Jerbal

13 Ilo eklejia eo ilo Antiok, ear wõr ri-kanaan im ri-katakin. Etaer ej Barnebas, Simeon, eo rej ãñinñini im ba Naijer, Lusiõs jãn Sairine, Meneen, eo im erro Herod, ri-tõl eo, rar jikuul̦ ippãn doon, im Saul. 2 Ke rar jerbal ñan Jeova* im jitlo̦k, jetõb kwõjarjar* ear ba: “Kom̦win kõjenolo̦k Barnebas im Saul ñan ña kõnke em̦õj aõ kããlõt erro bwe ren kõm̦m̦ane juon jerbal.” 3 Im ãlikin aer jitlo̦k im jar, rar likũt peier ioerro im jilkinl̦o̦k erro.

4 Innem l̦õm̦arein me jetõb kwõjarjar* ear jilkinl̦o̦k er rar wanlal̦l̦o̦k ñan Silisia, im jãn ijin rar jerakl̦o̦k ñan Saiprõs. 5 Ke rar tõparl̦o̦k bukwõn eo etan Salemis, rar kwal̦o̦k kõn naanin Anij ilo im̦õn kabuñ ko an ri-Ju ro. Jon ear pãd ippãerro im ear rijjipañ ñan erro.

6 Rar etal ilujenl̦o̦k aolepen ãneo im ke rar tõparl̦o̦k Pepos, rar iioone juon ri-Ju etan Bar-Jesus, l̦ein ej juon ri-anijnij im ri-kanaan riab. 7 Ear pãd ippãn kom̦ja* eo etan Serjiõs Paulõs, juon em̦m̦aan eo emãlõtlõt. Kom̦ja in ear kũrtok Barnebas im Saul kõnke ear lukkuun kõn̦aan roñjake naanin Anij. 8 Bõtab Elimas ri-anijnij eo (mel̦el̦ein etan ñe jej ukote ej ri-anijnij) ear jino jum̦aik er. Ear kajjioñ bõbraiki kom̦ja* eo bwe en jab tõmak. 9 Saul, ãt eo juon Paul, ear obrak kõn jetõb kwõjarjar,* im ear lukkuun kalimjeke l̦eo 10 im ba: “Koobrak kõn aolep kain etao im aolep kain nana, kwe nejin Tepil̦, im kwõj dike aolep men ko rewãnõk. Etke kwõjjab bõjrak jãn am̦ ukot ial̦ ko rejim̦we an Jeova?* 11 Roñjake m̦õk! Pein Jeova* enaaj buñ ioom̦ im kwõnaaj pilo, im kwoban lo meramin al̦ m̦ae bar juon iien.” Innem em̦õkaj an tab im marok mejãn l̦eo, im ear etetal im kajjioñ kappok armej bwe ren jibwe pein im tõle. 12 Ke kom̦ja* eo ear lo men in, ear erom rũttõmak kõnke ear kanooj in bwilõñ kõn katak ko an Jeova.*

13 Kiiõ Paul im ro m̦õttan rar jerak jãn Pepos im pol̦o̦k ilo Perga, ilo Pampilia. Bõtab Jon ear ilo̦k jãn er im jepl̦aak ñan Jerusalem. 14 Innem rar wõnm̦aanl̦o̦k wõt jãn Perga im etal ñan Antiok ilo Pisidia, im ilo raanin Jabõt* rar etal ñan im̦õn kabuñ eo im jijet. 15 Ke ear m̦õj riiti Kien eo im naan ko an ri-Kanaan ro, em̦m̦aan ro rej bõk eddon im̦õn kabuñ eo rar ijjilõkl̦o̦k ennaan ñan erro im ba: “Em̦m̦aan ran̦ jeim im jatim, ñe kom̦ kõn̦aan kwal̦o̦k jabdewõt naanin rõjañ ñan armej rein, kom̦win kwal̦o̦k.” 16 Kõn men in, Paul ear jutak im ear kõkal̦l̦e kõn pein bwe en bõjrak aer kõnono, im ear ba:

“Em̦m̦aan in Israel ran̦ im kom̦ ro jet kom̦ij mijak Anij, kom̦win roñjake. 17 Anij eo an ri-Israel ear kããlõt ro jim̦m̦aad im ear kõm̦m̦an bwe ren juon aelõñ ekajoor ke rar mour ãinwõt ruwamãejet ilo Ijipt, im ear kadiwõjl̦o̦k er kõn pein ekajoor. 18 Im ium̦win enañin 40 iiõ, ear kijenmej ippãer ilo ãne jem̦aden. 19 Innem ãlikin an kar ko̦kkure aelõñ ko jimjuon ilo Kenan, ear ajeje ãneo ñan er bwe en aer jolõt. 20 Aolep men kein rar wal̦o̦k ium̦win enañin 450 iiõ ko.

“Ãlikin men in, ear kããlõt ri-ekajet ro bwe ren tõl er m̦ae tõre ko an ri-kanaan Samuel. 21 Bõtab tokãlik rar akwel̦ap bwe en wõr juon aer kiiñ, im Anij ear lel̦o̦k ñan er Saul nejin Kish, juon em̦m̦aan jãn bwijjin Benjamin, im ear tõl er ium̦win 40 iiõ. 22 Ãlikin an jol̦o̦ke Saul, ear kããlõt Devid bwe en aer kiiñ, im ear kõnnaan kõn e im ba: ‘Iar lo bwe Devid nejin Jesse, ej juon em̦m̦aan eo ebuñbũruõ kake, enaaj kõm̦m̦ani aolep men ko ikõn̦aan.’ 23 Im Anij ear bõktok ñan Israel juon ri-lo̦mo̦o̦r jãn bwij eo an* em̦m̦aan in, ãinwõt an kar kallim̦ur kake. Ri-Lo̦mo̦o̦r eo ej Jesus. 24 Ak m̦okta jãn an kar itok, Jon ear kwal̦o̦k ilo̦bwilej ñan aolep armej in Israel bwe ren peptaij ñan kaalikkar ke rej ukel̦o̦k. 25 Bõtab ke Jon ear kam̦õjl̦o̦k jerbal eo an, ekõn ba: ‘Wõn ña ilo ami l̦õmn̦ak? Ejjab ña armej eo kom̦ij l̦õmn̦ake. Ak ewõr juon enaaj itok ãlikũ im ijekkar ñan jel̦ate juuj ko ilo neen.’

26 “Em̦m̦aan ran̦ jeiũ im jatũ, kom̦ ro jãn bwijjin Ebream im ro jet ibwiljimi im rej mijak Anij, em̦õj jilkintok ennaan in ñan kõj kõn wãween ad maroñ bõk lo̦mo̦o̦r. 27 Bõtab armej in Jerusalem im ri-tõl ro aer rar jab kile em̦m̦aan in, im ilo aer kar ekajete, rar kajejjet kũtien naan ko an ri-Kanaan ro, naan ko me rej kõl̦l̦aaj ainikieer im riiti aolep Jabõt. 28 Jekdo̦o̦n ñe rar jab ellolo ruõn bwe en mej ak rar akwel̦ap ñan Pail̦at bwe ren m̦ane. 29 Ke ear dedel̦o̦k aer kajejjet aolep men ko Jeje ko rar ba kõn e, rar doorlal̦tak jãn jurõn al̦al̦* eo im kõbabuuki ilo juon lõb. 30 Bõtab Anij ear kõjerkake jãn mej 31 im elõñ raan in an kar wal̦o̦kl̦o̦k ñan ro rar ilo̦k ippãn jãn Galili l̦o̦k ñan Jerusalem, im kiiõ rein rej ri-kam̦ool ro an ñan armej ro.

32 “Kõn men in, kõmij kwal̦o̦k ñan kom̦ ennaan eo em̦m̦an kõn kallim̦ur eo an Anij ñan ro jim̦m̦aad. 33 Em̦õj an Anij lukkuun kajejjete kallim̦ur in ñan kõj ro nejier ikijjeen an kar kõjerkakpejeik Jesus, ãinwõt kar je ilo sam eo kein karuo im ba: ‘Kwe kwõj nejũ; rainin em̦õj aõ erom jem̦am̦.’ 34 Anij ear kõjerkakpejeik jãn mej im eban bar jepl̦aak ñan juon ãnbwin eo emaroñ kõt. Anij ear kwal̦o̦k bwe men in em̦ool ke ear ba: ‘Inaaj tiljek ilo aõ kwal̦o̦k yokwe eo em̦ool ñan kom̦, ãinwõt aõ kar kallim̦ur ñan Devid.’ 35 Bareinwõt, ear ba ilo bar juon sam: ‘Kwoban kõtl̦o̦k bwe ãnbwinnin eo ej tiljek ñan kwe en kõt.’ 36 Bõtab Devid ear jerbal ñan Anij* ilo epepen eo an, ijoke ear mej* im rar kalibwini ippãn ro jim̦m̦aan, im ãnbwinnin ear kõt. 37 Ak kõn eo Anij ear kõjerkakpejeiki, ear jab kõt ãnbwinnin.

38 “Kõn men in, ro jeiũ im jatũ, kom̦win jel̦ã bwe kõmij kwal̦o̦k ñan kom̦ bwe Anij enaaj jol̦o̦k jerawiwi ko ami ikijjeen armej in. 39 Kien Moses ejjab maroñ kõm̦m̦an bwe kom̦win wãnõk, bõtab ikijjeen em̦m̦aan in, Anij enaaj kõwãnõk aolep ro rej tõmak. 40 Innem kom̦win kõjparok bwe naan kein ri-Kanaan ro rar ba ren jab wal̦o̦k ñan kom̦: 41 ‘Kom̦win kanooj lale, kom̦ eo kom̦ij kajjirere. Kom̦ naaj bwilõñ im jako kõnke ij kõm̦m̦ane juon jerbal ilo tõre kein ami, juon jerbal eo kom̦ jãmin tõmake jekdo̦o̦n ñe jabdewõt enaaj kõmel̦el̦eiki kom̦ kake ilo tipdikin.’”

42 Innem ke erro ej diwõjl̦o̦k, armej ro rar akwel̦ap bwe ren bar kõnnaan kõn men kein ilo Jabõt eo tok juon. 43 Ke ear jem̦l̦o̦k kweilo̦k eo aer ilo im̦õn kabuñ eo, elõñ iaan ri-Ju ro kab ro rar kobal̦o̦k ippãer im kabuñ ñan Anij rar l̦oor Paul im Barnebas. Im ke erro kar kõnnaan ñan er, erro kar rõjañ er bwe ren pãdwõt ilo jouj eo el̦ap an Anij.

44 Jabõt eo tok juon, enañin aolep armej ro ilo jikin eo rar kobatok bwe ren roñjake naan eo an Jeova.* 45 Ke ri-Ju ro rar lo jarlepju eo, rar lukkuun ebbanban im rar jino jum̦ae im kõnono n̦ae men ko Paul ej ba. 46 Kõn men in, Paul im Barnebas rar kõnono ilo peran ñan er im ba: “Ekar menin aikuj bwe kõmin kwal̦o̦k kõn naanin Anij ñan kom̦ m̦okta, bõtab kõn ami m̦akoko in roñjake im make kaalikkar bwe ejjab tõllo̦kũmi ñan bõk mour indeeo, kõmij kiiõ oktakl̦o̦k ñan ri-aelõñ ko. 47 Ilo m̦ool, Jeova* ear jiroñ kõm naan kein im ba: ‘Iar kããlõt eok bwe kwõn ãinwõt juon meram ñan ri-aelõñ ko im bõktok lo̦mo̦o̦r ñan ãne ko rettol̦o̦ktata ilo lal̦ in.’”

48 Ke ri-aelõñ ko rar roñ men in, rar lañlõñ im nõbar naan eo an Jeova,* im aolep ro em̦m̦an bũrueer ñan bõk mour indeeo rar erom rũttõmak. 49 Kõn men in, naan eo an Jeova* ear ajeededl̦o̦k ñan aolepen jikin eo. 50 Bõtab ri-Ju ro rar kakkõnonoik kõrã ro reutiej me rej mijak Anij im em̦m̦aan ro reutiej ilo jikin eo, innem rar kõm̦m̦an bwe armej ro ren jum̦aik im kaeñtaan Paul im Barnebas im rar kadiwõjl̦o̦k erro jãn ijoko jikier. 51 Kõn men in, erro kar jol̦o̦k jãn bũñalin neerro ñan kakkõl er, im erro kar etal ñan Aikoniõm. 52 Im ear jab bõjrak an ri-kal̦oor ro obrak kõn lañlõñ im kõn jetõb kwõjarjar.*