Jerbal
12 Ilo kar tõre in, Kiiñ Herod ear jino nana an kõm̦m̦an ñan jet iaan ro ilo eklejia eo. 2 Ear m̦ane Jemes, l̦eo jein Jon,* kõn jãje im ear mej. 3 Ke ear lo bwe ebuñbũruon ri-Ju ro kõn men in, ear ilo̦k im kalbuuji Piter. (Men in ear wal̦o̦k ilo kar iien Kwõjkwõjin Bũreet Ejjab Kauwe.)* 4 Ear jibwe im kalbuuji im ear kõm̦m̦an bwe emãn kumi in rũttarin̦ae ren kotaik doon im waje. Ilo kajjojo kumi ewõr emãn rũttarin̦ae. Ear pepe in ekajete im̦aan armej ro ãlikin Kwõjkwõjin Kijoone* eo. 5 Piter ear pãdwõt ilo kalbuuj, bõtab ro ilo eklejia eo rar lukkuun jar ñan Anij kõn e.
6 Ilo boñõn eo m̦okta jãn an Herod kadiwõje bwe en ekajete im̦aan armej ro, Piter ear kiki ikõtaan ruo rũttarin̦ae im em̦õj lukwõje pein kõn ruo jeen. Ekar bar wõr ri-waj im̦aan kõjãm eo rej waje im̦õn kalbuuj eo. 7 Bõtab enjel̦ eo an Jeova* ear wal̦o̦ktok ilo jidimkij im jutak ijo im ear wal̦o̦k juon meram ilowaan ruum̦ eo ilo jikin kalbuuj eo. Ear jibwe katin Piter bwe en karuji im ear ba: “Kwõn m̦õkaj im jerkak!” Im jeen ko rar wõtlo̦k jãn pein. 8 Innem enjel̦ eo ear ba ñane: “Kwõn kõn̦ak nuknuk kan̦e am̦ im juuj kan̦e am̦.” Im ear kõm̦m̦ane men in. Innem enjel̦ eo ear bar ba ñane: “Kwõn kõn̦ake kopã n̦e am̦ im l̦ooretok wõt ña.” 9 Innem ear diwõjl̦o̦k im l̦oorl̦o̦k wõt enjel̦ eo, bõtab ear jab jel̦ã bwe men eo enjel̦ eo ej kõm̦m̦ane ear lukkuun wal̦o̦k. Ilo m̦ool, ear l̦õmn̦ak bwe ej lo juon pijen. 10 Rar el̦l̦ã jãn kumi in ri-waj ro m̦oktata im jãn kumi eo kein karuo, im rar tõparl̦o̦k kõjãm aen eo, jikin diwõjl̦o̦k eo jãn im̦õn kalbuuj eo, im kõjãm eo ear make pel̦l̦o̦k. Innem ãlikin aer diwõjl̦o̦k, rar etal ilo juon ial̦, im enjel̦ eo ear kajju jakol̦o̦k jãne. 11 Im ke Piter ear kile men eo ear wal̦o̦k, ear ba: “Kiiõ ilukkuun jel̦ã bwe Jeova* ear jilkintok enjel̦ eo an bwe en lo̦mo̦o̦ren eõ jãn pein Herod im jãn aolep men ko ri-Ju ro rar kõtmãne bwe renaaj wal̦o̦k ñan eõ.”
12 Ãlikin an kile men in, ear etal ñan m̦weo im̦õn Meri jinen Jon, ãt eo juon Mark, im elõñ rar kobal̦o̦k ñan ijin im jar. 13 Ke ear kal̦l̦al̦l̦al̦ ilo kõjãmin wõrwõr eo ilo m̦weo, juon jiroñ etan Roda im ej jerbal ilo m̦weo ear ilen lale wõn eo. 14 Ke ear kile ainikien Piter, joñan an m̦õn̦õn̦õ ear jab kõpel̦l̦o̦k kõjãm eo ak ear ettõrl̦o̦k ñan lowaan m̦weo im kõnnaanek er bwe Piter en̦ ej jutak inabõjin wõrwõr en̦. 15 Ak rar ba ñane: “Korowãlo̦k ke?” Bõtab el̦akkar ba bwe ej kõnono m̦ool. Kõn men in, rar ba: “Enjel̦ men en̦.”* 16 Piter ear jutak wõt ijo im kal̦l̦al̦l̦al̦. Ke rar kõpel̦l̦o̦ke kõjãm eo, rar kanooj bwilõñ ke rej loe. 17 Bõtab ear kõkal̦l̦el̦o̦k kõn pein bwe ren bõjrak aer kõnnaan im ear tipdikil̦o̦k wãween an kar Jeova* kadiwõje jãn kalbuuj, im ear ba: “Kom̦win kõnnaanekl̦o̦k Jemes im em̦m̦aan ro jet jeid im jatid kõn men kein.” Ãlikin an ba men in, ear diwõjl̦o̦k im etal ñan bar juon jikin.
18 Ke ear raan, rũttarin̦ae ro rar jeparujruj kõn ta eo ear wal̦o̦k ñan Piter. 19 Innem Herod ear kanooj kappukote ak ear jab loe, ear ekajete ri-waj ro im ear ba bwe ren bõk er im kaje er, im ear etal jãn Judia ñan Seseria im pãd jidik ijo.
20 Herod ear illu* ippãn armej in Tair im Saidon. Kõn men in, rar itok ñan ippãn kõn juon wõt un. Ãlikin aer kar kareele Blastus, em̦m̦aan eo ej bõk eddon men ko m̦weien kiiñ eo, bwe en jipañ er, rar kajjioñ kõm̦m̦an aenõm̦m̦an ippãn kiiñ eo kõnke ãne ko ãneer rar ebbõk kijeer jãn ijoko jikin kiiñ eo. 21 Ilo kar juon raan el̦ap, Herod ear ekkõn̦ak nuknukin kiiñ im ear jijet ilo jea in ekajet eo im jino kõnnaan ñan armej ro. 22 Innem armej ro rar kweilo̦kl̦o̦k ilo iien eo rar lam̦õj im ba: “Ainikien anij, im ejjab ainikien armej!” 23 Im ilo iien eo wõt, enjel̦ eo an Jeova* ear m̦ane kiiñ eo kõnke ear jab lel̦o̦k nõbar ñan Anij, im m̦ajin lo̦je rar kañ kobban lo̦jien im ear mej.
24 Innem naan eo an Jeova* ear ajeededl̦o̦k wõt im ear lõñl̦o̦k wõt rũttõmak.
25 Ak kõn Barnebas im Saul, ãlikin aerro kar kadedel̦o̦k jerbal eo aerro ñan jipañ rũttõmak ro ilo Jerusalem, erro kar jepl̦aak im rar bõke Jon ippãerro, ãt eo juon Mark.