Jerbal
9 Bõtab ear jab bõjrak an Saul kõn̦aan kaeñtaan im m̦an ri-kal̦oor ro an Irooj. Kõn men in, ear etal ñan ippãn bũrij l̦apl̦ap eo 2 im kajjitõk bwe en jeje lõta ñan im̦õn kabuñ ko ilo Damaskõs, bwe en maroñ kalbuuji jabdewõt eo ej loe me ej uwaan Ial̦ Eo im bõktoke ñan Jerusalem, em̦m̦aan im kõrã jim̦or.
3 Ke ear etal ilo ial̦ eo an l̦o̦k im epaakel̦o̦k Damaskõs, juon meram jãn lañ ear wal̦o̦ktok ilo jidimkij im rome aolepen pel̦aakin, 4 im ear buñ n̦a ioon bwidej im ear roñ an juon ainikien ba ñane: “Saul, Saul, etke kwõj kaeñtaan eõ?” 5 Im ear kajjitõk im ba: “Irooj, wõn kwe?” Ear uwaak: “Ña Jesus, eo kwõj kaeñtaane. 6 Bõtab kwõn jerkak im iwõj ñan jikin n̦e im̦aan, im naaj kwal̦o̦k ñan kwe ta eo kwõj aikuj kõm̦m̦ane.” 7 Em̦m̦aan ro rar itok ippãntok rar jutak ijo im ikõñ, rar bar roñ ainikien eo bõtab ejjel̦o̦k armej en̦ rar loe. 8 Saul ear jutak jãn lal̦, im meñe epel̦l̦o̦k mejãn bõtab ejjel̦o̦k jabdewõt men en̦ emaroñ loe. Kõn men in, rar jibwe pein im tõle l̦o̦k ñan Damaskõs. 9 Innem ium̦win jilu raan, ear jab maroñ lo jabdewõt, im ear jab m̦õñã im idaak.
10 Ekar wõr juon ri-kal̦oor ilo Damaskõs etan Anenaiõs, im Irooj ear ba ñane ilo juon pijen: “Anenaiõs!” Im ear ba: “Ña e Irooj.” 11 Innem Irooj ear ba ñane: “Kwõn jutak im etal ñan ial̦ eo etan Jim̦we, im etal ñan m̦weo im̦õn Judas im pukote juon em̦m̦aan in Tarsus etan Saul. Ej jar ilo tõre in, 12 im ear lo juon em̦m̦aan etan Anenaiõs ilo juon pijen, ej del̦o̦ñl̦o̦k ñan ippãn im likũt pein ioon bwe en bar lol̦o̦kjen̦.” 13 Bõtab Anenaiõs ear uwaak im ba: “Irooj, iar roñ jãn elõñ armej kõn em̦m̦aan in, im kõn aolep men ko renana ear kõm̦m̦ani ñan ri-karejar ro am̦ rekkwõjarjar ilo Jerusalem. 14 Ear itok ñan ijin im ewõr an mãlim jãn bũrij ro reutiej ñan kalbuuji* aolep ro rej kũr ãt eo etam̦.”* 15 Bõtab Irooj ear ba ñane: “Kwõn etal, kõnke iar kããlõt em̦m̦aan in bwe en kwal̦o̦k kõn ãt eo eta ñan ri-aelõñ ko im kiiñ ro im ro nejin Israel. 16 Inaaj kaalikkar ñane aolep men ko ej aikuj eñtaan kaki kõn wõt ãt eo eta.”
17 Kõn men in, Anenaiõs ear ilo̦k im del̦o̦ñ ilo m̦weo, im ear likũt pein ioon Saul im ba: “Saul, jatũ, Irooj Jesus, eo ear wal̦o̦k ñan kwe ilo ial̦ eo am̦ tok, ear jilkintok eõ bwe kwõn maroñ in bar lol̦o̦kjen̦ im obrak kõn jetõb kwõjarjar.”* 18 Ilo iien eo wõt, jet men ãinwõt kilin ek rar wõtlo̦k jãn mejãn, im ear maroñ bar lol̦o̦kjen̦. Innem ear jutak im ear etal im peptaij, 19 im ear m̦õñã im kajoorl̦o̦k.
Ear pãd ium̦win jejjo raan ippãn ri-kal̦oor ro ilo Damaskõs, 20 im ear kajju ilo̦k im kwal̦o̦k ilo im̦õn kabuñ ko bwe Jesus ej Nejin Anij. 21 Bõtab aolep ro rar roñ an kõnnaan rar l̦o̦kjenaer im rar ba: “Ejjab ke em̦m̦aan eo in ear ko̦kkure ro ilo Jerusalem im rej kũr ãt in?* Ejjab ke unleplep in an itok ñan ijin ej bwe en kalbuuji er im bõkl̦o̦k er* ñan bũrij ro reutiej?” 22 Bõtab Saul ear kajoorl̦o̦k wõt im ear kabwilõñ im kajooke ri-Ju ro rej jokwe ilo Damaskõs ilo an kar lukkuun kam̦ool ñan er bwe Jesus ej Christ.
23 Elõñ raan tokãlik, ri-Ju ro rar pepe ippãn doon ñan m̦ane, 24 bõtab Saul ear jel̦ã kõn pepe in aer. Bareinwõt, rar lukkuun waje kõjãm ko ilo wõrwõr eo an jikin eo raan im boñ bwe ren jibwe im m̦ane. 25 Kõn men in, ke ear boñ ri-kal̦oor ro rar bõke im doorlal̦l̦o̦k ilo juon iep jãn juon jikin epel̦l̦o̦k ilo wõrwõr eo.
26 Ke ear tõparl̦o̦k Jerusalem, ear kajjioñ kobal̦o̦k ippãn ri-kal̦oor ro bõtab er aolep rar mijake kõnke rar jab tõmak bwe e juon ri-kal̦oor. 27 Kõn men in, Barnebas ear itok im jipañe im bõkl̦o̦ke ñan ippãn rijjilõk ro, im ear lukkuun kõmel̦el̦eik er kõn an kar Saul lo Irooj ilo ial̦ eo an, im bwe Irooj ear kõnnaan ñan Saul, im kõn an kar kõnnaan ilo peran kõn etan Jesus ke ear pãd ilo Damaskõs. 28 Innem ear pãdwõt ippãer im ear itoitak ekkar ñan an kõn̦aan* ilo Jerusalem im kõnnaan ilo peran kõn etan Irooj. 29 Ear kõnnaan im kõbo̦uwe ippãn ri-Ju ro rej kõnono kajin Grik, bõtab rein rar kajjioñ in m̦ane. 30 Ke rũttõmak ro rar jel̦ã kõn men in, rar bõkl̦o̦ke ñan Seseria im jilkinl̦o̦ke ñan Tarsus.
31 Innem ear wõr aenõm̦m̦an ilo eklejia eo ilo aolepen Judia im Galili im Sameria. Rũttõmak ro rar kajoorl̦o̦k, im kõn aer mour ilo aer mijak Jeova* im kõn jipañ eo jãn jetõb kwõjarjar,* ear lõñl̦o̦k wõt uwaaer.
32 Ke Piter ear itoitak ilo aolepen jikin eo, ear bar jibadekl̦o̦k ro rekkwõjarjar* ilo Lidda. 33 Innem ekar lo juon em̦m̦aan ijo etan Aeneas, eo ejaje m̦akũtkũt im ralitõk de iiõ in an babu wõt ioon kinien. 34 Piter ear ba ñane: “Aeneas, Jesus Christ ej kõmour eok. Kwõn jerkak im limi men n̦e kiniem̦.” Innem ear m̦õkaj im jerkak. 35 Aolep ro rar jokwe ilo Lidda im Saron rar loe em̦m̦aan in, im rar oktak ñan Irooj.
36 Ekar wõr juon ri-kal̦oor ilo Joppa etan Tabita, mel̦el̦ein ãt in ñe jej ukote ej, “Dorkas.”* Kõrã in ear juon eo elõñ jerbal ko rem̦m̦an ear kõm̦m̦ani im ekõn lel̦o̦k m̦weien tũriam̦o ñan ro jet. 37 Bõtab ilo kar tõre kein, ear nañinmej im ear mej. Kõn men in, rar katutuuki ãnbwin eo im kõbabuuki ilo juon ruum̦ ilõñ. 38 Lidda ear pãd iturin Joppa, im ke ri-kal̦oor ro rar roñ bwe Piter epãd ie, rar jilkinl̦o̦k ruo em̦m̦aan ñan ippãn bwe ren akwel̦ap ñane im ba: “Kwõn m̦õkaj im itok ñan ippem.” 39 Kõn men in, Piter ear jutak im etal ippãerl̦o̦k. Im ke ear tõparl̦o̦k ijo, rar bõkl̦o̦ke ñan ruum̦ eo ilõñ im aolep kõrã ro emej l̦õm̦aro pãleer rar itok ñan ippãn bõtab rej jañ im kwal̦o̦k ñane nuknuk im kopã ko wõj Dorkas ear kõm̦m̦ani ke ear pãd ippãer. 40 Im Piter ear kadiwõj aolep armej ro, im ear bukwelõlõ im jar, innem ear oktakl̦o̦k ñan ãnbwin eo im ba: “Tabita, kwõn jerkak!” Innem kõrã eo ear kõpel̦l̦o̦k mejãn, im ke ear lo Piter, ear jerkak. 41 Im Piter ear lel̦o̦k pein im kajutake, im ear kũrtok ro rekkwõjarjar* im kõrã ro emej l̦õm̦aro pãleer im kwal̦o̦k ñan er bwe emour. 42 Ennaan eo kõn men in ear ajeededl̦o̦k ilo aolepen Joppa, im elõñ rar erom rũttõmak an Irooj. 43 Innem Piter ear pãd ilo Joppa ium̦win elõñ raan ippãn Saimõn, juon eo ej kõjerbal kilin menninmour ñan kõm̦m̦an elõñ men.*