Yobo
37 “Cii cikalenga umwenzo wane ukukunta
Nu kufuma pano wikala.
2 Kutikisya ukwi zwi lyakwe ilya maka
Nu ku kupangalakansya ukukafuma umu kanwa kakwe.
3 Izwi lyakwe likauvwika umu nsi yonsi
Nupya akatuma inkuwa ukufika kuno insi yapelela.
4 Pa cisila kukauvwika icilulumo;
Akalanda ni izwi lyakwe ilya maka ilyaya wa cilulumo ca kupangalakansya,
Nupya asilesya inkuwa ndi cakuti izwi lyakwe lyuvwika.
5 Leza akapangalakansya ni izwi lyakwe umu nzila iya kuzungusya;
Nupya akacita ivintu vikalamba vino tutanga tuvwikisye.
6 Pano akanena usu wa mvula ati, ‘Ponela pansi,’
Nu kunena imvula ati, ‘Toonya sana.’
7 Leza akalesya imilimo ino antu yonsi yakaomba
Pakuti antu yonsi yamanye imilimo yakwe.
8 Inyama zya mu mpanga zikaingila umu viwina
Nu kutwalilila ukwikala mumo kwene.
9 Umuza ukaiza nu kutandika ukupunga,
Ni mpepo ikafuma uku muza wa ku katutu.
10 Umupu wakwe Leza ukalenga manzi ukulemana,
Nupya ukalenga manzi aingi ukukoma.
11 Akapima makumbi ukuomvya umunyezi;
Nupya akasalanganya inkuwa umu makumbi;
12 Yakaya konsi kuno wayanena;
Nupya yakaacita vyonsi vino wayanena ukucita umu nsi.
13 Cingaya pa mulandu wa kufulula nanti pa mulandu wa nsi
Nanti pa mulandu wa kutemwa kwa cumi, akalenga cicitike.
14 Yobo kutika kuli cii;
Ikala mya nu kwelenganya sana uku milimo yakwe Leza iya kuzungusya.
15 Uzye wamanya vino Leza akatungulula makumbi
Na vino akalenga inkuwa ukumyantula ukufuma umu makumbi?
16 Uzye wamanya vino makumbi yakaelela?
Yii i milimo yakwe Leza iya kuzungusya, ukumanya kwakwe kwaya ukumalilike.
17 U mulandu ci uno ivyakuzwala vyako vikakaila
Lino insi ili mya pa mulandu nu muza wa ku kaeya?
18 Uzye wemo pamwi nawe, mungakonzolola ulwelele
Nu kuleka lukome wakwe mila wa cela?
19 Tunene ivya kumwasuka;
Tutanga twasuke pano tuli umu mfinzi.
20 Uzye akalondekwa ukumunena ukuti nkulonda ukulanda?
Nanti uzye kuli umwi uwalanda cimwi icilinzile ukulandwa kuli aliwe?
21 Yatanga yalole nu luswepo* kwene,
Nanti cakuti iluwala umu lwelele,
Kufikila umuza wapita nu kusenda makumbi.
22 Ku katutu u kukafuma lulumbi lwakwe goldi;
Lulumbi lwakwe Leza u lwa kuzungusya.
23 Tutanga tuvwikisye Uwa Maka Yonsi;
Wakwatisya amaka,
Ataya nu lufyengo nupya wavulisya ulungami.
24 Fwandi antu yalinzile ukumutiina.
Pano wene atatemwa umuntu ali wensi aakailola ukuti wakwata mano.”