Isamu
IBUKU 4
(Masamu 90-106)
Ipepo lyakwe Mose, umuntu wakwe Leza wa cumi.
90 We Yeova wewe ncende itu iya kwikalamo* uku nkulo zyonsi.
2 Lino imyamba itali iyeko
Nanti lino utatala wapanga insi ni mpanga,
Wewe Leza, ukufuma umuyayaya ukuya umuyayaya.
3 Ukalenga muntu kuswilila ku musili;
Ukalanda uti: “Mwe yana ya yantu swililini.”
4 Pano kuli wewe imyaka 1,000 ikapita zuwa kwati u wanda onga,
Wakwe vino insita ikapita usiku.
5 Ukayonona zuwa; yakaya wa mfwele;
Katondo yakaya wi sote ilikumela.
6 Katondo likaleemba nupya likaloleka ningo,
Lelo manguzi likafoota nu kuuma.
7 Pano itulowa pa mulandu nu ukali wako
Nupya tuli ni ntete pa mulandu ni cipyu cako.
8 Wamanya ukuluvyanya kwitu;
Luswepo lwa cinso cako lukasokolola inkama zitu.
9 Amanda itu iyasila pa mulandu nu ukali wako;
Nupya myaka itu yatisila zuwa kwati ukutotoza
10 Imyaka ya umi witu yaya 70,
Nanti 80 ndi cakuti umwi akweti sana maka
Lelo umu myaka iyo mwaya sana intazi nu ulanda;
Ikasila zuwa nupya tukafwa.
11 Uzye a weni aangamanya maka ya ukali wako?
Icipyu cako cakulisya avino nu kukoopa kufwile kwaya
12 Tusambilizye ivya kupenda manda itu
Pakuti tungaya nu mwenzo wa mano.
13 Si wela we Yeova! Uzye ivya musango uu vilatwalilila ukufika lilaci?
Uvwila aomvi yako uluse.
14 Mu katondo watulanga ukutemwa kwako ukwa cumi,
Pakuti tungaapunda ni nsansa nu kusansamuka mu manda itu yonsi.
15 Leka tuye ni nsansa kulingana na manda yano watufulula,
Wako vino twacuula pa myaka iingi.
16 Si aomvi yako yalole imilimo yako,
Nupya ana yao yalole ucindami wako.
17 Si Yeova Leza witu atupaale;
Si leka imilimo itu itwalilile.
Cumi kwene leka imilimo itu itwalilile.