VINO SWE INA KLISTU TWAAYA

Ivipya mu Kulongana Kwa Mukasi ka Mulungu

Ukutandika umu Januwale 2018, umu kulongana kwa mukasi ka mulungu lyene mulaya ni vyeo vyakusambilila alino ni vikope na mavidyo ukufuma muli Baibo wa kusambililamo uwa pa intaneti wakuti New World Translation of the Holy Scriptures (nwtsty), nanti cakuti mutakweti Baibo wii umu lulimi lwinu. Ukwaula nu kutwisika mulaaipakizya sana ukusambilila pa vyeo vii pa kupekanya ukulongana. Ni cicindamisye i cakuti, cilamwazwa ukupalama sana kuli Tata witu uwaya nu kutemwa, Yeova.

IVYEO IVYAKUSAMBILILA

Mu vyeo vyakusambilila mulaaya ukulanda pa mikalile, pali vino impanga yalolekanga, alino nu lulimi ulwaomviwanga umu vikomo ivingi ivya muli Baibo.

Mateo 12:20

Utambi Uzimantukile: Inyali iyaomviwanga uku mpiti umu ng’anda, kayaanga kamate sile muno ikanga amafuta ya miolivi. Yaomvyanga utambi wa makonje uwonkanga mafuta pakuti inyali itwalilila ukwaka. Amazwi akuti ‘utambi uzimantukile’ yakasenula ukuti utambi ukusuuka sile pa mulandu wakuti ucikweti umunyeswa lelo akambilimbili ala ikasyala kanono sana nanti sile limwi ikazima. Usowelo uwa pali Ezaya 42:3 walanzile pa mizu yano Yesu wakwata ukuti; atali nu kuzimya inyali ikuzimantukila kuli kuti ukuzimya upaalilo unono umu yantu alanda nupya anyomelwe.

Mateo 26:13

Icumi: Izwi lya Cigliki ilyakuti a·menʹ, nga mwalisenula viivi kwene vino lyaya ukulileta umu Ciyebulai likusenula ukuti “ciye vivyo kwene” nanti “vivyo kwene.” Yesu waomvyanga sana mazwi kwene yaa pa kutandika ukulanda vimwi, nanti pa kulanda ulayo nanti usowelo, ukulangilila ukuti vino akulandapo i vya cumi nupya ivya kutailwa. Vino Yesu waomvya izwi lii ilyakuti “icumi” nanti amen vyaiyela sana umu malembelo amuzilo. Ndi cakuti izwi lii lyaomviwa umu kukonkana (a·menʹ a·menʹ), wakwe vino caya nu mwi buku lyakwe Yoane, amazwi yakwe Yesu ala yamasenulwa ukuti umu “cumi.”—Yoa. 1:51.

MAVIDYO NI VIKOPE

Vikope, alino ni vikope vya kuleenga na mavidyo asikuvwika amazwi alino na akuleenga, yakalangilila ivyeo ivingi vino vyalembwa muli Baibo.

Betifage, Mwamba wa Miolivi, na Yelusalemu

Kavidyo kaa kakulangilila umuseo ukuya uku Yelusalemu ukufuma uku ufumo ndaka, ukufuma umu muzi umwi (et-Tur) uno umu nsita yakwe Yesu yatangi Betifage uwali pa mwamba wa miolivi. Betaniya u musumba uwaya uku ufumo ndaka wakwe Betifage uku mutelemuko wa Mwamba wa Miolivi. Ndi cakuti Yesu ali umu Betaniya ilingi walalanga mumu kwene na asambi yakwe. Betaniya pali ndakai yakamwama ukuti el-ʽAzariyeh (El ʽEizariya) izina lya mu Cialabu ilikasenula ukuti “Incende Yakwe Lazalo.” Tutange tutwisike ukuti Yesu wikalanga uku ng’anda yako Mata, Maliya na Lazalo. (Mate. 21:17; Mako 11:11; Luka 21:37; Yoa. 11:1) Yesu nga akufuma kumwao Mata akuya ku Yelusalemu, afwile waomvyanga umuseo kwene uu uno iyalangilila muli vidyo. Pa Nisani 9, 33 C.E. lino wakwezile punda ukuya uku Yelusalemu, afwile wafumilile uku Betifage ukulondela umuseo wakuya uku Yelusalemu.

Umuseo wa kufuma uku Betaniya ukuya uku Betifage
Betifage
Mwamba wa Miolivi
Cifoloma ca Kiduloni
Ing’anda ya Kupepelamo

Ulusunga Umwi Fupa Ilyume

Cii i cikope ci fupa lya muntu muno yapopiile ulusunga ulwatalimfile masentimita 11.5. Ifupa lii lyazanyilwe umu 1968, lino yazikulanga ivya kuzikula uku kaeya ka Yelusalemu, umu manda ya ina Loma. Vino yakazikula vikalangilila ukuti mpiti ndi yakoma umuntu yaomvyanga insunga pa kumupopela pa cimuti. Ulusunga luu lufwile lwakoline ni nsunga zino asilika aina Loma yaomvizye pa kupampamila Yesu Klistu pa cimuti. Ifupa kwene lii lyazanyilwe mu kambokosi kiiwe kano yakaama ukuti ossuary, muno yakaika amafupa ya muntu umufwe ndi cakuti umunyefu waola. Nupya cii cikulangilila ukuti ali wensi wino yapopela pa cimuti yamuzikanga.—Mate. 27:35.