Yobo
38 Lyene Yeova waswike Yobo ukufuma umu cimuza icikalamba ati:
2 “A weni aakuvimbilikizya pali vino impingulapo
Nu kulanda vino atamanyile?
3 Ipekanye wa monsi;*
Namakuuzya, naawe ungasuke.
4 Wali kwi lino napanganga insi?
Neene ndi cakuti ukwelenganya ukuti ukailuka.
5 Uzye wamanya uwapingwile vino insi ifwile ukuya ukulu,
Nanti uwapimile insi ukuomvya intambo ya kupimilako?
6 Aepi apasimpwa incesi izya nsi,
Nanti a weni uwisile iwe lya pa koona ilyatungilila insi,
7 Lino intanda zya katondo zyasansamukiile pamwi,
Nupya lino ana yakwe Leza aonsi* yonsi yatandike ukupunda ala ya kumulumbanya?
8 Nupya a weni uwapindiliile yemba ni visaasa
Lino walepwike kwati wafuma umunda,
9 Lino namuzwisile makumbi
Nu kumupombelezya umu mfinzi ikalamba,
10 Lino nisile umwakuti aapelela
Nu kwikako imifikilo ni visaasa,
11 Nupya namunenyile inti, ‘Pakwene apano ulaapelela, utaakulapuzyapo;
Pakwene apano icilumba cako ica maimbi cilaapelela?’
12 Uzye watala wanena katondo
Nanti ukulenga macaca ukumanya incende ino yalinzile ukulolekelako?
13 Uzye ale wewe ukanena uluswepo lwa katondo ukuti luye uku mpela zya nsi
Nu konona aipe?
14 Insi ikasenuka kwati avino ivu likasenuka nga ikapo icifwatikilo,
Ni vyayamo vikaloleka kwati icakuzwala.
15 Lelo aipe yene yasikwata uluswepo,
Nupya makasa yao yano yakakatusya yakavunolwa.
16 Uzye watala wafika pansi apayela intulo zyakwe yemba
Nanti ukulondelezya umu manzi azike?
17 Uzye impongolo zya mfwa zyatala zyasokololwa kuli wewe,
Nanti uzye watala walola impongolo zya mfinzi ikalamba sana?
18 Uzye wamanya vino insi yakula?
Neene ndi cakuti wamanya vyonsi vii.
19 Uzye aekwi kuno uluswepo lukaikala?
Nupya aekwi kuno imfinzi ikaikala,
20 Icakuti ungavitungulula uku ncende ino vikazanwako
Nu kumanya inzila iyaya kuno vikaikala?
21 Uzye wamanya vii pa mulandu wakuti waviilwe mpiti
Nanti pa mulandu wakuti ukweti imyaka iingi?
22 Uzye watala wingila muno usu wa mvula ukasungilwa,
Nanti ukulola muno mawe ya mvula yakasungilwa,
23 Vino nasunga ivilaomviwa umu nsita ya ucuzi,
Pa wanda wa ulwi ni nkondo?
24 Aekwi kuno uluswepo lukasalanganila,
Nupya aekwi kuno umuza wa ku ufumondaka ukapungila umu nsi?
25 Uzye a weni uwalepula umwa kupita mulamba
Nu kupanga inzila umwa kupita makumbi ya mvula aakapangalakansya,
26 Pakuti imvula iyatoonya umusiikala antu,
Nu kuleka ukuti yatoonya umu lwanga umutaaya antu,
27 Pakuti ikontelele impanga izyononeka
Nu kuleka ukuti isote limelemo?
28 Uzye imvula yakwata isi,
Nanti isi wa lumi a weni?
29 U munda yakwe weni umwafumile manzi akome,
Nupya a weni uwaviile ukuzuuka ukufuma ukwi yulu
30 A weni aakalenga manzi iyakoma kwati iwe,
Nu kulenga papela ya manzi aingi ipakoma?
31 Uzye unganyepa imyando ya ntanda izikaamwa ukuti Kima*
Nanti ukusapula intambo zya ntanda izikaamwa ukuti Kesili?*
32 Uzye ungatungulula intanda* mu nsita ya ziko
Nanti ukutungulula intanda izikaamwa ukuti Asyi* kumwi nu twana twa ntanda zizyo?
33 Uzye wamanya masunde aakatungulula mayulu,
Nanti uzye ungika masunde umu nsi aakuti mayulu yalondela?
34 Uzye ungapunda ni izwi lyako umu makumbi
Pakuti manzi aingi yakuvimbilikizye?
35 Uzye ungatuma inkuwa?
Uzye zingiza zikunene ziti, ‘A sweswe pano!’
36 Uzye a weni uwika mano umu makumbi*
Nanti uzye a weni uwapeela ivintu vya mu lwelele ukwiluka?
37 A weni uwakwatisya mano aangapenda makumbi,
Nanti a weni aangitulula manzi ya mu makumbi ukufuma ukwi yulu
38 Lino ulukungu lwaya wa matipa
Ni viunguluwe vya musili vyakambantana?
39 Uzye ungalungila cisama ivyakuti alye
Nanti ukulenga ya cisama ukwikuta
40 Lino iyalambalala umu ncende zino yakafisamamo
Nanti ukuteyamila nu kuloleela pakuti yazanze?
41 A weni aakapekanyizizya mwankole ivyakulya
Lino utwana twakwe tukulilila kuli Leza pakuti atwazwe
Nu kupitana pa mulandu wakuti pasi vyakuti tulye?