Uzye Uwanda wa Upinguzi Kuli Kutuuli?

UZYE mwemo ndi muvwa yakuti uwanda wa upinguzi, mukati yakulanda pali cani? Antu aingi yakati uwanda wa upinguzi kuli kuti uwanda lino imintapendwa ni mintapendwa ya antu yalaatantama wenga na wenga ku cilimba ca wene cakwe Leza. Nga alino kulaya ukupingulwa cila-muntu. Yamwi yalapingulwa ukwikala umu paladaise umwiyulu, lyene yauze yene yalapingulwa ukuya uku moto wa pe. Nomba, vii asi ali vino Baibo ikasambilizya. Izwi lyakwe Leza likalondolola ukuti uwanda wa upinguzi usi wanda uwipisye icakuti watulenga twaikala sile ntete-ntete, lelo wene ulazifya ivintu.

At Pa Umbwilo 20:11, 12,, tukawelengapo vino Yoane walondolwile Uwanda wa Upinguzi ati: “Nupya ndola cilimba ca wene cikulu citiswe, nga ndola na wino atenzipo. Insi ni yulu vyutuka kufuma pa manso yakwe nga vitatazile viloleke nupya. Nga ndola afwe akulu na anono kwene, ala yaimi nkoleelo ya cilimba ca wene. Alino mpapulo zikupulwa. Nga lyene lupapulo na luze lukupulwa. Luu luli lupapulo lwa antu aumi. Afwe yapingulwa kulingana ni vintu vino yacisile ndi vino vyalembwa mu mpapulo.” Uzye Kapingula wino yaalumbula paa a weni?

Yeova ali Kapingula wa yantu uwa papelapela. Lelo kwaya wino wasonta ukuomba umulimo wa kupingula. Kulingana ni Milimo 17:31, mutumwa Paulo walanzile ukuti Leza “wimika uwanda uno alapingwilapo antu yonsi amu nsi mu wololoke ukupitila muli wino wasola.” Kapingula wino wasola a Yesu Klistu. (Yoane 5:22) Nomba, alilaci lino Uwanda wa Upinguzi ulatandika? Nupya uwanda uuwo ulatalimpa uli?

Ibuku lya muli Baibo ilyakuti Umbwilo likatulangilila ukuti Uwanda wa Upinguzi ulatandika lino inkondo ya Alamagedoni yasila, ala Satana ni vicitwa vyakwe iviipe ivifumiziwapo.a (Umbwilo 16:14, 16; 19:19–20:3) Alamagedoni ndi wasila, Satana pamwi ni viwa vyakwe yalayanyepa nu kusumbilwa umu ciwina caula mpela apa myaka 1,000. Pa nsita yiyo, antu 144,000 yalaateeka ukwiyulu “pamwi na Klistu kulingana ni myaka izimbi lyonga.” (Umbwilo 14:1-3; 20:1-4; Loma 8:17) Fwandi ndi yati uwanda wa upinguzi ala yasikulanda sile apa wanda ukwene uwakwata sile maawazi 24. Lelo u wanda uwalingana ni myaka 1,000.

Umu myaka iiya 1,000 Yesu Klistu “alapingula antu aumi na afwe.” (2 Timoti 4:1) “Antu aumi,” ayaaya yano Baibo ikati “iumba likulu cuze” aalapusuka pa Alamagedoni. (Umbwilo 7:9-17) Mutumwa Yoane waweni “afwe . . . ala yaimi nkoleelo ya cilimba ca wene” ca Upinguzi. Yesu walavile ati, “antu yonsi ali mu malindi yaluvwa izwi lyakwe [Yesu] nu kufumamo” kuli kuti yalatuutululwa. (Yoane 5:28, 29; Milimo 24:15) Nomba, uzye antu yonsi yalaapingulwa pa milandu ci?

Kulingana ni cilolwa cakwe Yoane, ‘mpapulo zyakupwilwe,’ nga alino “Afwe yapingulwa kulingana ni vintu vino yaacisile ndi vino vyalembwa mu mpapulo.” Uzye ivyalembwa umu mpapulo zizyo, i milandu ino antu yacitanga mpiti? Awe, upinguzi uwo utalaalola pa milandu ino antu yacitanga lino yatatala yafwa. Uzye twamanya uli vivyo? Pano Baibo ikati: “Umuntu ndi wafwa, ala wakululwa ku maka iifyo.” (Loma 6:7) Fwandi tungati lino afwe yalatuutuluka, ala maifyo yao yafutika. Kulikuti mpapulo zizyo zifwile zilakwata masunde nayauze yano Leza alalonda ukuti antu yace yuvwile. Yonsi aalapusuka pa Alamagedoni, na yaayo aalatuutuluka, yalaalondekwa ukuyela masunde yakwe Leza, kumwi na vino Leza alalanda ukuti yaalondela umu myaka kwene iiya 1,000. Fwandi cikupiliula ukuti antu yalaapingulwa ukulingana na vino yalaacita umu myaka iiya ino tukati Wanda wa Upinguzi.

Umu myaka 1,000, nanti tuti umu Wanda wa Upinguzi ali muno antu aingi wakwe cimwi yalakwata isyuko lya kusambilila vino Leza akalonda, alino nu kuvwila vivyo kwene. Kuli kuti apa nsita iiya, kulaya umulimo ukome uwa kusambilizya antu. I cumicumi, “yonsi yalamanya ulungami vino waya.” (Ezaya 26:9) Nomba asi yonsi aalazumila ukulondela vino Leza akalonda. Pali Ezaya 26:10 pakati: “Kwene nanti wemo ukalyombeleka antu aipe, awe cumi yene yatezya ukucita ivilungame nanti panono. Nanti sile umu nsi ya antu akazifya, namo kwene icili conga sile, yakakana ukuzumila uwene wa ukulu wako.” Antu yaayo aipe yalononwa umu Wanda wa Upinguzi, napya yatalatala yaloleke nupya.—Ezaya 65:20.

Lino Uwanda wa Upinguzi ulasila, antu yonsi aalapusuka yalaya nu umi ala yali amaliilike. (Umbwilo 20:5) Acino fwandi Uwanda wa Upinguzi ulalenga antu ukuya amalilike wakwe vino yaali umu Edeni. (1 Kolinto 15:24-28) Nga alino kulaya ukweziwa kwa kusyalikizya. Satana yalamusapula ukufuma umu ciwina caula mpela, nupya yalamuleka sile ukuti akezye ukuponzya antu umuku wa kusyalikizyako. (Umbwilo 20:3, 7-10) Yonsi aalakaanya Satana yalaipakizya vino Baibo ikati: “Antu aololoke yalikala umutende umu mpanga, nu kuipyana umuyayaya.” (Masamu 37:29) I cumicumi, Uwanda wa Upinguzi ulaleta ivintu ivisuma sana ku yantu acumi!