2 Korint
3 Kõmij aikuj ke bar kwal̦o̦k wõn kõm? Ak ãinwõt ro jet, kõmij aikuj ke lõta in ijjitõñ jãn kom̦, ke ta, ej aikuj wõr lõta in ijjitõñ kõmij aikuj kwal̦o̦k ñan kom̦ ke? 2 Kom̦ij ãinwõt lõta eo am me em̦õj je ilo bũruem, im aolep armej rejel̦ã kake im rej riiti. 3 Elukkuun alikkar bwe kom̦ij ãinwõt juon lõta an Christ, eo kõm kar je, kõm ro rej karejar ñan Anij. Im kar jab je kõn kein jeje, bõtab kar je kõn jetõb kwõjarjar* eo an Anij eo emour, im kar jab je ioon dekã, bõtab kar je ilo bõro.
4 Ikijjeen Christ, Anij ej kõmaroñ kõm bwe kõmin lukkuun tõmak men in. 5 Kõmij jab ba bwe kõm ekkar ñan kõm̦m̦ane jerbal in kõn maroñ ko am make, kõnke ilo m̦ool Anij eo ej kaalikkar bwe kõm ekkar ñan jerbal in. 6 E eo ear kõm̦m̦an bwe kõmin ro rekkar ñan jerbal ilo bujen eo ekããl, im jab ñan kien eo kar je, bõtab ñan jetõb kwõjarjar.* Kien eo kar je ej liaakel̦o̦k armej ñan mej, ak jetõb kwõjarjar* ej letok mour.
7 Kien eo ej tõll̦o̦k ñan mej im kar je ioon dekã ear itok ilo aiboojoj el̦ap. Joñan, ro nejin Israel rar jab maroñ kalimjek turin mejãn Moses kõn an lukkuun aiboojoj an ejjatõltõl. Ijoke, aiboojoj in ear jako. 8 El̦aññe ãindein, innem ta eban kar l̦apl̦o̦k an aiboojoj jerbal ko an jetõb kwõjarjar* ke? 9 El̦aññe ekar aiboojoj kien eo ej liaakel̦o̦k armej ñan mej, innem ejjel̦o̦k pere bwe el̦apl̦o̦k wõt an aiboojoj jerbal eo ej kõm̦m̦an bwe armej ren wãnõk! 10 Ilo m̦ool, men eo ekar aiboojoj m̦okta em̦õj jol̦o̦k aiboojoj eo an, kõnke men eo ej itok ãlikin el̦apl̦o̦k an aiboojoj. 11 El̦aññe men eo em̦õj jol̦o̦ke ekar itok ilo aiboojoj, innem ejjel̦o̦k pere bwe el̦apl̦o̦k wõt an aiboojoj men eo ej pãdwõt!
12 Kõnke kõmij lukkuun kõjatdikdik kõn men in, el̦ap ammim kõnono ilo peran, 13 im kõmij jab ãinwõt Moses ilo an kar pinej turin mejãn kõn juon kein libobo bwe ro nejin Israel ren jab loe jem̦l̦o̦kin men eo ej pojakin jako. 14 L̦õmn̦ak ko aer rar kilõk. Ñan rainin, kein libobo in ej pãdwõt ñe rej riiti bujen eo m̦okta, kõnke kein libobo in eban em̦m̦akũt el̦aññe rejjab likũt aer tõmak ilo Christ. 15 Ilo m̦ool, ñan rainin ñe rej riiti jeje ko an Moses, ej pãdwõt kein libobo eo im ej pinej bũrueer. 16 Bõtab ñe juon ej oktakl̦o̦k ñan Jeova,* naaj jol̦o̦ke kein libobo in. 17 Jeova* ej Jetõb im ijo jitũbõn* Jeova* ej pãd ie, ewõr anemkwõj. 18 Kõj aolep, ro em̦õj kõm̦akũt kein libobo eo jãn mejãd, jej ãinwõt kilaaj ko rej kwal̦o̦k kõn aiboojoj eo an Jeova.* Jej oktakl̦o̦k wõt bwe jen nemãmeen wõt Anij im bwe en l̦apl̦o̦k wõt ad kwal̦o̦k kõn aiboojoj eo an Anij, ekkar ñan wãween eo Jeova* ekõn̦aan,* eo im ej Jetõb.