Ivyeo Vya Kuomvya Umu Kabuku Kakuti Swe Ina Klistu nu Mulimo Witu
MAACI 7-13
IVYUMA IVYAYA UMWI IZWI LYAKWE LEZA | 1 SAMUELI 12-13
“Kucita Vino Tutalinzile Ukucita Kungalenga Ivintu Ukwipa”
w00 8/1 ifwa 13 pala. 17
Kucita Vino Tutalinzile Ukucita Kungalenga Ivintu Ukwipa
17 Pa kutandika, tungati limwi vino Saulo wacisiile vyali sile ningo. Pano ivintu vyataliile antu yakwe Leza nupya yazakanzanga pa mulandu ni ntete. (1 Samueli 13:6, 7) Ukuya kwene, citiipa ukucitapo cimwi pa vintu vimwi ndi cakuti calinga. Lelo mwaiusya ukuti Yeova akalola umu mwenzo nupya akamanya icikalenga twacita ivintu vimwi. (1 Samueli 16:7) Fwandi afwile wamanyanga umulandu uno Saulo wacitilanga ivintu vimwi, ivitalumbulwa muli Baibo umu kulungatika. Wakwe, Yeova afwile waweni ukuti icilumba i calenzile Saulo akane ukuteeka umwenzo. Limwi Saulo afwile wasosile sana nu kutandika ukwelenganya ukuti ne mwene wa ina Izlaeli nene ningaloleela kasesema umukote nupya aakalengela ukucita ivintu. Saulo afwile welenginye ukuti vino Samueli walengiile, wakweti insambu zyakucita vino wacisile nu kukanalondela utunguluzi uno yamupeezile. I vyani vyacitike? Samueli aatatemilwe vino Saulo wacisile. Lelo Samueli wakalipiile Saulo nu kumunena ukuti: “Uwene wako utamalengela pa mulandu wakuti wemo wakana ukusunga isunde lyakwe Yeova.” (1 Samueli 13:13, 14) Fwandi tungati, kucita vino tutalinzile ukucita kungalenga ivintu ukwipa.
w07 6/15 ifwa 27 pala. 8
Yeova Watemwa Antu Aaya ni Cuvwila
8 Vino Baibo yalanda pali vino umwene Saulo wacisile vikalanga umulandu uno cacindamila ukuya ni cuvwila. Pa kutandika Saulo wali umufuuke nupya umuicefye, alino wailolanga ukuti ‘wali muntu mucepesye pa yantu yonsi.’ Nomba lino papisile insita, Saulo watandike ukutungululwa ni cilumba. (1 Samueli 10:21, 22; 15:17) Pa nsita imwi, Saulo waile umukulwa na ina Filisti. Samueli wanenyile umwene ukuti amuloleele pa kuti aize apeele ilambo kuli Yeova nu kumunena na vyuze vino walinzile ukulondela. Nomba Samueli atiizile zuwa nupya antu yatandike ukufumapo. Lino Saulo waweni vivyo, “apeela uwila wa koca.” Cii calenzile ukuti Yeova asoke. Lino Samueli wafisile, umwene waipokolwiile pali vino atuvwiliile lino walanzile ukuti wapeezile uwila wakoca pa mulandu wakuti Samueli walengiile ukufika. Ukupeela uwila kwacindime sana uku mwene Saulo ukucila ukuvwila vino Samueli wamunenyile ukuti amuloleele aliwe akapeele uwila. Samueli wanenyile Saulo ukuti: “Waliwacita ivyauwelewele. Watukana ukusunga isunde lino Yeova Leza wako wakunenyile.” Kukanaya ni cuvwila kuli Yeova kwalenzile ukuti Saulo yamupoke uwene.—1 Samueli 10:8; 13:5-13.
Ukuvwikisya Sana Ivyaya Umu Malembo
w11 7/15 ifwa 13 pala. 15
Uzye Mulalondela Utunguluzi Wakwe Yeova?
15 Uzye antu yaa yelenganyanga ukuti ukutungululwa nu muntunze kwali nu kulenga ukuti ivintu viyazipile ukucila ukutungululwa na Yeova? Ndi cakuti avino cali, ale umu cumi vino yalondanga i vya sile sile! Nupya yali umu uzanzo wakulalondela ivintu na vyuze ivingi vya sile sile ivikafuma kuli Satana. Ya kateeka antunze yali nu kulenga yatandike ukupepa uvilubi. Antu aakapepa ivilubi yaponga, pano yakaelenganya ukuti tuleza utukaloleka utwapangwa ni vimuti nanti amawe utwa cumi nupya utwakutailwa ukucila Yeova Leza aasiloleka wiyo uwaumvile ivintu vyonsi. Nomba wakwe vino umutumwa Paulo walanzile vilubi ‘vitakwata incito.’ (1 Kol. 8:4) Ivilubi vitanga vilole, ukuvwa, kulanda, nanti ukucita icili consi. Limwi mungavilola nu kuvilema nomba ndi cakuti mwatandika uku vipepa ale umu cumi mukulondela ivya sile sile, kuli kuti ivintu ivya sile sile ivingatuletela sile intazi.—Masa. 115:4-8.
MAACI 14-20
IVYUMA IVYAYA UMWI IZWI LYAKWE LEZA | 1 SAMUELI 14-15
“Icuvwila Cazipa Ukucila Ilambo”
w07 6/15 ifwa 26 pala. 4
Yeova Watemwa Antu Aaya ni Cuvwila
4 Vino Yeova ali kaumba witu, ali mwineco wa vintu vyonsi vino twakwata. Vino ali mwineco wa vintu vyonsi, uzye kwaya icili consi vino tungamupeela? Ee, kwaya icintu cimwi icicindame cino tungamupeela. I cintu ci cico kwene? Tungazana icasuko uku kusunda kuu kwa kuti: “Mwanane, uye na mano, pakuti uzanzye umwenzo wane, pakuti ningakwata insambu zya kwasuka wensi wino anganzewanya.” (Mapinda 27:11) Tungaya ni cuvwila kuli Leza. Nanti cakuti ivikatucitikila vikapusana pusana ni nkulilo nazyo zyapusana pusana, ndi cakuti swensi kwene tuli ni cuvwila, tungasinila Satana Ciwa ukuti uwa ufi pali vino akalanda ukuti antu yangata ukutwalilila ukuya acumi kuli Leza nga yakwata intazi. Twakwata isyuko lya kucita vii!
it-2 ifwa 521 pala. 2
Icuvwila
Kusi cino tungapyanikizyapo pa cuvwila, nupya Leza atanga atutemwe nga tusi ni cuvwila. Samueli wanenyile umwene Saulo ukuti: “Uzye Yawe akazangila mu mawila yakoca ni mpolelwa ukuluta ukuyela amazwi yakwe? Ala icuvwilo caluta ukupeela impolelwa, nu kutezya nako kwaluta amafuta yakwe yasuuku.” (1 Sam. 15:22) Ukukanaya ni cuvwila icili cimwi nu kukana Izwi Lyakwe Yeova, nupya umwi ala akulanga ukuti aatazumila nanti ukutaila izwi kwene lilyo alino nu Mwineco wi izwi. Fwandi umuntu aataya ni cuvwila atapusana nu muntu aakapepa imipasi nanti ivilubi. (1 Sam. 15:23; loliniko na Loma 6:16.) Nga tukulanda sile pakanwa ukuti twaya ni cuvwila lelo tusikucita ivikulanga ukuti twaya ni cuvwila, ala pasi vino tukucita. Nupya ukukanaombela pali vino iyatunena ukucita, kukalangilila ukuti tutacindike umuntu uwatatunena ukucita vivyo. (Mate. 21:28-32) Yayo aakapelela sile pa kuvwa nu kuzumila ukuti cii ali cumi, nomba yasicita vino icumi cikalanda, ala yakuibepa sile nupya yatalapaalwa. (Yako. 1:22-25) Umwana wakwe Leza walanzile ningo ukuti yayo aakacita ivikoliineko na vino walanda, lelo aakacita ivintu umu nzila ino asilonda nanti sile pa kuti ivintu viyazipile, yatalingila umu Wene wakwe Leza lelo Yesu alayakana.—Mate. 7:15-23.
Ukuvwikisya Sana Ivyaya Umu Malembo
it-1 ifwa 493
Uluse
Nga twapatikiziwa ukulanga uluse lino ukucita vivyo ikupusana nu kulonda kwakwe Leza ivintu vingatwipila. Cii calolekiile muli vino vyacitikiile Umwene Saulo. Insita yafisile iyakuti Aina Amaleke yononwe wakwe vino Yeova walanzile, Aina Amaleke ali yantu aatandikiilepo ukunzanza Aina Izlaeli lino yafumile umu Ejipti. Saulo yamunenyile ukuti aatalinzile ukuvwila Aina Amaleke uluse. Kuvwila vino yano wali nayo yamupatikizye, kwalenzile akane ukuvwila vino Yeova wamunenyile. Fwandi cii calenzile Yeova akane umwene Saulo. (1 Sam. 15:2-24) Ndi cakuti umuntu akutaizya sana pa nsambu zino Yeova wakwata izyakutunena ivya kucita nu kutwalilila ukuya uwa cisinka kuli aliwe cingalenga ataluvyanya, ukupusanako na Saulo uwacisile ivintu ivyalenzile ukuti Leza ate ukumutemwa.
MAACI 21-27
IVYUMA IVYAYA UMWI IZWI LYAKWE LEZA | 1 SAMUELI 16-17
“Ulwi u Wakwe Yeova”
“Ulwi u Wakwe Yeova”
Davidi walondolwelile Saulo ukuti wakomile cisama na beele, na cii calenzile ukuti Saulo ataatwisika. Uzye tungati Davidi waitakizyanga? Awe. Pano wene wamanyile icalenzile ukuti acimvye vilyanyi viivi. Walanzile ati: ‘Yeova uwampokololanga ku vizanza vyakwe cisama na vyakwe beele, ali wino alantuulanya nu kumwina Filisti kwene wiya.’ Lino Saulo uvwile vii wazumiile alanda nu kuti: “Cisuma, pitanga, nga [Yeova] aye nawe.”—1 Samueli 17:37.
Uzye namwe mungatemwa ukukolanya vino Davidi wali nu utailo? Utailo uno Davidi wali nawo utaali wakwelenganya sile. Wataile Leza pa mulandu na mano yano wakweti alino ni vyamucitikilanga. Wamanyile nu kuti Yeova akaacingilila nupya akaafikilizya vino walaya. Ndi cakuti naswe tukulonda ukuti twaya nu utailo wakwe Davidi, tulinzile kutwalilila ukusambilila pali Leza umwineco wakwe Baibo. Lyene ndi tukulondela vino tukusambilila, tulaakomya utailo witu.—Ayebulai 11:1.
“Ulwi u Wakwe Yeova”
Apa wanda uu, vino Davidi waswike vikalangilila sile vino wali nu utailo. Tale elenganyini kuno umwance akulanda na Golyati, akuti: “Wemo wanjizila nu lupanga ni sumo, lelo nemo nakwizila sile na maka yakwe [Yeova] Wamaka yonsi, Leza wa vita vya ina Izlaeli, wino wemo ukasausya.” Davidi wamanyile ukuti amaka ya untunze ni vyanzo, vitanga vicite nanti acimwi. Golyati wasaalulanga Yeova Leza, nupya Yeova wali nu kwazwa Davidi. Wakwe vino Davidi umwineco kwene walanzile ukuti, Yeova “akacimvya umu ulwi.”—1 Samueli 17:45-47.
Davidi wamanyile ukuti Golyati wali ipombolo nupya waweni ni vyanzo vino wakweti. Nomba vyonsi vii, vitalenzile Davidi ukuvwa intete. Wene ataatinyile wakwe vino cali kuli Saulo na asilika yakwe. Davidi atailinganyanga kuli Golyati. Lelo wene walolanga Golyati ndi vino Yeova wamulolanga. Golyati watalimfile umupiipi na mamita yatatu nakupya u walipo umutali pali yonsi, nomba wacefile sana ngu kumulinganya kuli Yeova kateeka wa Papelapela. Fwandi vivi kwene vino swe yantu twaya, na Golyati kwene wali sile wa kapaso wino Yeova wali nu kumoola!
“Ulwi u Wakwe Yeova”
Ndakai aomvi yakwe Leza yasilwako inkondo. (Mateo 26:52) Nomba tufwile ukukolanya vino Davidi wali nu utailo. Tulinzile ukulola Yeova ukuti u wa cumi cumi nupya Leza wenga mpo wino angatupususya. Insita zimwi tungatoovoka ndi twalola vino tuli ni ntazi, lelo intazi zitu pasi vino zyaya ndi twazilinganya uku maka yano Yeova wakwata. Ndi cakuti naswe kwene twasoolola Yeova ukuya ali Leza witu nupya twaya nu utailo wakwe Davidi, kutalaya intazi izili zyonsi zino zilatutoovola. Ala mwandini kutaya icili consi icingaluta amaka yakwe Yeova!
Ukuvwikisya Sana Ivyaya Umu Malembo
it-2 mafwa 871-872
Saulo
Cali apa cisila cakuti Davidi yamupaka ukuya umwene wa Aina Izlaeli alalondelelapo, alino umupasi wakwe Yeova wafumile pali Saulo. Kufuma papa kwene, ‘umupasi uwipe ukufuma kuli Yeova watandike ukucuzya’ Saulo. Vino Yeova wafumizye umupasi wakwe pali Saulo, calenzile ukuti umupasi uwipe utandike ukumutungulula, nupya umupasi uwipe walenganga Saulo aataya nu mutende umu melenganyo, alino nu kuvulunganya imyelenganyizizye yakwe na vino wayuvwanga. Vino Saulo wakanyile ukuvwila Yeova vyalangilile vino welenganyanga alino ni vyali umu mwenzo wakwe, nupya cii calenzile umupasi wakwe Leza utacingilila Saulo ku mupasi uwipe. Fwandi vino Yeova wafumizyepo umupasi wakwe nu kuleka ukuti ‘umupasi uwipe’ wacuzya Saulo, tungawama ukuti wali ‘umupasi uwipe ukufuma kuli Yeova,’ nupya ali mulandu uno aomvi yakwe Saulo yawamilanga ukuti ‘umupasi uwipe wakwe Leza.’ Wakwe vino wenga pa yaomvi wakwe walanzile, Saulo walenzile ukuti Davidi amulizizya inyimbo pakuti auvwako ningo, ndi cakuti ‘umupasi uwipe’ watandika ukumucuzya.—1 Sam. 16:14-23; 17:15.
MAACI 28–APRIL 3
IVYUMA IVYAYA UMWI IZWI LYAKWE LEZA | 1 SAMUELI 18-19
“Mwatwalilila Ukuya Aicefye Lino Ivintu Vyamizipila”
w04 4/1 ifwa 15 pala. 4
Mwataila Umupasi Wakwe Leza Ivintu Nga Vyasenuka Umu Umi
4 Mulumendo wii kacema wali nu kumanyikwa umu luko lonsi. Yamwamile ukuti aombela umwene nu ku mulizizya inyimbo. Wakomile Golyati uwali cipombolo nupya uwa kutiinya, ica kuti na asilika Aina Izlaeli yatiinanga ukumulwisya. Lino Davidi yamwisile api iumba lya yasilika, wacimviizye Aina Filisti. Antu yamutemilwe. Nupya yimvile nu lwimbo lwa kumulumbanya. Pa kutandika, impanda mano ya mwene Saulo italondolwile sile Davidi ukuti wali umulumendo ‘uwamanyikisya ukulizya gita’ lelo yamulondolwile nu kuti “umuntu umwi umusipe nupya icita ca nkondo. Umucenjele mu kuvwanga nupya umuyembe.”—1 Samueli 16:18; 17:23, 24, 45-51; 18:5-7.
Mwalola Upusano Uwaya Umu Yantu
6 Antu yamwi yakaya ni cilumba pa mulandu na vino yakaloleka, vino yamanyikwa, isyuko lino yakwata ilya kumanya ukwimba, amaka yano yakwata nanti sile a pa mulandu na vino yatemwikwa ku yantu aingi. Davidi wene wakweti vyonsi vii, nomba nanti ciye vivyo, watwalilile ukuya muicefye mu umi wakwe onsi. Lino wakomile Golyati nupya iyamupeela nu mwana wa Mwene Saulo ukuti awino atwale, Davidi walanzile ati: “Uzye nene weni, nanti ang’anda yane na aluko lwane, uzye yene aweni muno mu Izlaeli pakuti nene nje umukwi ku wene?” (1 Sam. 18:18) I cani icavwilizye Davidi ukutwalilila ukuya muicefye? Imiyele ino Davidi wakweti, amasyuko alino ni milimo ino wakwanisyanga ukuomba, a pa mulandu wakuti Leza ‘walolekesyanga pali aliwe’ nanti tuti waicefizye nu kulauvwa kuli Davidi. (Masa. 113:5-8) Davidi wamanyile ukuti pataali cino wakweti icitafumile kuli Yeova.—Loliniko na 1 Kolinto 4:7.
7 Wakwe Davidi, antu yakwe Yeova ndakai yakaezya na maka ukuya aicefye. Tukatemwa sana ukumanya ukuti Yeova umwineco, Leza Wapapelapela, waicefya. (Masa. 18:35) Tukaezya ukulondela amazwi yaa aakuti: “Mulinzile kuya na mizu, afuke, aluse, aicefya, amutembo nupya antu akateeka imyenzo.” (Kolo. 3:12) Nupya twamanya nu kuti ukutemwa “kusyaitutumula nanti kuituumika.” (1 Kol. 13:4) Ndi cakuti twaicefya tungalenga antu yapalame kuli Yeova. Wakwe viivi kwene vino ya iya aingi yangataila ukwaula izwi nanti alimwi lelo pa mulandu ni vicitwa vyakwe ya mama yao, avino na yauze kwene yangapalama kuli Leza ndi cakuti yalola sile vino antu yakwe yaicefya.—1 Pet. 3:1.
Ukuvwikisya Sana Ivyaya Umu Malembo
it-2 mafwa 695-696
Kasesema
Nanti cakuti ya kasesema yasontwanga nu mupasi wakwe Yeova, cikaloleka ukuti asi lyonsi lino yatungululwanga nu mupasi wakwe Yeova lino ya kucita ivintu. Lelo, insita zimwi umupasi wakwe Leza wayanga pali ya kasesema pakuti uyasokolwele vino Leza akulonda ukumanyisya antu. (Ezek. 11:4, 5; Mika 3:8) Umupasi wakwe Leza nga waya pali aliyo, calenganga ukuti yavwange. (1 Sam. 10:10; Yele. 20:9; Amo. 3:8) Yatacitanga sile ivintu ivya kuzungusya, lelo vino yalandanga ni nzila ino yacitilangamo ivintu nayo kwene yayanga iya kuzungusya. Cii cikulangilila vino cikapiliula ndi cakuti umuntu watandika ‘ukucita ivintu wakwe kasesema.’ (1 Sam. 10:6-11; 19:20-24; Yele. 29:24-32; loliniko na Mili. 2:4, 12-17; 6:15; 7:55.) Vino iikanga mano uku mulimo wao na vino yayanga asipe alino ni nzila ino yacitilangamo ivintu, yazungusyanga antu yauze, wakwe vino cali kuli kasesema uwalolekiile uku yakalamba ya asilika lino Yeu wapasilwe. Lino aakalamba ya asilika yamanyile ukuti umuntu wiya wali a kasesema, yazumile vino walandanga nupya yisileko sana mano. (2 Yamw. 9:1-13; loliniko na Mili. 26:24, 25.) Lino Saulo wazinganyanga Davidi, ‘wacisile ivintu kwati a kasesema’ lino wazuzile ivya kuzwala “alala pansi tupu uwanda ulya onsi nga nu usiku kwene,” pa nsita ino Davidi utwiike. (1 Sam. 19:18–20:1) Cii cisikupiliula ukuti lyonsi sile ya kasesema yayanga tupu, pano Baibo ikalanda ivipusaneko. Pa miku yuze iili iyalembwa umu Baibo, kwayanga icalenganga ya kasesema yapite tupu lino yakulanda pa usesemo umwi. (Eza. 20:2-4; Mika 1:8-11) Ciye Saulo walondanga ukulanga ukuti wali u muntu muicefye, walondanga ukuzula sile ivya kuzwala, nanti kulanga ukuti wali u munono sana ngu kuilinganya kuli ukateeka wakwe Yeova alino na maka nanti milandu yuze, Baibo italanda icalenzile ukuti apite tupu.
EPULEO 4-10
IVYUMA IVYAYA UMWI IZWI LYAKWE LEZA | 1 SAMUELI 20-22
“Vyakucita pa Kuya Cuza Musuma”
Mwapanga Ucuza Ukome na Yauze Lino Impela Itatala Iza
18 Ndakai aina na ya nkazi yakakwata intazi izingi izipusanepusane. Aingi yakacula pa mulandu ni vilundumusi nanti inkondo. Ndi vya musango uu vyacitika, swe yamwi tungaipeelesya ukusunga aina na ya nkazi umu mang’anda itu. Yauze nayo yangasangwilako impiya. Lelo swensi tungalenga Yeova aazwa ani itu na ya nkazi. Ndi cakuti twamanya ukuti umwina nanti nkazi watatoovoka, tutange tumanye ivyakulanda nanti ivyakucita. Nomba swensi kwene tungazwilizyako. Insita zimwi tungizizya pamwi nayo. Tungikako amano lino umwina nanti nkazi akulanda. Nupya tungamunenako ilembelo limwi lino twatemwa ilya kuteekezya. (Eza. 50:4) Icacindama sana u kwazwa ya cuza itu lino yakulondekwa uwazwilizyo.—Welengini Mapinda 17:17.
w08 2/15 ifwa 8 pala. 7
Mwakolanya Imiyele Yakwe Yeova
7 Leza akalonda tuye ya cuza aakutailwa. (Mapi. 17:17) Yonatani umwana wa mwene Saulo wali a cuza wakwe Davidi. Lino Yonatani uvwile ukuti Davidi watakoma Golyati, “umwenzo wakwe Yonatani umwana wakwe Saulo iuya sana kuli Davidi cakuti amutemwa wakwe vino waitemwa umwisikulu.” (1 Sam. 18:1, 3) Yonatani wacelwile na Davidi lino Saulo walondanga ukumukoma. Lino Davidi utwike, Yonatani waile amuzana kuno wafisiime nu kupanga nawe upangano. Yonatani wisile umi wakwe umu uzanzo pa kunena Saulo pali Davidi, nomba ya cuza yaa yaili yaloline nupya, nu kukomya ucuza wao. (1 Sam. 20:24-41) Lino Davidi na Yonatani yaloline umuku wa kusyalikizyako, Yonatani wakomelizye Davidi ukuti wali nu ‘kucingililwa na Leza.’—1 Sam. 23:16-18.
w09 10/15 ifwa 19 pala. 11
Mwatwalilila Ukuya Ivyuza Umu Nsi Umutaya Ukutemwa
11 Mwaya acisinka. Solomoni walemvile ukuti: “Cuza, umukundwe insita ili yonsi. Uwina nao uwacani fwandi ndi cakuti asi wakuculila pamwi?” (Mapi. 17:17) Lino Solomoni walembanga mazwi yaa, afwile limwi welenganyanga pali ucuza uno isi Davidi wakweti na Yonatani. (1 Sam. 18:1) Umwene Saulo walondanga ukuti umwanakwe Yonatani aliwe akapyane pa wene nu kutandika ukuteeka Aina Izlaeli. Lelo Yonatani wamanyile nupya wazumile ukuti Yeova wasolwile Davidi ukuti aliwe alaya umwene. Kupusanako na Saulo, Yonatani wene atazuwilanga Davidi. Atuvwile uyi pali vino Davidi wacindikwe, nanti ukufisa vino Saulo wabepezyanga Davidi. (1 Sam. 20:24-34) Uzye twaya wakwe Yonatani? Uzye tukatemwa ndi cakuti ya cuza itu yapeelwa imilimo? Ndi cakuti ya cuza itu ya kucuula, uzye tukayateekezya alino nu kuyazwa? Ndi cakuti tuvwa yabepezya cuza witu ufi uwipisye, uzye tukazumila zuwa ufi uwo? Nanti uzye tukakolanya Yonatani nu kucingilila cuza witu?
Ukuvwikisya Sana Ivyaya Umu Malembo
w05 3/15 ifwa 24 pala. 4
Visinka Ivyaya Umwi Buku Lyakwe 1 Samueli
21:12, 13. Yeova akaenekela ukuti twaomvya melenganyo itu na maka itu lino twakwata intazi umu umi. Watupeela Izwi Lyakwe ilikatwazwa ukuya na mano, kumanya, alino nu kwelenganya ningo. (Mapinda 1:4) Nupya twakwata ya eluda aakatwazwa.
EPULEO 18-24
IVYUMA IVYAYA UMWI IZWI LYAKWE LEZA | 1 SAMUELI 23-24
“Mwaloleela Ukuti Yeova Aliwe Amwazwe”
w04 4/1 ifwa 16 pala. 8
Mwataila Umupasi Wakwe Leza Ivintu Nga Vyasenuka Umu Umi
8 Davidi wakanyile ukucitila Saulo iciipe icili consi. Walangizye utailo nupya watesile umwenzo pano walesile ukuti Yeova aliwe apingule. Lino umwene wafumile umu ciwina icali umu ciliwe, Davidi wamupundilile ati: “Si Yeova ale apingule pakasi kakwe wewe nani. Lelo nanti angala wene amandandwila, ntalatala nkucitile iciipe icili consi.” (1 Samueli 24:12) Nanti cakuti Davidi wamanyile ukuti Saulo waluvyanyizye, atalandwile nanti ukulanda iviipe pali Saulo. Insita izingi Davidi atacitanga ivintu pa kuti amale intazi umwineco, lelo watailanga ukuti Yeova amazifya ivintu.—1 Samueli 25:32-34; 26:10, 11.
w04 6/1 mafwa 22-23
Uzye Mukacita Uli Ngamwakwata Intazi Umu Umi?
Cakwe citatu cino tukusambililako icakuti, ukucila ukuomvya inzila zisi zya mu malembo pa kumala intazi zino tukweti, tulinzile ukuleka ukuti Yeova aliwe atwazwe. Umusambi Yakobo walemvile ukuti: “Lekini ukuzizimizya kumalilile umulimo uno kufwile ukuomba, pakuti mungaya amalilike nu kuya na mano muli vyonsi, ukwaula ukuulizya muli cimwi.” (Yakobo 1:4) Tulinzile ukuleka kuzizimizya “kumalilile umulimo uno kufwile ukuomba” kupitila umukuleka amezyo yaisilile aineco kwaula ukuomvya inzila izisi zya mu malembo pakuti tumale zuwa intazi zino tukweti. Lyene utailo witu uleziwa nupya cilamanyikwa ndi cakuti utailo witu wakoma nanti foo. Vikwene ali vino Yosefu na Davidi yacisile. Yatezizye ukumala intazi umu nzila iyali nu kusosya Yeova. Lelo yazizimizyanga nu kutwalilila ukupingula ningo pa vintu. Yatwalilile ukulolela ukuti Yeova aliwe ayazwe nupya mu kucita vii mwafumile ivisuma. Yonsi yoili Yeova wayaomvizye uku kutungulula nu kupususya antu yakwe.—Utandiko 41:39-41; 45:5; 2 Samueli 5:4, 5.
Naswe kwene tungakwata intazi izingalenga tweziwe ukucita ivintu ivisi vya mu malembo pa kumala intazi zizyo. Wakwe, uzye mukauvwa ukutoovoka pa mulandu wakuti mutatala mwazana uwakutwalana nawe? Nga ali vino cili, mwataluka uku wezyo wa kukanauvwila isunde lyakwe Yeova ilya kutwalila nanti kutwalilwa “umu Mwene.” (1 Kolinto 7:39) Uzye mukweti intazi umu cupo cinu? Ukucila ukulaelenganya wakwe vino aa mu nsi yakaelenganya ukuti yalinzile ukupalukana nanti ukutaana nga yakwata intazi, mulinzile ukuombela pamwi ukumala intazi zizyo. (Malaki 2:16; Efeso 5:21-33) Uzye cikumutalila ukusakamala ulupwa pa mulandu nu kuulizya impiya? Mu kulolela Yeova mwaya nu kukanacita ivintu ivingalenga antu yatutwisika nanti ukucita ivitalinzile pakuti sile tukwate impiya. (Masamu 37:25; Aebele 13:18) Swensi kwene tulinzile ukuombesya pakuti intazi zitatutoovola na pakuti Yeova atupaale. Acino, lekini twatwalilila ukulolela ukuti Yeova aliwe atwazwe ukumala intazi.—Mika 7:7.
Ukuvwikisya Sana Ivyaya Umu Malembo
Mutaleka Iciliconsi Camulesya Ukwika Mano ku Cilambu
11 Fwandi nga tuli nu kutemwa ni cikuuku, cilatwazwa ukukanaya nu zuwa. Izwi Lyakwe Leza likati: “Kutemwa kukateeka mwenzo nupya ukwa luse. Kutemwa kutakwata uzuwa.” (1 Kol. 13:4) Pakuti tutaya nu zuwa mu mwenzo, tulinzile ukulalola ivintu ndi vino Leza akavilola, ukulalola aina na ya nkazi ukuti twaya mwili onga alikuti icilongano. Baibo ikati: “Ndi cilundwa conga ca mwili catasiwa, ni vilundwa vyuze navyo vikakumako ku luzango lwakweco.” (1 Kol. 12:16-18, 26) Acino ndi cakuti yamwi yapeelwa milimo, tutalauvwa uzuwa lelo tulaya aansansa. Lekini tulande pa mwana wa Mwene Saulo, Yonatani. Lino Davidi wasoolwilwe ukuya umwene Yonatani atuvwile uzuwa, lelo wamukomelizye. (1 Sam. 23:16-18) Uzye tungakolanya Yonatani vino wali ni cikuuku nu kutemwa?
EPULEO 25–MEI 1
IVYUMA IVYAYA UMWI IZWI LYAKWE LEZA | 1 SAMUELI 25-26
“Uzye Mukacita Ivintu Ukwaula Ukwelenganyapo Sana?”
ia ifwa 78 mapa. 10-12
Umwanaci Uwacisile Ivintu na Mano
10 I vyani vino asilika yaya aombesyanga yacitiile ya kacema? Nga cayangukilanga ukutoolapo imfwele yakoma yalya ponsi sile pano yakulondela, nomba asi vino yacitanga. Lelo yene yacingililanga imfwele, alino na aomvi yakwe Nabali. (Belengini 1 Samueli 25:15, 16.) Imfwele na ya kacema yali sana umu uzanzo. Katutu ka mpanga iya Izlaeli kayelile umupiipi sana nu kwayelanga alwani akomanga antu alino na apupu aazanzanga antu cila nsita.
11 Vino yali umu lwanga, cifwile catazile sana ukulondela aonsi yonsi yaya ivya kulya. Fwandi Davidi watumile aonsi 10 kuli Nabali kuti yakalenge uwazwilizyo. Davidi wasoolwile ningo insita. Yali insita ino yaseenyanga imfwele mavumbu, lino kwayanga ukuzevya muno antu yalanganga ukapekape ukulingana nu lutambi. Nupya Davidi wasoolwile amazwi asuma aamucinzi, alino in nzila isuma iyakuyalandilamo. Wayamile nu kuti ‘ne Davidi umwana wako,’ limwi walanzile vii pa kulangilila ukuti Nabali wali umukalamba pali aliwe. Uzye Nabali wacisile uli?—1 Sam. 25:5-8.
12 Wasosile sana! Mulumendo uwalondolwelanga Abigelo ivyacitike walanzile ukuti Nabali watusile aonsi yano Davidi watumile. Nabali uwali nu lusoko wailizyanyizye pa vyakulya vyakwe, manzi, ni nyama ino yakomile. Watumfizye Davidi lino wamunenyile ukuti atacindama nupya wamukolinye uku muomvi uwapuusile umusambazi wakwe. Vino Nabali walolanga Davidi vifwile vyakoliine na vino Saulo uwamupasile wamulolanga. Yonsi yoili yatalolanga Davidi wakwe vino Yeova wamulolanga. Leza watemilwe Davidi, nupya atamulolanga wa muzya uwapondokiile umusambazi wakwe, lelo wamulolanga wa muntu uwali nu kuya umwene uwa Ina Izlaeli.—1 Sam. 25:10, 11, 14.
ia ifwa 80 pala. 18
Umwanaci Uwacisile Ivintu na Mano
18 Abigelo waombiile pa ntazi nupya walenzile Davidi ukuti amwelele. Wamanyile ukuti iya wakwe wali umuwelewele wakwe vino izina lyakwe likapiliula. Nupya afwile waweni ukuti Davidi u wali umucindame nga wafulula Nabali u wali umuwelewele nga calenzile ukuti Davidi nawe kwene asulwe. Wataile Davidi uwaomviwanga na Yeova, nupya Abigelo wamanyile ukuti Davidi walwanga ‘ulwi wakwe Yeova.’ Fwandi Abigelo walangilile ukuti wamanyile ulayo uno Yeova walavile pali Davidi na pa wene wakwe lino watile: ‘Yeova . . . alakucita umwene uwa ina Izlaeli.’ Nupya Abigelo wacelwile Davidi ukuti atacita icili consi icali nu kulenga aye nu mulandu uwa wazi nanti icali nu kulenga ukuti asyale akusakamala, kuli kuti icali nu kulenga kampingu yamucuzya. (Belengini 1 Samueli 25:24-31.) Yaa yali amazwi asuma sana!
Ukuvwikisya Sana Ivyaya Umu Malembo
ia ifwa 80 pala. 16
Umwanaci Uwacisile Ivintu na Mano
16 Uzye cii cikupiliula ukuti Abigelo atacindiike insambu zino iya wakweti izyakutungulula? Awe foo; iusyini ukuti Nabali wacisile ivintu viipe uku mupakwe wakwe Yeova, nupya cii cali nu kulenga ukuti antu aingi amu ng’anda yakwe Nabali aali aakayele yafwe. Ndi cakuti Abigelo atacita vino wacisile, nga watungilile iviipe vino iya wacisile. Fwandi wasoolwilepo ukuvwila Leza ukucila ukuvwila iya.