1 Samweli
18 Lino Devedi wamazile sile ukulanda na Saulo, Yonatani na Devedi izile iyaya sana ivyuza, Yonatani watandike ukutemwa Devedi wakwe vino waitemilwe. 2 Kufuma pa wanda kwene uuwa, Saulo wasunzile Devedi nupya atamuzumilizye ukuswilila kuli isi. 3 Nupya Yonatani na Devedi yapangiine upangano pa mulandu wakuti wamutemilwe wakwe vino waitemilwe. 4 Yonatani wazuzile ikoti lyakwe ilyaula makasa nu kupeela Devedi, wamupeezile ni cakuzwala cakwe ica ulwi, ulupanga, ulapwa, nu musipi. 5 Devedi waombanga ningo muli vyonsi konsi kuno Saulo wamutuma. Fwandi Saulo wamusonsile ukuti aangalila asilika, nupya antu yonsi yatemilwe pali cico kumwi na aomvi yakwe Saulo.
6 Lyonsi lino Devedi na yauze yawela kufuma umu kukoma Aina Filisti, anaci yafumanga umu misumba yonsi ya Ina Izlaeli mu kukomenkanya Umwene Saulo ala yakwimba nu kucina, kulizya utungoma nu ku sansamuka, alino nu kulizya ya banjo aansale zitatu. 7 Anaci azevyanga imbanga yakuti:
“Saulo watakoma alwani masauzandi,
Devedi nawe watakoma alwani masauzandi 10 sauzandi.”
8 Saulo wasosile sana, nupya ulwimbo luno anaci imbanga lwamusosizye, pano walanzile ati: “Yakuti Devedi watakoma alwani masauzandi 10 sauzandi, nomba nemo yakuti inkoma sile alwani masauzandi. Iikusyala sile ukumupeela uwene!” 9 Ukufuma pa wanda kwene uuwa, Saulo watwalilile ukuceeceta vino Devedi wacitanga.
10 Uwanda uwalondelilepo umupasi uwipe ukufuma kuli Leza wizile pali Saulo, nupya nawe watandike ukucita kwati watapena* umu ng’anda ale Devedi akulizya izeeze wakwe vino wacitanga lyonsi. Saulo walemile isumo mu minwe, 11 Wavwinsile isumo, ala akwelenganya ukuti: ‘Nimatotenkanya Devedi ku ciumba!’ Nomba Devedi utwike pa miku iili. 12 Lyene Saulo watandike ukutiina Devedi pa mulandu wakuti Yeova wali nawe lelo watiile ukuya na Saulo. 13 Fwandi Saulo wafumizye Devedi pa cifulo cino wakweti nu kumusonta ukuti aangalila antu masauzandi, nupya Devedi watungululanga asilika umu nkondo. 14 Devedi watwalilile ukuomba ningo muli vyonsi vino wacitanga nupya Yeova wali nawe. 15 Nupya lino Saulo waweni ukuti Devedi akuomba ningo sana muli vyonsi, watandike ukumutiina. 16 Lelo Aina Izlaeli yonsi na Ayuda yatemilwe Devedi pano wayatungululanga umu ulwi.
17 Pa cisila Saulo wanenyile Devedi ati: “Melabu umwanane umukazyana aewi. Namamupeela kuli wewe ukuti aye a mamako. Wemo utwalilile sile ukuya umusipe nu kulwa inkondo zyakwe Yeova.” Pano Saulo welenganyanga ukuti: ‘Nsikulonda ukumukoma. Aina Filisti yalamukoma.’ 18 Lino Devedi uvwile vivyo waswike Saulo ati: “Nga nene weni nupya ya lupwa yane aaweni, amu lupwa lwakwe tata umu Izlaeli, pakuti inje isivyala wa mwene?” 19 Lelo lino insita yafisile iyakuti Saulo apeele umwanakwe Melabu kuli Devedi, ala Melabu wapeelwa mpiti kuli Adilieli Umwina Mehola.
20 Lyene Mikala umwana umukazyana wakwe Saulo yatemwanine na Devedi, nupya yanenyile Saulo pi lyasi lii, nawe uvwile ningo. 21 Fwandi Saulo watiile: “Namamupeela umwanane pakuti aye wa citeyo kuli aliwe, pakuti Aina Filisti yangamukoma.” Lyene Saulo wanenyile Devedi muku wakwe ciili ati: “Umatwala umwanane ilelo.” 22 Nupya Saulo wanenyile aomvi yakwe ati: “Landini na Devedi ku mbali muti, ‘Umwene watakutemwa, na aomvi yakwe yonsi iyakutemwa. Fwandi twala umwana wa mwene.’” 23 Lino aomvi yakwe Saulo yanenyile Devedi mazwi yaa, Devedi walanzile ati: “Uzye u mulandu unono ukutwala umwana wa mwene lino nene mupiina nupya umusuulwe?” 24 Lyene aomvi yakwe Saulo yanenyile Saulo vino Devedi walanzile.
25 Saulo watiile: “Kanenini Devedi muti, ‘Umwene atakulonda impango, akulonda sile inkanda 100 izya kumpela ya aonsi zya Ina Filisti, pakuti alandule pa yalwani yakwe.’” Pano Saulo walondanga ukuti Aina Filisti yakome Devedi. 26 Fwandi aomvi yakwe Saulo yaile iyanena Devedi mazwi yaa, nupya Devedi wazumiile ukutwala umwana wa mwene. Lino insita itatala yafika, 27 Devedi wapisile na aonsi yakwe nu kuyakoma Aina Filisti 200, nupya waleesile inkanda izikumanile uku mwene, pakuti angatwala umwana wa mwene. Fwandi Saulo wapeezile Mikala kuli Devedi kuti aye a mamakwe. 28 Saulo wilwike ukuti Yeova wali na Devedi nu kuti Mikala watemilwe Devedi. 29 Cii calenzile Saulo atandike ukutiina sana Devedi nupya Saulo wizile aya umulwani wakwe Devedi umi wakwe onsi.
30 Lyonsi lino ya cilolo ya Ina Filisti yaya umu kulwa, Devedi wacimvyanga ukucila aomvi yakwe Saulo yonsi nupya wizile alumbuka sana.