Ivingatwazwa Ukulauvwana na Antu Yauze

Mwaelela Auzo

“Twalililini . . . ukwelelana nanti cakuti umwi watakwata ica kuilizyanya pa muze.”—KOLOSE 3:13.

Swensi kwene tukaluvyanya. Tungaluvyanya yauze nanti yauze yangatuluvyanya. Cii cikupiliula ukuti swensi kwene tulinzile ukwelelana. Ndi cakuti twelela uwatuluvyanya, tukata ukusokela umuntu wiyo. ‘Tusiwezezya uyi pa uyi’ nupya tusitwalilila ukwiusya iviipe vino umuntu wiyo watucitile. (Loma 12:17) Nomba nga ndi cakuti umwi watusosizye sana nupya tukufilwa ukwilila kuli vino vyacitike? Nga caya vivyo, tulinzile ukulanda nu muntu wiyo umu mucinzi ala tuli sile swenga. Uyo witu ulinzile ukuya u kupanga umutende asi kulondeleya iviipe pakuti uwataluvyanya amanyikwe.—Loma 12:18.

Mwaicefya Nupya Mwaya nu Mucinzi

“Muye aicefye nu kulola ukuti yauze yamucila.”—FILIPI 2:3.

Ndi cakuti tuli aicefye nupya tuli nu mucinzi, antu yalaipakizya ukuzanwa naswe. Pano yalamanya ukuti twaaya ni cikuuku nupya tukalangulukilako, alino tutanga tuyasosye uku mufulo sile. Lelo nga tukuilola ukuti twacindama ukucila yauze nu kulacita ivintu ukulingana sile na vino tukulonda, tungapusana na antu yauze nu kuya na masakamika. Antu yangaatutaluka nupya tutanga tukwate ivyuza ivingi nanti sile ukukanakwata.

Mutaya na Kapatulula

“Leza atakwata kapaatulula, lelo umu nko zyonsi umuntu aakamutiina nu kucita ivisuma akapokelelwa kuli aliwe.”—MILIMO 10:34, 35.

Kaumba witu asilola ukuti antu yamwi yacindama ukucila yauze pa mulandu ni mpanga kuno yakaila, lulimi luno yakavwanga, vintu vino yakwata, nanti milolekele ya nkanda. “Umu muntu wenga amuno wapangiile antu amu nko zyonsi.” (Milimo 17:26) Fwandi tungati, antu yonsi sile yaya ulupwa longa. Ndi cakuti tukucindika antu yonsi nu kuya ni cikuuku kuli aliwo, tukayalenga ukuya ni nsansa, nupya naswe kwene tukaya sana ni nsansa, alino nu kuzanzya Kaumba witu.

Mwaya Afuuke

“Zwalini . . . ufuuke.”—KOLOSE 3:12.

Ndi cakuti tuli afuuke, antu yatalaatutiina. Citalayatalila ukulanda naswe nupya citalayatalila ukutulungika, pano ala iyamanya ukuti tusikuyasokela. Nupya umwi nga watusokela, ndi cakuti tuli afuuke tungalenga awezyeko umwenzo. Pa Mapinda 15:1 pakati: “Ukwasuka luse luse kukamala icipyu, lelo akasa kakakatusya ukali.”

Mwaya na Ukapekape Nupya Mwataizya

“Mu kupeela mwaya insansa izingi ukucila izyaya umu kupokelela.”—MILIMO 20:35.

Antu aingi ndakai yaya na ukaitemwe nupya yakalonda sile ivingayazipila. Lelo aya na ukapekape aakaya ni nsansa zya cumicumi. (Luka 6:38) Antu aya na ukapekape yakaya ni nsansa pano yatemwa sana antu yauze ukucila ivikwatwa. Nupya ukutemwa kwene kuko ukukalenga ukuti yataizya nu kulanga ukuti iyatemwa ndi cakuti umwi ali na ukapekape kuli aliwo. (Kolose 3:15) Yuzyini mweineco muti, ‘U muntu wa musango ci wino ningatemwa ukulazanwa nawe, pali wino ataya na ukapekape nupya aasitaizya nanti uwaya na ukapekape nupya aakataizya?’ I cani icikulandwapo paa? Mwacitila antu yauze vino mungatemwa namwe yamucitile.—Mateo 7:12.