Matu
2 Jesus ear l̦otak ilo juon bukwõn ilo Judia etan Betleem ilo tõre ko an Kiiñ Herod.* Tokãlik, jet ri-jedjed iju* rar itok jãn jikin ko iturear ñan Jerusalem, 2 im rar ba: “Ewi ajri eo ear l̦otak im ej kiiñ eo an ri-Ju ro? Kõmar lo iju eo kõkal̦l̦en ajri eo ke kõmar pãd Iturear, im kõmij itõn kwal̦o̦k kautiej* ñane.” 3 Ke Kiiñ Herod im aolep armej ro ilo Jerusalem rar roñ kõn men in, rar kanooj inepata. 4 Im Herod ear ko̦kweilo̦ktok aolep bũrij ro reutiej im skraib* ro, im ear kajjitõk ippãer ia eo Christ* enaaj kar l̦otak ie. 5 Rar ba ñane: “Ilo bukwõn in Betleem ilo Judia, bwe eñin men eo ri-kanaan eo ear je: 6 ‘Im kwe Betleem jãn aelõñin Juda, kom̦ja* ro an Juda rejjab aikuj watõk eok bwe kwõj jikin eo ejjel̦o̦k tata tokjãn ilo aelõñin Juda, kõnke jãn kwe enaaj wal̦o̦ktok juon ri-tõl im enaaj tõl ri-Israel ro, armej ro aõ.’”
7 Innem Herod ear kũrtok ri-jedjed iju ro ilo ittino bwe en kajitũkin er ñããt eo iju eo ear wal̦o̦k. 8 Im ke ear jilkinl̦o̦k er ñan Betleem, ear ba: “Etal im lukkuun pukote ajri eo im ñe kom̦ij loe, kom̦win kõjjel̦ãiktok eõ bwe in bar ilo̦k im kwal̦o̦k kautiej ñane.” 9 Ãlikin aer roñjake kiiñ eo, rar ilo̦k, im iju eo rar loe ke rar pãd ilo jikin ko iturear ear etal im̦aaerl̦o̦k im bõjrak ilõñin ijo ajri eo ear pãd ie. 10 Ke rej lo an iju eo bõjrak, rar kanooj in m̦õn̦õn̦õ. 11 Im ke rej del̦o̦ñl̦o̦k ilo m̦weo, rej lo ajri eo ippãn jinen, Meri. Innem rar bukwelõlõ im kwal̦o̦k kautiej* ñan ajri eo. Bareinwõt, rar lel̦o̦k gold, ijur, im mõr.* 12 Bõtab, Anij ear jiroñ er ilo ettõn̦ak bwe ren jab jepl̦aak ñan ippãn Herod. Kõn men in, rar etal ilo bar juon ial̦ ke rar ro̦o̦l ñan ãneo ãneer.
13 Ãlikin aer ro̦o̦l, enjel̦ eo an Jeova* ear wal̦o̦k ñan Josep ilo ettõn̦ak im ba: “Jerkak im bõk ajri n̦e im jinen bwe Herod ej pojakin pukot ajri n̦e bwe en m̦ane. Kom̦win ko ñan Ijipt im pãdwõt ie m̦ae iien inaaj ba bwe kom̦win em̦m̦akũt.” 14 Kõn men in, Josep ear jerkak boñõn eo wõt im bõk ajri eo kab jinen im etal ñan Ijipt. 15 Im ear pãd ie ñan tõre eo ear mej Herod. Men in ear kajejjet kũtien naan ko an Jeova* ñan ri-kanaan eo an ke ear ba: “Inaaj kũr l̦adik eo nejũ bwe en diwõjtok jãn Ijipt.”
16 Ke Herod ear jel̦ã bwe ri-jedjed iju ro rar m̦on̦e, ear kanooj in illu. Kõn men in, ear jilkinl̦o̦k ri-jerbal ro an bwe ren m̦an aolep l̦adik ro ilo Betleem im aolep jikin ko iturin. Dettaer en ruo iiõ im dikl̦o̦k bwe en jejjet ekkar ñan iien eo ri-jedjed iju ro rar ba ñane bwe iju eo ear wal̦o̦k. 17 An kar mej l̦adik ro ear kajejjet kũtien kanaan eo ri-kanaan Jeremaia ear kwal̦o̦ke, ke ear ba: 18 “Ewal̦o̦k ainikien jañ im lim̦õ ilo Rema, ainikien an Rejel jañũt ro nejin. Ejjab kõn̦aan bwe ren kaenõm̦m̦ane kõnke rejako.”
19 Ke Herod ear mej, enjel̦ eo an Jeova* ear wal̦o̦k ñan Josep ilo ettõn̦ak ke ej pãd ilo Ijipt 20 im ba: “Jerkak im bõk ajri n̦e im jinen im etal ñan Israel kõnke ro rar pukot ajri n̦e bwe ren m̦ane, em̦õj aer mej.” 21 Innem ear jerkak im bõk ajri eo im jinen im jepl̦aak ñan Israel. 22 Bõtab, ear mijak in etal ñan Judia kõnke ear roñ bwe Arkileõs ear bõk jikin Herod, eo jemãn, im kiiñ ijo. Bareinwõt, Anij ear jiroñe ilo ettõn̦ak bwe en jab etal ñan Judia. Kõn men in, ear etal ñan Galili, 23 im ear jokwe ilo juon bukwõn etan Nazeret. Men in ear kajejjet kũtien kanaan eo ri-kanaan ro rar kwal̦o̦ke im ba: “Naaj n̦aetan ri-Nazeret.”