Mwalanga Ukuti Mukataizya Pali Ukapekape Wakwe Yeova

YEOVA a Leza uwaya na ukapekape. (Yakobo 1:17) Ukapekape wakwe ukalolekela muli vino waumba. Waumba intanda, nupya waumba ivimelwa ivisuma cuze.—Masamu 65:12, 13; 147:7, 8; 148:3, 4.

Kalemba wakwe Masamu 104 wataizyanga sana Yeova pali vyonsi vino waumba, ali cino walembiile nu lwimbo lwa kulumbanya Leza. Uzye namwe ndi mwawelenga Masamu 104, mukataizya wakwe vino kalemba wa Masamu wataizyanga? Walanzile ati “Nkanaimbila [Yeova] mu umi wane onsi. Nemo namalumbanyanga Leza wane lino ncili nu umi.” (Masamu 104:33) Uzye namwe avino mukalonda ukucita?

YEOVA U WAYA SANA NA UKAPEKAPE

Yeova akaalonda kuti naswe twaya na ukapekape wakwe vino waya. Nupya watunena umulandu uno tulinzile ukuyela na ukapekape. Yeova wanenyile umutumwa Paulo ukulemba ati: “Uwanena akama mu vintu vya mu nsi kuti yataitumika, nupya yatapaalila mu vyuma vino vitakwata uyo, suka muli Leza. Wene kwaula lusoko akatupeela vintu vyonsi ivyakutuzanzya. Uwayanena kuti yacita visuma, nu kuya akama mu milimo isuma, nu kupeela kwaula lusoko, yaye aiteyanye kwankanyako yauze. Mu musango uu amuno yene yalaitulikila cuma cino cilaya wa mufula ukome uwa manda akwiza, kuti lyene yakapelwe umi wa pe uwa cumi.”—1 Timoti 6:17-19.

Muli kalata wakwe ciili uku ina Kolinto, Paulo walondolwile icingaleenga ukuti twapeelako yauze. Walanzile ukuti: “Cila muntu alinzile kupeela kulingana na vino wataipingula umwisikulu kwaula kusiima nanti kupatikiziwa. Pano Leza watemwa muntu wino akapeela ni nsansa.” (2 Kolinto 9:7) Uzye a weni wino tukaazwilizya ndi tuli na ukapekape? Paulo walanzile ukuti tukaazwilizya yauze lino tukuyapela vino yakulondesya sana, nomba tukayazwa na sweineco pano Yeova alatupolelela.—2 Kolinto 9:11-14.

Lyene Paulo walanzile pa cintu icicindame sana icikalanga ukuti Yeova a kapekape lino wavwanzile ati: “Lekini tutaizye pa wila wakwe uwakuzunguka uno mazwi yatangalondolola!” (2 Kolinto 9:15) Pa ‘wila wakwe Yeova’ paaya ivintu vyonsi vino akatupeela ukupitila muli Yesu Klistu. Mazwi yatangalondolola vino uwila uu wacindama.

Tungalanga uli ukuti tukataizya pali vino Yeova na Yesu yatucitila na vino yalatucitila uku nkoleelo? Inzila yonga ino tungalangilamo ukuti twaya na ukapekape u kuomvya insita itu, amaka itu, ni vintu vino twakwata umu kupepa Yeova alino nu kwazwa yauze ukusambilila pali aliwe. Tungacita vii asi mulandu twakwata ivintu ivingi nanti foo.—1 Milandu 22:14; 29:3-5; Luka 21:1-4.

Vino Yamwi Yakasangwilako Uku Mulimo Wa Mu Nsi Yonsi

Wakwe viivi kwene vino cali uku Ina Klistu amu nsita ya atumwa, Aina Klistu andakai yakapatulako ulupiya lumwi ulwakusangwilako uku mulimo wa mu nsi yonsi nu kwika umu kambokosi akaaya umu cilongano cao. (1 Kolinto 16:2) Cila mwezi, vilongano vikatuma umusangulo uu uku maofesi yakwe ya Nte Yakwe Yeova aaya umu mpanga yao. Mungatuma nu musangulo uku kaungwe akalembesiwa umwi sunde kano ya Nte Yakwe Yeova yakaomvya kuno mwikala. Pakuti mumanye izina lya kaungwe kaako, muyule pa webusaiti apa www.jw.org nu kutumila ukwi office lyakwe ya Nte Yakwe Yeova ilyayela ukumwinu. Mungatuma imisangulo ii iyatilondololwa apisika:

IMISANGULO

Mungasangwilako ukuomvya kadi ya ku Banki. Umu mpanga zimwi yakasangwilako ukuomvya webusaiti iya jw.org nanti webusaiti yuze sile.
Mungasangwilako impiya, iviyembelo, nanti ivili vyonsi vino mwakwata. Mulinzile ukutumila pamwi na kalata wa kulondolola vino mwasangwilako ukuti yangaviomvya muno yakulondela.

IMISANGULO IYAKWATA IVYAKULONDELA

Imisangulo ya mpiya ino mungalondolola ukuti yangamuwezezya nga mwalonda ukuziomvya ukunkolelo.
Mulinzile ukutumila pamwi na kalata muno imulondolola ivyakulondela pa musangulo uno mwatuma.

INZILA ZYUZE IZYAKUSANGWILAKO

Pisika itulondolola inzila zyuze zino mungaomvya pa kusangwilako pa kutungilila umulimo wa mu nsi yonsi. Lino mutatala mwasangula, mulinzile ukuzya iofesi ilikaangalila umulimo wa kusimikila uku mpanga kuno mwayela nu kuzya vino mungacita pa kuti musangwileko. Pano ivikalondekwa na masunde ya misonko vyapusana ukulingana ni mpanga kuno mwayela, fwandi mulinzile ukuuzya umuntu umwi uwamanya amasunde amu mpanga inu lino mutatala mwasangwilako.

Impiya izikasungwa: Ndi cakuti umuntu walembesya uku kampani ukuti yakamupeele impiya ndi vimwi vyamucitikila nanti ndi cakuti walembesya ukuti yakamupeele impiya ndi wafika pa musinku wa kuta incito ukulingana ni sunde lya uteeko, angasangwilako nu kulemba ukuti akaungwe akaalembesiwa umwi sunde kakwe ya Nte Yakwe Yeova kakapoke impiya zizyo.

Impiya izikasungilwa uku banki: Ukulingana ni vikalondekwa uku ncende ino mwayelako, mungalembesya uku banki ukuti impiya zino yalamupeela lino mwafika pa musinku wa kuta incito, nanti impiya zyuze izya kwiza omvya ukunkolelo zikapeelwe uku kaungwe kakwe ya Nte Yakwe Yeova akaalembesiwa umwi sunde ndi mwafwa.

Cikuulwa nanti ncende: Ndi cakuti mwakwata cikulwa nanti incende vino mungakazya, mungasangwilako ukuomvya akaungwe kakwe ya Nte Yakwe Yeova akaalembesiwa umwi sunde. Ndi cakuti mucili mukwikala umu cikuulwa cico nanti pa ncende iiyo, mungatantika ukuti mutwalilile ukwikala kufikila lino mwafwa.

Impiya zino yakapeela pa mpela ya mwaka: Mungasangwilako uku kaungwe kakwe ya Nte Yakwe Yeova akaalembesiwa umwi sunde impiya zino mukapoka pa mpela ya mwaka kuno mukaomba, nu kulembesya ukuti mwapokako sile impiya zinono pa mpela ya mwaka lino mutali mufwe. Mungatandika ukupoka impiya izinono pa mpela ya mwaka kwene uno mwalembesya ukuti mumasangwilangako.

Ivyuma ivikasyala umwi ndi wafwa: Mungalembela limwi ukuti ivyuma vinu ivilasyala ndi mwafwa vikapeelwe uku kaungwe kakwe ya Nte Yakwe Yeova akaalembesiwa umwi sunde. Inzila ii yaaya ningo sana pano insita zimwi ingacefyanyako imisonko imwi iikalondekwa uku uteeko.

Ivyeo na vyuze pali vino mungasangwilako uku mulimo wa mu nsi yonsi wakwe ya Nte Yakwe Yeova, mungavizana umu kabuku kamwi (Charitable Planning to Benefit Kingdom Service Worldwide) akaaya umu Cizungu nu mu ciSpanish. Kabuku kaa kakalondolola inzila izipusane pusane zino umuntu angaomvya pa kusangwilako. Ivyeo ivyaya umu kabuku kaa, limwi vitanga vimukume sana apa mulandu na masunde pa vya misonko nanti masunde yauze aaya umu mpanga inu. Fwandi ndi mwawelenga kabuku kaa, mulinzile ukulanzyanya na umwi uwamanya vino masunde yaaya ukumwinu. Antu aingi yakaazwilizya ukutungilila umulimo wa mu nsi yonsi nupya ukuomvya inzila zii pa kusangwilako kwayazwa umu vya misonko. Ndi cakuti akabuku kaa amuno kaya umu mpanga inu, mungalenga kuli kalemba uwaya umu cilongano cinu ukuti amupeeleko akabuku kaa.

Pa kuti mumanyilepo na vyuze, mungatumila iofesi lyakwe ya Nte Yakwe Yeova ilyayela uku mwinu.