi ni ya Ina Gilyadi. Lelo Saulo wene wali umu Giligali nupya antu yonsi amulondelanga yaali ni ntete. 8 Saulo watwalilile ukuloleela pa manda 7 ukufika pa nsita ino Samweli walanzile, nomba Samweli ataafisile uku Giligali pa nsita iiyo nupya antu yatandike ukusalangana iyasya Saulo. 9 Lyene Saulo walanzile ati: “Letini ilambo lya koca na malambo ya mutende.” Nupya wapeezile ilambo lya koca.
10 Nomba lino wamazile sile ukupeela ilambo lya koca, Samweli wafisile. Nupya Saulo waile umu kumukomenkanya nu kumupaala. 11 Lyene Samweli wamuzizye ati: “I cani cino wacita?” Saulo waswike ati: “Inalola ukuti antu yatandika ukunsya nupya utali wiza pa nsita ino ululinzile ukwizilapo, na Ina Filisti iyatandika ukukolongana umu Mikimasyi. 12 Fwandi inelenganya ukuti, ‘Aina Filisti yamaiza yanzanze umu Giligali nupya ntalenzile uwazwilizyo kuli Yeova.’ Acino inalola ukuti ndinzile sile ukupeela ilambo lya koca.”
13 Lyene Samweli wanenyile Saulo ati: “Wacita ica uwelewele. Utuvwilile isunde lino Yeova Leza wako wakupeezile. Uuvwila, Yeova ngawalenzile uwene wako ukutwalilila manda pe umu Izlaeli. 14 Nomba lyene uwene wako utalatwalilila. Yeova alasoolola umuntu wino umwenzo wakwe watemwa, nupya Yeova alamupeela umulimo wa kutungulula antu yakwe pano utuvwilile vino Yeova wakunenyile.”
15 Lyene Samweli wafumile uku Giligali nu kuya uku mpanga ya Gibeya iya Ina Benjamini, nupya Saulo wapenzile antu; asyazile nawe yaali umupiipi na 600. 16 Saulo nu mwanakwe Yonatani na antu asyazile nayo, yaali umu mpanga ya Geba iya Ina Benjamini, nupya Aina Filisti yapangiile inkambi mu Mikimasyi. 17 Nupya maumba yatatu aa yasilika yafumanga umu nkambi ya Ina Filisti nu kuya umu kuzanza Aina Izlaeli. Iumba lyonga lyalungamanga uku museo uwa ku Ofula ku mpanga ya Syuali; 18 Iumba lyuze lyalungamanga uku museo wa ku Beti-holoni; ni iumba lyakwe citatu nalyo lyalungamanga uku museo wa ku mupaka uwalozyanya nu mukonko wa Zeboimu umupiipi nu lwanga.
19 Lyene umu mpanga yonsi iya Ina Izlaeli mutaali kasula wa vyela, pa mulandu wakuti Aina Filisti yalanzile iyati: “Pakuti Aebele yataasula ulupanga nanti isumo.” 20 Nupya Aina Izlaeli yonsi yayanga uku Ina Filisti umu kunyolesya mase ya kuli ya pulao yao, ya piki, impasa, nanti ivikwakwa. 21 Umutengo wa kunyolelako amase yakwe ya pulao, ya piki, ya leki, impasa nu kulungisizya ivya kutunkwilako ing’ombe, wayanga magilamu 8 yakwe siuva. 22 nupya pa wanda wa ulwi, kusi umuntu ali wensi uwazanyilwe nu lupanga nanti isumo pa yantu aali na Saulo na Yonatani, Saulo sile nu mwanakwe Yonatani aakweti ivyanzo.
23 Asilika Aina Filisti yaile umu kucingilila incende ya kulambilapo iyayelile umu mukonko wa Mikimasyi.