Rom
2 Kõn men in, el̦aññe kwõj ekajete ro jet, jekdo̦o̦n wõn kwe ak ejjel̦o̦k am̦ kein jekpen ñan jidik. Ñe kwõj ekajete bar juon, kwõj liaakel̦o̦k eok make, kõnke kwõj ekajet bõtab kwõj kõm̦m̦ani ejja men ko wõt rej kõm̦m̦ani. 2 Jejel̦ã bwe wãween an Anij ekajet ej pedped wõt ioon m̦ool, im ej n̦ae ro rej kõm̦m̦an men rot kein.
3 Kwe eo kwõj kõm̦m̦ani ejja men ko wõt kwõj ekajete ro jet kaki, ta kwõj l̦õmn̦ak bwe kwõmaroñ el̦l̦ã jãn ekajet eo an Anij ke? 4 Ke ta, kwõj kõjekdo̦o̦n an Anij lukkuun jouj im meanwõd* im kijenmej, kõnke kwõjaje bwe ilo an jouj ej kajjioñ in kõm̦m̦an bwe kwõn ukel̦o̦k? 5 Bõtab kõn am̦ penawiia im kõn am̦ kapen bũruom̦,* kwõj make bõktok illu eo an Anij ioom̦. Illu in enaaj wal̦o̦k ilo raan eo Anij enaaj kwal̦o̦k an ekajet jim̦we. 6 Im enaaj n̦aon̦ããn kajjojo armej ekkar ñan kõm̦m̦an ko aer: 7 mour indeeo ñan ro rej pukot aiboojoj, nõbar, im mour eo eban wabanban ilo aer kijenmej kõn jerbal ko rem̦m̦an; 8 bõtab ñan ro rekõn̦aan wõt akwããl im rejjab pokake m̦ool ak rej pokake men ko rejjab jim̦we, enaaj itok kwi im illu eo an ioer. 9 Enaaj wal̦o̦k eñtaan im el̦ap inepata ñan aolep armej ro rej kõm̦m̦an jorrããn, enaaj wal̦o̦k m̦okta ñan ri-Ju ro, innem tokãlik ñan ri-Grik ro; 10 bõtab aiboojoj im nõbar im aenõm̦m̦an enaaj wal̦o̦k ñan aolep ro rej kõm̦m̦ani men ko rem̦m̦an, enaaj wal̦o̦k m̦okta ñan ri-Ju ro, innem tokãlik ñan ri-Grik ro, 11 kõnke ejjel̦o̦k kalijekl̦o̦k ippãn Anij.
12 Aolep ro rej jerawiwi kõn aer jaje kõn kien eo, renaaj mej meñe rejaje kõn kien eo, bõtab aolep ro rej jerawiwi meñe rejel̦ã kõn kien eo, naaj ekajet er kõn kien eo. 13 Ro rej baj roñjake wõt kien eo rejjab wãnõk im̦aan mejãn Anij, bõtab ro rej pokake kien eo, enaaj kõwãnõk er. 14 Ejjel̦o̦k kien eo ippãn armej in aelõñ ko, bõtab rej make l̦oore men ko kien eo ej ba. Meñe ejjel̦o̦k an armej rein kien ak rej ãinwõt kien ñan er make. 15 Armej ro rein rej kam̦ool bwe em̦õj jei men ko kien eo ej ba ilo bũrueer. Bõklõkõt ko aer rej bar kam̦oole men in, im l̦õmn̦ak ko aer rej make kaalikkar el̦aññe ejim̦we ak ebõd men eo rar kõm̦m̦ane. 16 Men kein renaaj wal̦o̦k ilo raan eo ñe Anij, ikijjeen Christ Jesus, enaaj ekajete l̦õmn̦ak im kõm̦m̦an ko rettino an armej, im enaaj wal̦o̦k ekkar ñan ennaan eo em̦m̦an ij kwal̦o̦ke.
17 El̦aññe kwe juon ri-Ju im kwõj lõke kien eo im eutiej bũruom̦ bwe kwõj juon iaan ro doon Anij, 18 im kwõjel̦ã kõn ankilaan im kwõj kile men ko el̦ap tokjãer kõnke kar katakin eok* jãn Kien eo, 19 im kwõj lukkuun tõmak bwe kwe juon eo ej tõle ro repilo, juon meram ñan ro rej pãd ilo marok, 20 juon eo ej kajim̦we ro rejajel̦o̦kjen̦, juon ri-kaki ñan ajri, im juon eo emel̦el̦e kõn wãween ejaakin* jel̦ãl̦o̦kjen̦ eo im m̦ool eo ilo Kien eo, 21 innem etke kwe kwõj katakin ro jet, ak kwõjjab katakin eok make? Kwe eo kwõj kwal̦o̦k im ba, “Kwõn jab ko̦o̦t,” kwõj ke ko̦o̦t? 22 Kwe eo kwõj ba, “Kwõn jab lejãn,”* kwõj ke lejãn? Kwe eo kwõj kũtõtõik ekjab, kwõj ke ko̦o̦te tampel̦ ko? 23 Kwe eo eutiej bũruom̦ kake kien eo, kwõj ke kwal̦o̦k am̦ jab kautieje Anij ilo am̦ jab pokake Kien eo? 24 Jeje ko rej ba, “Ri-aelõñ ko rej kõnono n̦ae ãt eo etan Anij kõn wõt kom̦.”
25 Ilo m̦ool, ewõr tokjãn m̦wijm̦wij* ñe kwõj l̦oore kien eo, bõtab el̦aññe kwõj rupe kien eo, enaaj ejjel̦o̦k tokjãn am̦ kar m̦wijm̦wij. 26 Kõn men in, el̦aññe juon eo ejjab m̦wijm̦wij ej pokake naanin jiroñ ko rewãnõk ilo Kien eo, meñe ejjab m̦wijm̦wij ak naaj watõke bwe em̦õj an m̦wijm̦wij, ejjab ke? 27 Ilo an armej eo ejjab m̦wijm̦wij pokake Kien eo, ej ãinwõt ñe ej ekajet eok, kwe eo me kwõj rupe kien eo meñe epãd jeje ko ippam̦ im em̦õj am̦ m̦wijm̦wij. 28 Juon eo ej bõk ãt in ri-Ju ejjab mel̦el̦ein bwe ej m̦oolin ri-Ju, im m̦wijm̦wij ilo ãnbwin ejjab m̦wijm̦wij eo em̦ool. 29 Bõtab eo ej ri-Ju ilo bũruon ej m̦oolin ri-Ju, im em̦õj an m̦wijm̦wij ilo bõro ikijjeen jetõb kwõjarjar* im jab jãn men ko em̦õj jei ilo kien eo. Armej in ej bõk nõbar jãn Anij im jab jãn armej.