Revelesõn
12 Innem ear wal̦o̦k juon men ejejuwaan* ilañ: Juon kõrã ej libobo* kõn al̦, im allõñ ej pãd ium̦win neen, im ilõñin bõran ej kũrawũn kõn 12 iju, 2 im ebõro̦ro. Im ej lam̦õj kõn an eñtaan im metak kõnke ej itõn keotak.
3 Iar lo bar juon men ej wal̦o̦k ilañ, juon dragon el̦ap im ebũrõrõ, im ewõr jimjuon bõran im joñoul an doon, im ioon bar kein bõran ewõr jimjuon kũrawũn; 4 im teel̦in ej iperel̦o̦k juon m̦õttan jilu in iju ko ilañ, innem ear julal̦l̦o̦k ñan lal̦ in. Im dragon eo ear jutak wõt im̦aan kõrã eo ej pojakin keotak, bwe en maroñ kañ niñniñ eo nejin.
5 Im kõrã eo ear keotake l̦adik eo nejin, eo enaaj juon jabõt ñan aolep aelõñ ko ilo an kõjerbal juon jokon̦ aen. Innem kar m̦õkaj im bõke l̦adik eo nejin kõrã in ñan ippãn Anij im ñan tũroon eo An. 6 Im kõrã eo ear ko ñan ãne jem̦aden, ijo Anij ear kõpooje bwe en jikin im ijo renaaj naajidiki ium̦win 1,260 raan.
7 Im ear wal̦o̦k juon tarin̦ae ilañ: Maikõl* im enjel̦ ro an rar tarin̦aeik dragon eo, im dragon in im enjel̦ ro an rar bareinwõt tarin̦aeik er 8 bõtab rar* jab bõk anjo̦, im ear ejjel̦o̦k bar jikier ilañ. 9 Innem kar jolal̦l̦o̦k dragon eo el̦ap, jedpãnit eo jãn etto, etan Tepil̦ im Setan, eo ej m̦on̦e aolepen lal̦ in; kar jolal̦l̦o̦k ñan lal̦ in im bareinwõt enjel̦ ro an n̦a ippãn. 10 Innem iar roñ juon ainikien el̦ap ilañ ej ba:
“Kiiõ emoottok lo̦mo̦o̦r im kajoor im Aelõñ* eo an ad Anij, im maroñ eo an eo Ear kããlõte bwe en Christ, kõnke em̦õj jolal̦l̦o̦k eo ej kõm̦m̦an ruõn ro jeid im jatid raan im boñ im̦aan ad Anij! 11 Im rar bõk anjo̦ ioon kõn bõtõktõkin L̦aam̦ eo im kõn ennaan eo rar kwal̦o̦k kake, im rar m̦õn̦õn̦õ in kõjekdo̦o̦n mour ko aer im mej. 12 Kõn men in, kom̦win lañlõñ kom̦ lañ ko im ro rej jokwe ie! Jerata ñan lal̦ im lo̦meto, bwe Tepil̦ eo ear wanlal̦waj ñan ippemi im el̦ap an illu kõnke ejel̦ã bwe jidik wõt iien ippãn.”
13 Innem ke dragon eo ej kile bwe em̦õj jolal̦l̦o̦ke ñan lal̦ in, ear kaeñtaane kõrã eo ear keotak l̦adik eo nejin. 14 Bõtab kar lel̦o̦k ñan kõrã eo ruo pein eagle rel̦l̦ap bwe en maroñ kãlo̦k ñan ijo jikin ilo ãne jem̦aden, ijo naaj naajidiki ium̦win juon iien im ruo iien im jimattan iien,* bwe en ettol̦o̦k jãn mejãn jedpãnit eo.
15 Im jedpãnit eo ear kadiwõjl̦o̦k dãn jãn lo̦ñiin ilikinl̦o̦k kõrã eo ãinwõt an juon reba to̦o̦rl̦o̦k, ñan kõm̦m̦an bwe en mal̦oñ. 16 Bõtab lal̦ ear jipañ kõrã eo, im lal̦ ear kõpel̦l̦o̦ke lo̦ñiin im wõrañel̦o̦k reba eo dragon eo ear kadiwõjl̦o̦k jãn lo̦ñiin. 17 Kõn men in, dragon eo ear kanooj illu ippãn kõrã eo, innem ear ilo̦k im tarin̦aeiki bween ro nejin,* ro rej pokake kien ko an Anij im epãd ippãer jerbal eo ñan kwal̦o̦k kõn Jesus.