LINO IVINTU IVIPISYE VIKUCITIKA MUNO NSI

4 | Mwatwalilila Ukuya nu Upaalilo

Ukome UMULANDU UNO CACINDAMILA

Ukusakamikwa pa mulandu ni viipe ivikacitika muno nsi, kungalenga antu yataya nu umi usuma nu kulwala mu melenganyo. Aingi yano ivintu vya musango uu vikacitikila yasielenganyapo ukuti ivintu vilazipa uku nkoleelo. I vyani vino yakacita?

Yamwi yasilonda nu kwelenganyapo pa vilacitika uku nkoleelo.
Yauze nayo yakamwa uwengwa nanti ukuomvya imilembo ikavulunganya uwongo ala yakwelenganya ukuti masakamika yao yangasila.
Yamwi nayo yakayuvwa ukuti umi utacindama, fwandi yakaelenganya ukuti cazipa sile nu ukufwa ukucila ukuya nu umi.

Vino Mulinzile Ukumanya

Intazi zimwi, limwi zingaya izya pa nsita inono nupya ivintu vingazipa ukwaula nu kwenekela.
Nanti icakuti intazi zimwi zingatwalilila, kuli vintu vino mungacita pakuti mutwalilile ukuzizimizya.
Muli Baibo mwaya ulayo wakuti uku nkoleelo intazi zyonsi zilasila.

Vino Mungacita

Baibo ikati: “Mutaasakamala pa vya wanda ulondelilepo, pano cila wanda waikwatila masakamika. Mwaelenganya sile pa ntazi zya wanda wi lelo.”—Mateo 6:34.

Mwaika amano pa wanda kwene uwo. Mutasakamala pa vya ku nkoleelo icakuti mufilwa ukuomba ni milimo ikulondekwa pa wanda uwo.

Ukusakamala pa vintu vino vitaatala vyacitika, kungalenga mulwale amasakamika, nupya kungalenga na vino mukapaalila ku nkoleelo ukononeka.

VINO MUNGAZIZIMIZYA—Kupanda Mano Ukungamwazwa

MWAIKA AMANO APA VISUMA

Baibo ikati: “Amanda ya muntu umucuzi yonsi kwene yakaya aipe. Lelo umwenzo wa luzango ukailyokezya insita zyonsi.” (Mapinda 15:15) Ndi cakuti mwika sile amano ku viipe, cingamutalila ukumanya ivya kucita ku ntanzi ino mukweti. Lelo ukwelenganya pa visuma kungamwavwa ukucimvya intazi.

Mwacefyanya insita ino mukauvwa ku malyasi apa milabasa
Cila wanda, mwatantika ivintu viili nanti vitatu vino mungalangilamo ukutaizya.
Cila wanda mwalemba vino mukulonda kuomba mu wanda uwo. Mwaankanya milimo ya kuomba cila wanda pakuti uwanda nga wasila imulola vino mwaomba.

MWALENGA UKUTI YAUZE YAMWAZWE

Baibo ikati: ‘Umuntu uwatemwa ukwikala wenga, ukumupanda amano, konsi kukamuletela icipyu.’ (Mapinda 18:1) Utanga uifumile mu ciwina cizike wenga, suka pali umwi uwa ku kwazwilizya.

Mwalenga ya lupwa nanti ya cuza inu ukuti yamwazwilizyeko
Namwe kwene mwalola inzila zino mungazwilamo yauze. Nga mukwazwilizya yauze cilalenga mukazizimizya intazi zino mwakwata.
Nga mukuvwa ukuti ivintu vitalazipapo nu kuti umi utacindama, cingazipa ukuya uku cipatala. Insita zimwi ukuyuvwa ukuti mutacindama kungalenga mulwale amasakamika. Aingi nga yaaya uku cipatala yakayazwa.a

a Zyukini! wii asikulanda pa nzila zya mipozezye izili zyonsi.

Baibo Ikapeela Upaalilo wa Cumi

Kalemba wa Masamu umwi wapefile kuli Leza ati: “Amazwi yako ali lampi ilya kuntungulula, nupya ali luswepo lwa kunkozezya inzila yane.” (Masamu 119:105) Lolini ivyalondelelapo ivyalenga tusininkizye ukuti Baibo yaya wi lampi nupya wa luswepo.

Lampi ikatwazwa ukulola muno tukupita umu nsita ya usiku. Vikwene avino caya nu ku mazwi ya mano aya muli Baibo, yangatutungulula lino tukulondekwa ukupingula pa vintu vimwi ivitale.

Vivi kwene vino luswepo lukatukozezya ukuti tulole ivili pa nkoleelo, aali vino na Baibo ikaatwavwa ukumanya ivilacitika uku nkoleelo.

Baibo i buku lya muzilo, isilanda sile pali vino umi watandike lelo ikalanda na pa upaalilo wa cumi na pali vino vilacitika uku nkoleelo. Lolini vino Baibo ikalanda:

Vino ukucula kwatandike

Baibo ikati: “Wakwe vino uluyembu lwingilile umu muntu wenga pano nsi alino ni mfwa nayo ingilile umu luyembu, ali cino imfwa yasalanganila uku yantu yonsi pa mulandu wa kuti yonsi yayembwike.”—Loma 5:12.

Umulandu uno ucuzi utasilila

Kwaya umulandu uwalenga ukuti antunze yatamala intanzi. Baibo ikati: “Kusi umuntu uwakwata amaka apa umi wakwe.” (Yelemiya 10:23) Nga twalola ivikacitika umu nsi tukasininkizya icisinka cii.

Vino Leza alacita pa kumala intazi

Baibo ikati: “Alayakumbula aminsozi yonsi, kutalaya imfwa, kutalaya ukuloosya nanti ukulila nanti ukuvwa ukuwaika. Ivintu vya mpiti vyativipita.”—Kusokolola 21:4.