Lino Adamu na Eva yafumile mu calo ca Edeni, yakweti ana aingi. Umwana wao uwa kutandikilako, Kaini wali umulimi, lyene umwana wakwe ciili, Abeli wali a kacema.

Wanda umwi Kaini na Abeli yapeezile malambo kuli Yeova. Uzye ilambo i cani? I caupe iciiyele. Yeova wapokeliile ilambo lino Abeli wapeezile, lelo atapokelile lyakwe Kaini. Cico calenzile ukuti Kaini asoke sana. Yeova wanenyile Kaini ukuti icipyu cakwe cali nu kulenga acite icipe. Lelo Kaini atuvwile.

Lyene, Kaini wanenyile Abeli ati: ‘Twapita umu mpanga.’ Lino yaali umu mpanga, Kaini walemile umwina wakwe nu kumukoma. Uzye Yeova wacisile uli pali vii? Yeova wafulwile Kaini kupitila mu kumuzinga ukufuma kuli ya lupwa yakwe. Kaini ataali nu kuya kuli ya lupwa yakwe nupya.

Uzye kuli vino tungasambililako? Limwi tungatandika ukuvwa uyi ndi cakuti ivintu vimwi visi wakwe vino tukwenekela. Ndi cakuti twalola ukuti itutandika ukuya ni cipyu—nanti yamwi yatuneena ukuti itutandika ukuya ni cipyu—tulinzile kusenuka zuwa zuwa pakuti cipyu citalenga tucite iviipe.

Pa mulandu wa kuti Abeli watemilwe Yeova nupya wacitanga ivisuma, Yeova acili akamwiusya. Lino Leza alalenga insi yonsi ukuya paladaise, alatuutulula Abeli.

Pa nsita imwi, antu yavuzile sana pano nsi. Aingi yacitanga iviipe. Na ya malaika yamwi kwene yatandike kucita iviipe. Yaafumile ukwi yulu kuno ikalanga nu kwiza pano nsi. Uzye watumanya umulandu uno iizile pano nsi? Yalondanga yakwate imiili ya untunze nu kutwala anaci.

Ya malaika yaatwazile anaci iyakwata na ana. Ana yayo yakuzile nu kuya sana na maka. Nupya yaatandike ukucuzya antu. Yeova ataazumilizye ukuti vintu vivyo vitwalilile. Fwandi wasoolwilepo ukuleta mulamba pakuti aonone antu aipe.

Nomba kwali umuntu umwi uwacitanga ivisuma. Watemilwe Yeova. Izina lyakwe wali a Nowa. Wakweti umuci na ana yatatu, amazina yao a Syemu, Hamu na Yafeti, nupya yonsi yakweti aci. Yeova wanenyile Nowa ukupanga iciwato icikulu muno wene nu lupwa lwakwe yaali nu kupusukila nga kwaya Mulamba Mukalamba. Ciwato, i cimbokosi cikulu icingeleela pa manzi. Nupya Yeova wanenyile Nowa ukwingizya inyama izingi mu ciwato pakuti nazyo kwene zipusuke.

Lilyo kwene sile Nowa watandike ukupanga iciwato. Papisile imyaka mupiipi na 50 pakuti Nowa nu lupwa lwakwe yamale ukupanga iciwato. Yaapanzile iciwato wakwe vivi kwene vino Yeova wayanenyile. Pa nsita iya, Nowa waneenanga antu pali Mulamba uwali nu kuyako. Nomba patali nanti awenga uuvwile.

Lyene, insita iya kwingila umu iciwato yafisile. Leka tulole ivyacitiike pa cisila.