Umu Wene Wakwe Leza ‘Umutende Ulayako Insita Yonsi’

Likwene sile Uwene Wakwe Leza uno ukalolelwa pa nsita itali uno Leza wimika ulaleeta umutende nu kulemana umu nsi yonsi. ‘Umutende ulayako insita yonsi’ wakwe vino Baibo yalaya pa Masamu 72:7. Nomba a lilaci lino Uwene ulatandika ukuteeka? Ulacita uli vivyo? Nupya mungacita uli pakuti mukaipakizye ivisuma vino uteeko uwo ulaleta?

UZYE UWENE ULIZA LILACI?

Baibo yasoowile ukuti kulaya ivintu vimwi ivya kuzungusya ivilacitika ivilalangilila ukuti Uwene Wakwe Leza uli umupipi. Ivintu vivyo vyonsi pamwi vilaya i “cilangililo,” nupya pa vintu vivyo pali ni nkondo zya mpanga, icipowe, malwala, ivilundumusi ivingi na antu aingi ukukanalondela masunde.—Mateo 24:3, 7, 12; Luka 21:11; Umbwilo 6:2-8.

Usesemo na uze ukalanda ukuti: “Iusya ukuti mu manda akusyalikizya mulaya tusita tutale. Antu yalaitemwa, atemwisya impiya, . . . yatalayela akwasi yao, yatalataizya, nupya yatalalonda vyauleza. Yene yatalaya nu luse na mizu, yene yalaya akwakwa, alwete nupya akakate. Yalapata visuma, . . . yalaya na mataki. Yene yalatemwa vyakuizanzya kuluta kutemwa Leza.” (2 Timoti 3:1-4) Lyonsi kukaya antu aya ni miyele ya musango uwo. Nomba ndakai antu aingi ali miyele ino yakweti.

Amausesemo yayo yatandike ukufikiliziwa umu 1914. Mu cumi antu akalemba pa malyasi ya mpiti, amanyikwa sana nupya acindame na ya kalemba yalandapo pali vino insi yasenuka ukufuma umu mwaka uwo. Kalemba wa malyasi ya mpiti Peter Munch uwa ku Denmark walemvile ati: “Inkondo iyaliko umu 1914 yali intandikilo ya kusenuka kwa vintu ukufuma pano umuntu waumbiilwe. Lino umwaka uwo utatala wafika antu yelenganyanga ukuti ivintu umu nsi vikuya vikuzipilako, . . . nomba alino insita yafisile iya mazanzo, ivintu iviipe ivya kutiinya nu lupato alino nu kukana cingililwa umu ncende zyonsi.

Nomba icazipako icakuti, ivintu vivyo ndi vyasila kulaya ivintu visuma ivya mutende. Vikalangilila ukuti ukuteeka kwa Wene kwati kupalama. Nupya Yesu walanzile na pa vintu ivisuma ivilaya icilangililo ca mpelelekezyo ya nsi, watiile: “Ni landwe lisuma lii lya Wene lilakosolwa mu nsi yonsi kuya umboni ku antu amu nko zyonsi, alino mpelelekezyo iliiza.”—Mateo 24:14.

Ilandwe lisuma lilyo ali mutwe ukalamba uno ya Nte Yakwe Yeova yakasimikilapo. Nupya ulupapulo lwao ulucindame lukaamwa ukuti Lupungu Lwa Mulinzi Ulukamanyisya Antu pa Wene Wakwe Leza. Lukazanwa umu ndimi ukucila pali 338, ilingi Ulupungu Lwa Mulinzi lukalanda pa vintu visuma vino Uwene Wakwe Leza ulacitila antu na vino ulacita pano nsi.

UZYE UWENE WAKWE LEZA ULATANDIKA ULI UKUTEEKA?

Mu casuko muli ni visinka vii 4 ivicindame:

1. Uwene wakwe Leza utalaomvyapo kateeka ali wensi muntunze.

2. Ya kateeka antunze yatalalonda ukuta ukuteeka nupya yalatandika ukulwisya Uwene Wakwe Leza.—Masamu 2:2-9.

3. Uwene Wakwe ulalondekwa ukonona mauteeko ya antu aalalonda ukutwalilila ukucuzya antu yauze. (Danieli 2:44; Umbwilo 19:17-21) Ulwi uu uwa nsi yonsi uwa kusyalikizya ulamwa ukuti Alamagedoni.—Umbwilo 16:14, 16.

4. Yonsi akaitemelwa ukuvwila Uwene Wakwe Leza yalakululwa pa Alamagedoni nu kwingila umu insi ipya iya mutende. Wakwe vino Baibo ikalanda, yalapanga “iumba ilikulu cuze” lino lilaya likukulilako sile.—Umbwilo 7:9, 10, 13, 14.

MUNGACITA ULI PAKUTI MUKAIPAKIZYE IVISUMA VINO UWENE ULACITA?

Icintu ca kutandikilako cino mulinzile ukucita pakuti muye umu Wene Wakwe Leza u kusambilila. Yesu wapefile kuli Leza ati: “Umi wa pe uwakuti antu yamanye wewe, Leza wenga sile uwa cumi, nga nu kumanya Yesu Klistu wino watumile.”—Yoane 17:3.

Lino antu yamanya Yeova Leza ukuti uwa cumi cumi, yakaipakizya ivintu ivingi. Lekini tulande sile pali viili: Icakutandikilako i cakuti, yakamutaila sana. Utailo uno yakakwata ukalenga yasininkizye ukuti Uwene Wakwe Leza u wa cumi cumi nupya wasya utandike ukuteeka. (Ayebulai 11:1) Cakwe ciili i cakuti, yakatandika sana ukutemwa Leza na antu yauze. Ukutemwa Leza u kukalenga yamuvwila mu kuitemelwa. Ukutemwa antu yauze nako kukayazwa ukuvwila isunde lyakwe Yesu ilyakuyacitila ivisuma lyonsi. Isunde lilyo lyatiile: “Vino mungatemwa kuti antu yamucitile avino namwe kwene mwayacitila.”—Luka 6:31.

Wakwe isi uwaya nu kutemwa, Kaumba witu akalonda ivintu ukutuzipila. Akalonda tukwate umi wa pe uno Baibo ikaama ukuti “uwa cumi.” (1 Timoti 6:19) Umi wa ndakai usi “wa cumi.” Antu aingi cuze umi wao watala sana nupya yakacuula pakuti yatwalilile ukuya nu umi. Pakuti mumanye vino umi “wa cumi,” waya elenganyini pa visuma vino Uwene Wakwe Leza ulacitila antu.