Taitõs

3 En jab bõjrak am̦ kakeememej er ñan kõttãik er im bwe ren pokake kien ko im ri-utiej ro, im bwe ren pojak ñan aolep jerbal ko rem̦m̦an, 2 im ren jab kõnanaik jabdewõt armej, im jab akwããl, bõtab ren jel̦ã kõttãik er im kwal̦o̦k ineem̦m̦an ilo men otemjej ñan aolep armej. 3 Bwe kõj bareinwõt jekõn kar jajel̦o̦kjen̦, jab pokake, jebwãbwe, ri-kõm̦akoko ñan elõñ kain kõn̦aan im menin kam̦õn̦õn̦õ ko, kõm̦m̦ani men ko renana, ebbanban, im jaar menin kajjõjõ, im jekõn kõjdate doon.

4 Bõtab, ke jouj eo an Anij, eo ej ad ri-Lo̦mo̦o̦r, im yokwe eo an ñan armej rar alikkar, 5 (ejjab kõn jabdewõt jerbal ewãnõk jaar kõm̦m̦ane, ak ej kõn tũriam̦o eo an) ear lo̦mo̦o̦ren kõj ikijjeen an kar karreoik* kõj bwe jen maroñ mour, im ikijjeen an kar kõkããle kõj kõn jetõb kwõjarjar.* 6 Ear kanooj* lutõktok jetõb kwõjarjar* in n̦a iood ikijjeen Jesus Christ ad ri-Lo̦mo̦o̦r, 7 kõnke ñe em̦õj kõwãnõk kõj ikijjeen jouj eo an el̦ap, innem jenaaj maroñ erom ri-jolõt ekkar ñan kõjatdikdik eo kõn mour indeeo.

8 Jemaroñ lukkuun lõke naan kein, im ikõn̦aan bwe kwõn lukkuun kaalikkari kõnke ro rej tõmak Anij ren l̦õmn̦ak wõt kõn aer kõm̦m̦ani jerbal ko rem̦m̦an. Men kein rekanooj em̦m̦an im ewõr tokjãer ñan armej.

9 Bõtab kwe, kwõn jab bõk kun̦aam̦ ilo iakwããlãl ko ejjel̦o̦k tokjãer im kõn menmenbwij ko, aitwerõk ko, kõbo̦uwe kõn Kien eo, bwe men kein ejjel̦o̦k tõprakier im ejettokjãer. 10 Ak kõn juon eo ej kõm̦m̦an jepel im ejaak an make kumi, kwõn jab kobal̦o̦k ippãn ãlikin am̦ kar kauweiki* ruo kõttan, 11 kõnke armej in em̦õj an el̦l̦o̦k jãn ial̦ eo ejim̦we im ej jerawiwi im ej liaakel̦o̦k e make.

12 Ñe inaaj jilkinwaj Artemas ak Tikikõs ñan ippam̦, kwõn kab kanooj kate eok bwe kwõn jibadektok eõ ilo Nikopolis, bwe ij pepe in pãd ie ilo iien añõneañ* in. 13 Kwõn lukkuun kate eok ñan jipañ Zinas, eo ekanooj tijem̦l̦o̦k ilo Kien eo, im Apollõs bwe en ejjel̦o̦k aerro aikuj ilo tũreep n̦e aerro. 14 Bõtab rũttõmak ran̦e m̦õttad ren katak ñan kõm̦m̦ani wõt jerbal ko rekanooj em̦m̦an bwe ren maroñ jipañ ilo iien ko reidiñ me el̦ap aikuj ie, bwe en jab ejjel̦o̦k leen jerbal ko aer.

15 Aolep rã ije ippa rej lewaj aer naanin yokyokwe. Lewaj aõ yokwe ñan ro rej yokwe kõj ilo tõmak.

Jouj eo el̦ap en pãd ippemi aolep.