Isamu

28 Nkalilila kuli wewe, We Yeova we ciliwe cane;

Utacilika ikutwi lino nkulilila kuli wewe.

Ndi cakuti watwalilila ukuya mya,

Nimaya kwati antu aakuya ukwi lindi.

 2 Si uvwa ukupaapata kwane lino nkulenga uwazwilizyo kuli wewe

Lino nkukatusya makasa ukulozya uku muputule wa mukasi uwaya umu ncende yako iya muzilo.

 3 Utankululwila pamwi na aipe, yayo aakacita iviipe,

Yayo aakalanda mazwi ya mutende lino yali pamwi na auze ala umu myenzo yao muli iviipe.

 4 Si uyalambule pa vicitwa vyao,

Ukulingana ni viipe vino yakacita.

Uyalambule pa milimo yao,

Ukulingana na vino yacita

 5 Pano yasiika mano kuli vino Yeova akacita

Nanti ukwika mano uku milimo yakwe.

 6 Si Yeova alumbanyiziwe,

Pano watauvwa ukupaapata kwane.

 7 Yeova ali maka yane nupya ali cisyangu cane;

Namutaila nu mwenzo wane onsi.

Impokelela uwazwilizyo ukufuma kuli aliwe, nupya nkusansamuka,

Fwandi namamwimbila ulwimbo lwa kumulumbanya.

 8 Yeova aliwe akapeela antu yakwe maka;

Ali mwakufisama, nupya akapususya umusoololwe wakwe.