Jon
11 Ekar wõr juon em̦m̦aan ear nañinmej etan Lazerõs. Em̦m̦aan in ej jãn Betani, ejja bukwõn eo wõt an Meri im lio jein, Marta. 2 Eñin Meri, eo ear kapit Irooj kõn juon weil̦ eñaj im kõm̦õrãik neen kõn kool̦an bõran. Kõrã in ej jein Lazerõs, l̦eo enañinmej. 3 Kõn men in, kõrã rein jein rar ijjilõkl̦o̦k ennaan ñane im ba: “Irooj, eo kwõj yokwe enañinmej.” 4 Ak ke Jesus ear roñ men in, ear ba: “Jem̦l̦o̦k eo enaaj wal̦o̦k jãn nañinmej in ejjab mej, bõtab ej ñan aiboojoj eo an Anij, im aiboojoj eo an Nejin Anij.”
5 Jesus ear yokwe Marta im Meri im Lazerõs. 6 Bõtab ke ear roñ bwe Lazerõs enañinmej, ear pãdwõt ijo ear pãd ie ium̦win bar ruo raan. 7 Innem ãlikin men in, ear ba ñan ri-kal̦oor ro an: “Jen bar etal ñan Judia.” 8 Ak ri-kal̦oor ro rar ba ñane: “Rabbai,* ej kab m̦õj l̦o̦k an ri-Judia ran̦ itõn kad eok ñan mej ak kwõj bar etal ñan ijen̦ ke?” 9 Jesus ear uwaak im ba: “Ta ejjab 12 awa in an meram ilo juon raan ke? El̦aññe jabdewõt ej etetal ilo iien an meram, eban tũbbo̦k ilo jabdewõt men kõnke ej lo meramin lal̦ in. 10 Bõtab el̦aññe jabdewõt ej etetal ilo boñ, enaaj tũbbo̦k kõnke ejjel̦o̦k meram ilo e.”
11 Ãlikin an ba men kein, ear ba: “Jerad Lazerõs ej kiki, ak ij jibadekl̦o̦k bwe in ko̦ruji.” 12 Kõn men in, ri-kal̦oor ro rar ba ñane: “Irooj, el̦aññe ej kiki, enaaj em̦m̦anl̦o̦k an mour.” 13 Rar l̦õmn̦ak ej kõnnaan kõn an kiki im kakkije, ak Jesus ear kõnnaan kõn an mej. 14 Innem Jesus ear kaalikkarl̦o̦k ñan er im ba: “Lazerõs emej, 15 ak ij lañlõñ bwe iar jab pãd ijen̦ kõnke men eo ij pojakin kõm̦m̦ane enaaj kõkajoorl̦o̦k tõmak kan̦e ami. Kõn men in, jen etal ñan ippãn.” 16 Tomas, eo rekõn ãñinñini im ba Bo eo,* ear ba ñan ri-kal̦oor ro jet im ba: “Jen bar etal bwe jen mej ippãn Jesus.”
17 Innem ke Jesus ear tõparl̦o̦k ijo, ear lo bwe el̦o̦k de emãn raanin an Lazerõs pãd ilo lõb.* 18 Epaak in Betani ñan Jerusalem ej enañin ruo m̦ail̦, 19 im elõñ ri-Ju rar itok ñan ippãn Marta im Meri bwe ren kaenõm̦m̦an erro kõnke emej l̦eo jatierro. 20 Ke Marta ear roñ bwe Jesus ej itok, ear etal im wõnm̦aiki, ak Meri ear pãdwõt* ilo m̦weo im̦weer. 21 Innem Marta ear ba ñan Jesus: “Irooj, el̦aññe kwaar pãd ijin, jatũ eban kar mej. 22 Bõtab ij tõmak wõt bwe jabdewõt men kwõj kajjitõk kake ippãn Anij, enaaj lewaj ñan kwe.” 23 Im Jesus eba ñane: “Jatũm̦ enaaj bar mour.” 24 Im Marta ear ba ñane: “Ijel̦ã bwe enaaj bar mour ilo iien jerkakpeje eo ilo raan eo ãliktata.” 25 Innem Jesus eba ñane: “Ña jerkakpeje eo im mour eo. Jabdewõt eo ej kwal̦o̦k an tõmak ilo ña, meñe enaaj mej ak enaaj bar mour, 26 im aolep ro rej mour im kwal̦o̦k aer tõmak ilo ña rejjãmin mej. Kwõj ke tõmak men in?” 27 Innem Marta ear ba: “Aet Irooj, ij tõmak bwe kwe Christ Nejin Anij, eo kar kanaan bwe enaaj itok ñan lal̦ in.” 28 Ãlikin an ba men in, ear etal im kũrtok Meri, lio jatin, im ear wũnojidikdikl̦o̦k ñane im ba: “Ri-Kaki epãd ijin im ej kajjitõk eok.” 29 Meri ej roñ wõt men in ak ekajju jutak im ilo̦k ñan ippãn Jesus.
30 Jesus ejjañin kar del̦o̦ñl̦o̦k ñan bukwõn eo, ak ear pãdwõt ijo Marta ear iioone ie. 31 Ke ri-Ju ro me rar pãd ilo m̦weo im kaenõm̦m̦ane Meri rar lo an kajju jutak im diwõjl̦o̦k, rar l̦oorel̦o̦k kõnke rar l̦õmn̦ak bwe ej etal in jañ ilo lõb* eo. 32 Innem ke Meri ear tõparl̦o̦k ijo Jesus ej pãd ie im ej loe, ear bukwelõlõ iturin neen im ba: “Irooj, el̦aññe kwaar pãd ijin, jatũ eban kar mej.” 33 Ke Jesus ear lo an jañ im an ri-Ju ro rar itok ippãntok bar jañ, ejino eddotok bũruon im ear bũrom̦õj. 34 Im ear ba: “Ia eo kom̦ar likũti ie?” Innem rar ba: “Irooj, itok im lale.” 35 Innem Jesus ear jañ. 36 Kõn men in, ri-Ju ro rar jino ba: “Lale m̦õk joñan an lukkuun yokwe Lazerõs!” 37 Bõtab jet iaaer rar ba: “Em̦m̦aan eo n̦e ear kõm̦m̦an bwe l̦eo ear pilo en bar lol̦o̦kjen̦. Ta ejjab maroñ kar kõm̦m̦an bwe Lazerõs en jab mej ke?”
38 Ãlikin an kar bar eddotok bũruon Jesus, ear etal ñan lõb* eo. Ilo m̦ool, lõb eo ej juon ro̦ñ im em̦õj pinej mejãn kõn juon dekã kileplep. 39 Jesus ear ba: “Kom̦win kõm̦akũtl̦o̦k dekã n̦e.” Bõtab Marta, lio jein l̦eo emej, ear ba ñane: “Irooj, joñan in ewõr bwiin kõnke el̦o̦k de emãn raan.” 40 Ak Jesus eba ñane: “Iar jab ba ñan kwe ke bwe el̦aññe kwõj tõmak innem kwõnaaj lo aiboojoj eo an Anij?” 41 Kõn men in, rar kõm̦akũtl̦o̦k dekã eo, innem Jesus ear reilõñl̦o̦k ñan lañ im ba: “Jema, ij kam̦m̦oolol eok kõn am̦ kar eo̦roñ eõ. 42 Ijel̦ã bwe kwõj eo̦roñ eõ iien otemjej, bõtab ij ba men in kõnke armej rein ijin ren tõmak bwe kwaar jilkintok eõ.” 43 Ãlikin an ba men kein, ear kõl̦l̦aaj ainikien im ba: “Lazerõs, kwõn diwõjtok!” 44 Innem l̦eo ekar mej ear diwõjtok ak em̦õj kũtimi neen im pein im mejãn kõn m̦õttan nuknuk. Im Jesus ear ba ñan er: “Kom̦win jel̦ati m̦õttan nuknuk kan̦e jãn ippãn im kõtl̦o̦ke.”
45 Kõn men in, elõñ iaan ri-Ju ro me rar itok ippãn Meri im lo men eo Jesus ear kõm̦m̦ane rar likũt aer tõmak ilo e. 46 Bõtab jet iaaer rar etal ñan ippãn Parisi ro im ba ñan er men eo Jesus ear kõm̦m̦ane. 47 Kõn men in, bũrij ro reutiej im Parisi ro rar ko̦kweilo̦ktok ro uwaan Im̦õn Ekajet eo El̦ap an ri-Ju* im rar ba: “Ta eo jenaaj kõm̦m̦ane kiiõ ke elõñ menin bwilõñ* ko em̦m̦aan in ej kõm̦m̦ani? 48 El̦aññe jej kõtl̦o̦k an wõnm̦aanl̦o̦k wõt, er aolep renaaj likũt aer tõmak ilo e im ri-Rom ro renaaj itok im bõk ijin jikid* im aelõñ in ad.” 49 Bõtab juon iaaer etan Keiapas, eo ej bũrij l̦apl̦ap ilo iiõ eo, ear ba ñan er: “Ejjel̦o̦k men en̦ kom̦ jel̦ã ñan jidik. 50 Kom̦ij jab kile ke bwe enaaj em̦m̦anl̦o̦k ñe juon wõt armej enaaj mej kõn aolep, ijello̦kun an aelõñ in ad jako?” 51 Naan kein ear ba rar jab itok jãn e make, bõtab kõnke ej bũrij l̦apl̦ap ilo iiõ eo, ear kanaan bwe Jesus enaaj mej kõn ri-Ju ro, 52 im ejjab kõn ri-Ju ro wõt ak bareinwõt bwe en aintok ro nejin Anij me rar ejjeplõklõk bwe ren juon wõt. 53 Innem jãn raan eo m̦aanl̦o̦k, rar pepe in m̦ane.
54 Kõn men in, Jesus ear jab bar itoitak ilo̦bwilej ibwiljin ri-Ju ro, bõtab ear etal jãn ijo im ilo̦k ñan juon bukwõn etan Ipreim im ej pãd ilo jikin eo iturin ãne jem̦aden. Innem ear pãd ijo ippãn ri-kal̦oor ro. 55 Kiiõ, ear epaaktok iien Kwõjkwõjin Kijoone eo an ri-Ju ro, im elõñ armej jãn aolepen ãneo rar etal ñan Jerusalem bwe ren karreoik er ekkar ñan Kien Moses m̦okta jãn kwõjkwõj eo. 56 Innem rar pukote Jesus, im ke rar pãd ilo tampel̦ eo, rar kõnnaan ñan doon im ba: “Ta m̦ool ke elukkuun ban itok ñan kwõjkwõj in ke? Ta ami baj l̦õmn̦ak?” 57 Bõtab bũrij ro reutiej im Parisi ro rar kakien bwe ñe ewõr en̦ ejel̦ã ia eo Jesus ej pãd ie, ej aikuj kõjjel̦ãikl̦o̦k er bwe ren ilen jibwe.*