Isamu
Ku mukalamba wakwe ya kiimba. Lwimbo luno Devedi wimvile.
140 Mpususye we Yeova uku yantu aipe;
Ncingilile uku yantu aankalwe,
2 Yayo aakapanga ukucita iviipe umu myenzo yao
Nupya aakakatusya ivimvulunganya uwanda onsi.
3 Yakanyola indimi zyao kwati inzoka;
Imilomo yao yakwata usungu kwati inzoka. (Selah)
4 Ncingilile we Yeova ku minwe ya yantu aipe;
Ncingilile uku yantu aankalwe,
Yayo aakapanga ukuncitila iviipe.
5 Antu ya cilumba yakanteya iviteyo;
Yakavungulula isumbo umu mbali ya nzila ukuomvya intambo.
Yakanteya iviteyo. (Selah)
6 Nkanena Yeova inti: “Wewe Leza wane.
Kutika we Yeova ku kupaapata kwane ukwa kulenga uwazwilizyo.”
7 We Yeova, Mwene wa Papelapela, Kapususya wane uwa maka,
Ukacingilila umutwe wane umu wanda wa ulwi.
8 We Yeova, utapeela aipe vino yakalonda.
Utaleka mapange yao yatunguluke, pakuti yatayuvwa. (Selah)
9 Si imitwe yakwe yayo aatiyanzinguluka
Ivimbilikiziwe na mazwi aipe yano iyalanda.
10 Si makala ya moto yayaponele kwati imvula.
Si yasumbilwe umu moto,
Umu viwina ivizike,* pakuti yataca yakatuke.
11 Si antu aakwakwa yatazana incende muno nsi.
Si viipe vikonke antu aankalwe nu kuyakoma.
12 Namanya ukuti Yeova alacingilila antu aakucuziwa
Nu kupeela umulinganya uku yantu aapina.
13 Cumi kwene alungami yalataizya izina lyako;
Aafumacumi yalikala pa nkoleelo yako.