Naipakizya Ukusambilila nu Kusambilizya Yauze Pali Yeova

VINO CALI PAKUTI NSAMBILILE PALI YEOVA

Pa cisila ca mwaka wa 1940, avyazi yane yatandike ukusambilila Baibo na ya Nte Yakwe Yeova. Nanti cakuti yatiile ukusambilila Baibo, ya mayo yatwalilile ukupokelela magazini wa Lupungu Lwa Mulinzi na Zyukini! Umu 1950 ya lupwa lwane yazumiile ukuyazanwako uku ukongano wa mpanga izingi uwayelile umu Musumba wa New York.

Patalengiile, Umwina Lolensi Jefulizi watandike ukututandalila. Watandike ukungazwa ukusambilila icumi. Pa kutandika nelenganyanga ukuti ya Nte Yakwe Yeova yalinzile ukuya umu vya miteekele nu kuti yalinzile ukwingila usilika ukucila ukulakana ukucitako ivintu vyonsi vii. Namunenyile inti ndi cakuti yonsi umu America yakana ukulwako inkondo alwani itu yangiza nu kutupoka impanga yonsi. Umwina Jefulizi wanteekelile nu kunguzya ukuti: “Uzye ukwelenganya ukuti i vyani vino Yeova Leza angacita ndi cakuti antu yonsi umu America yamuombelanga nupya alwani iza nu kuyazanza? Vino walanzile api lyasi lii na malyasi yauze vyangazwile ukulola ukuti vino nelenganyanga vitaali ningo. Na cico calenzile nalondesya ukusambilila icumi ca muli Baibo.

Nasumbanga insita ikulu ala nkubelenga Ulupungu Lwa Mulinzi na Zyukini! uwa mpiti wino ya mayo isile umu muputule wa pansi muno yakasungila iviya. Patalengiile, nilwike ukuti cino nasambililanga ali cumi fwandi nazumile ukusambilila Baibo nu Mwina Jefulizi. Nupya natandike nu kuzanwa umu kulongana lyonsi. Natemilwe vino nasambililanga nupya nizile inja kasimikila wi lyasi lisuma. Uyo wane wasenwike lino nizile imanya ukuti “Uwanda ukulu wakwe Yawe uli mupipi.” (Zefa. 1:14) Napingwilepo ukukanaya uku yunivesiti nu kutandika ukwazwa yauze ukusambilila icumi ca muli Baibo.

Namazile isukulu pa 13 Juni, 1956, nupya pa cisila ca manda yatatu nabatiziwe pa ukongano wa ciputulwa. Ntamanyile ukuti nali nu kupokelela ivintu ivingi visuma ukufuma kuli Yeova pa mulandu wakuti nasoolwilepo ukusambilila pali aliwe nu kusambilizyako yauze.

KUSAMBILILA NU KUSAMBILIZYAKO YAUZE PALI YEOVA MULI UPAINIYA

Lino papisile imyezi 6 ukufuma pano nabatiziwilwe, natandike upainiya. Mu Mulimo Witu wa Wene uwa mu Dizemba 1956 mwali icipande icatangi: “Uzye Mungaombelako Ukukalondekwa ya Kasimikila Aingi?” Nani kwene nali pa antu yano yuzizye iuzyo lilyo. Nalondanga ukuyaazwilizyako kuno kwali ya kasimikila ailyasi lisuma anono.—Mate. 24:14.

Nakukiile uku Edgefield, uku South Carolina. Umu cilongano icali kuku, mwali sile ya kasimikila 4. Lino naileko alino twaile ituya 5. Twalonganilanga umu muputule onga uwa mu ng’anda ya mwina umwi. Cila mwezi naombanga maawazi 100 umu mulimo wa kusimikila. Nali umupamviwe sana pano nene natungululanga ukukomaana kwa kuya umu mulimo alino nu kulanda malyasi mu cilongano. Ni cazifileko i cakuti lino naomba imilimo ya mu cilongano nasambililanga ivingi pali Yeova.

Umwanaci umwi wino nasambililanga nawe Baibo, wakweti ing’anda umu Johnston itauni ilyayelile umupipi. Wandemvile incito iya kuombako insita zimwi zimwi nu kutuzumilizya ukulalonganila umu kang’anda kanono.

Umwina Jolly Jefulizi, umwana wa mwina uwansambilizyanga Baibo wakuusile ukufuma uku Brooklyn, mu New York nupya twatandike ukuombela pamwi upainiya. Twikalanga umu kang’anda kano umwina umwi watwazime.

Kuno twikalilanga twafolanga sile impiya izinono. Pa wanda twakwatanga sile madola yaili nanti yatatu. Pa nsita imwi naomvizye impiya inono ino nasiile nayo ukukalila ivya kulya ni vintu vyuze ivyalondekwanga. Lino nafumanga umu syopu, umonsi umwi wanguzizye ati: “Uzye ukulonda incito? Ndakulipila dola wenga api awala lyonga.” Wampeezile manda yatatu akuzifya pano yakuulilanga. Nailoliile vino Yeova wangavwanga pakuti ntwalilile ukwikala umu Edgefield. Naile nu ku ukongano wa mpanga izingi umu 1958 uwayelile umu musumba wa New York.

Pa wanda wakwe ciili uwa ukongano, kwacitiike icintu cimwi icicindame sana. Twaloline na nkazi Ruby Wadlinitoni uwaombanga upainiya umu Gallatin, Tennessee. Pa mulandu wakuti swensi sweili twalondanga ukuya ya misyonali, twaile ituzanwako uku kukomaana kwa kuya ukwi Sukulu lya Gilyadi ukwaliko pa ukongano. Lino papisile insita twatandike ukulembezyanya makalata. Lyene yangamile ukuyalanda ilyasi lya ku yantu yonsi uku Gallatin. Lino naile uku Gallatin alino naile imuzya ndi cakuti tungatwalana. Lino wazumiile, nakukiile umu cilongano cino walimo nupya twatwaliine umu 1959.

KUSAMBILILA NU KUSAMBILIZYAKO YAUZE PALI YEOVA MU CILONGANO

Lino nali ni myaka 23, yansonsile ukuya umuomvi wa cilongano (wino ndakai yakaama ukuti kalemanya umwi umba lyakwe ya eluda) umu Gallatin. Icilongano citu, cali ali cilongano ca kutandikilapo ukutandalilwa nu mwangalizi wa ciputulwa Umwina Charles Thompson. Waomvile umulimo uu pa myaka iingi, lelo wanguzizye vino nelenganyanga pali vino aina yalondekwanga na pali vino angalizi yauze aaviputulwa yasakamalanga ivilongano. Kuli aliwe nasambilileko ukuti cazipa ukuzya mauzyo nu kwezya na maka ukumanya ivisinka vyonsi lino mutatala mwapingula pali vimwi.

Umu Mei 1964 yangamile ukuyazanwa ukwi Sukulu Lya Mulimo wa Wene uku South Lansing, ku New York pa mwezi onga. Aina aatungululanga isukulu lii yalenzile nsambilile ivingi pali Yeova nu kupalama kuli aliwe.

KUSAMBILILA NU KUSAMBILIZYAKO YAUZE PALI YEOVA MU MULIMO WA KUTANDALILA VILONGANO

Twatandike umulimo wa kutandalila ivilongano umu Januwale 1965. Iciputulwa ca kutandikilapo cino yatupeezile cali icikulu sana, catandikiile uku Knoxville, ku Tennessee ukuyafika umupipi nu ku Richmond, ku Virginia. Mwali ni vilongano ivya ku North Carolina, Kentucky, nu ku West Virginia. Natandalilanga sile ivilongano umwali atifi, pa mulandu wakuti pa nsita iya uku katutu ka United States, kwali isunde ilyakuti atifi yatange yalonganile pamwi na azungu. Aina yali aapiina fwandi twasambilile ukupeelako vino tukweti yano yakulondekwa uwazwilizyo. Umwina uwaomvile umulimo wa kutandalila ivilongano pa myaka iingi wansambilizye isambililo limwi ilicindame, watiile: “Ulinzile ukuya wa mwina. Nga watandalila ivilongano utalinzile ukucita ivintu wa ntunguluzi. Ungayazwa sile ndi cakuti yakukulola ukuti wewe mwinao.”

Lino twatandalile icilongano cimwi umwali ya kasimikila anono, mamane watandike ukusambilila nu mukazyana umwi umutwalwe uwali ni myaka 17 uwakweti umwana umukazyana uwa mwaka onga. Mamane watungululanga isambililo ukuomvya makalata ala pa nsita iyo umu cilongano mutaaya aliwensi aakatungulula isambililo. Umuku uze lino twatandalile icilongano cii, umukazyana wiyo wizanga lyonsi umu kulongana. Lino ya nkazi yaili ya painiya aiyele yayatumile ukuya umu kuombela umu cilongano cii yatwalilile ukusambilila nu mukazyana wiyo nupya patalengiile wabatiziwe. Lino papisile imyaka umupipi na 30, umu 1995, ala tuli pa Betele ya ku Patterson, nkazi wacance umwi wizile umu kulanda na mamane. Wali u mwana wa mukazyana wino mamane wasambilizyanga Baibo. Nkazi wii uwacance na iya izile ukwi Sukulu Gilyadi ilyalenga 100.

Ciputulwa cakwe ciili cino yatupeezile, cayelile pakasi ka mpanga ya Florida. Pa nsita ii twalondekwanga motoka, fwandi twakazile umwi pa mutengo usuma sana. Nomba patapisile nu mulungu, cimwi cononike muli injini. Tutaakweti ni mpiya izya kulungisizya. Namile umwina umwi wino nelenganyanga ukuti angatwazwa. Wanenyile umuomvi wakwe wenga ukutulungisizya motoka nupya atatulifizye. Walanzile sile ati: “Mutasakamala indipila.” Watupeezileko ni mpiya zimwi. Watulangilile inzila imwi ino Yeova akasakamalilamo aomvi yakwe. Ivyacitiike vyatwiwisyeko ukuti tulinzile ukuya na ukapekape kuli yauze.

Lyonsi lino twatandalila icilongano twikalanga umu mang’anda ya ina. Na cico calenzile ukuti tukwate ya cuza aingi aasuma. Wanda umwi nataipanga lipoti wa pa cilongano nupya nasiile ipepala papa kwene pali masyini wa kutaipila ukwaula ukumalila inja nu mukuomba. Lino nawezile manguzi, nizile inzana umwana umulumendo uwa myaka itatu uwa pa ng’anda kwene ino twikalangapo ala watatinika mabatani ya pali masyini wa kutaipila, ipepala lifuma. Fwandi natandike ukutaipa vyuze. Nomba pa myaka iingi namusekesyanga nu kumunena ukuti wangazwile ukumala ukutaipa lipoti.

Umu 1971, napokeliile kalata nupya napeezilwe umulimo wa kuya umwangalizi wa citungu umu Musumba wa New York. Twazungwike sana. Lino twakukiile kuku, nali sile ni myaka 34. Aina yampokeliile sana, nupya nali nene mwangalizi wa kutandikilapo umutifi.

Vino nali nene mwangalizi wa citungu, cila mulungu pa mpela ya mulungu naipakizyanga sana ukusambilizya antu pali Yeova pa ukongano wa ciputulwa. Angalizi ya viputulwa aingi yano naombanga nayo, yaomvile umulimo uu pa myaka iingi ukucila vino naomvile. Wenga pali yaa u walanzile ilyasi lya lubatizyo lino nabatiziwanga. Umwina muze u mwina Theodore Jaracz, uwizile aya umwi Umba Ilikatungulula. Pali na ina aingi aaombiile Yeova pa myaka iingi aombelanga pa Betele ya ku Brooklyn. Nali sana ni nsansa vino angalizi ya viputulwa na aombelanga pa Betele yalenzile nayuvwa umuntungwa lino nkuomba nayo. Nailoliile vino angalizi yaa yali nu kutemwa nu kusintilila api Izwi Lyakwe Leza alino nu kutungilila iuvi. Vino yali aicefye, cangangukiile ukuomba ningo umulimo uno napeezilwe.

NASWILILA UMU MULIMO WA KUTANDALILA IVILONGANO

Umu 1974, Iumba Ilikatungulula lyasoolwile iumba lyuze ilya yangalizi ya viputulwa ukuya angalizi ya vitungu, fwandi nali nu kutandika nupya ukuomba umulimo wa kutandalila ivilongano uku South Carolina. Pa nsita iya, ala aina azungu na atifi uku katutu ka United States yakalonganila pamwi nupya aina yali sana ni nsansa.

Uku kusila kwa mwaka wa 1976, yantumile ukuya umu kuombela umu ciputulwa ca Georgia pakasi ka musumba wa Atlanta na Columbus. Nkaiusya vino nalanzile ilyasi lya cililo ca yana 5 atifi afwile lino umwi osile ing’anda ino ikalangamo. Ya nyina ya yana yaa yali uku cipatala pa mulandu wakuti yacisike. Aina aingi atifi na azungu izanga uku cipatala uku kukomelezya avyazi yaa. Nailoliile vino aina na ya nkazi yalanganga ukutemwa. Ndi cakuti aomvi yakwe Leza yakulanga uluse lwa musango uu, cingazwa yauze ukuzizimizya intazi izitale sana.

KUSAMBILILA NU KUSAMBILIZYAKO YAUZE PALI YEOVA PA BETELE

Umu 1977 yatunenyile ukuya ku Betele ya Brooklyn pa myezi inono uku kuya azwilizyako umulimo umwi. Lino umulimo uwo wali apiipi nu kusila, amwi Umba Ilikatungulula yaili yangamile nu kunguzya ndi cakuti tungatemwa ukutwalilila ukuombela pa Betele. Twazumiile.

Pa myaka 24 naombelanga uku dipatimenti ya mulimo kuno ilingi aina yakaombela pa milandu itale sana. Pa myaka iingi, Iumba Ilikatungulula lyatwalilila ukutupeela utunguluzi uukauvwana ni visinte vya muli Baibo. Utunguluzi uu ukaazwilizya aakaombela kuli dipatimenti ya mulimo ukwasuka mauzyo alino nu kusambilizya angalizi ya viputulwa, ya eluda na ya painiya. Masambililo yaa yalenga antu ukulunduluka muli vyakwe Leza. Na cico calenga iuvi lyakwe Leza ukukomelako.

Ukufuma umu 1995 ukufika umu 2018, natandalila maofesi ya misambo ipusanepusane pano nali nene mwimilizi wa maofesi yakalamba wino mpiti yamanga ukuti mwangalizi akatandalila maofesi. Nakomaananga na mu makomiti ya misambo, aomvi ya pa Betele alino na ya misyonali pakuti njakomelezye nu kuyazwa muli vimwi vimwi vino vyayasakamikanga. Nupya vino aina na ya nkazi yatunenangako pali vino vyayacitikilanga, vyatukomelezyanga sana. Umu 2000 twaile uku Rwanda. Twakomeleziwe sana ukuvwa vino aina na ya nkazi na mu lupwa lwa pa Betele yapuswike lino kwali ukukomana kwa mitundu mu 1994. Aingi yafwililwe aatemwikwa yao. Asi mulandu ni vyayacitikilanga, aingi yali sana nu utailo, upaalilo alino nu luzango.

Ndakai tuli ni myaka ukucila pali 80. Pa myaka 20 naya muli komiti ya musambo uwa ku United States. Ntaile uku yunivesiti, lelo nasambilile masambililo aasuma sana ukufuma kuli Yeova nu kwi uvi lyakwe. Cii calenga nasambilizyako yauze icumi ca muli Baibo icingalenga yaye nu umi amanda pe. (2 Kol. 3:5; 2 Tim. 2:2) Nalola vino icumi ca muli Baibo cazwa antu aingi ukusenuka nu kuya na ucuza usuma na Kaumba wao. (Yako. 4:8) Nemo na mamane tukaezya na maka ukukomelezya yauze ukutwalilila ukulataizya api syuko lya kusambilila pali Yeova nu kusambilizyako yauze icumi ca muli Baibo, kuli kuti umulimo usuma uno umuomvi wakwe Yeova wensi angaombako.