Jon
10 “Ij ba ñan kom̦ bwe eo ejjab del̦o̦ñ ilo kõjãm eo ilo wõrwõrin jiip eo ak ej tallõñe wõrwõr eo, armej in ej juon ri-ko̦o̦t im juon ri-kowadoñ. 2 Bõtab armej eo ej del̦o̦ñ ilo kõjãm eo, eñin ej jabõt eo an jiip ko. 3 Ri-lale kõjãm eo ej kõpel̦l̦o̦ke kõjãm eo ñan armej in, im jiip ko rej roñjake ainikien. Ej añinñin jiip ko nejin kõn etaer im tõl er nabõjl̦o̦k. 4 Ãlikin an kadiwõjl̦o̦k aolep jiip ko nejin, ej etal im̦aaerl̦o̦k im jiip ko rej l̦oore kõnke rekile ainikien. 5 Reban l̦oore juon ruwamãejet ak renaaj ko jãne, kõnke rejjab imminene kõn ainikien ruwamãejet.”* 6 Jesus ear kwal̦o̦k waanjoñak in ñan er, bõtab rar jab mel̦el̦e kõn ta ko ej ba ñan er.
7 Kõn men in, Jesus ear bareinwõt ba: “Ij ba ñan kom̦ bwe ña ij kõjãm eo an jiip ko. 8 Aolep ro rar kajjioñ bõk jikũ rej ri-ko̦o̦t im ri-kowadoñ, im jiip ko rar jab roñjake er. 9 Ña ij kõjãm eo. Jabdewõt eo ej del̦o̦ñ ilo ña enaaj bõk lo̦mo̦o̦r, im enaaj diwõj del̦o̦ñ im ellolo kijen. 10 Ri-ko̦o̦t eo eban itok m̦ae iien ej itõn ko̦o̦t im m̦anm̦an im ko̦kkure jiip ko. Bõtab iar itok bwe ren maroñ bõk mour, eo ej ñan indeeo. 11 Ña ij jabõt eo em̦m̦an. Jabõt eo em̦m̦an ej lel̦o̦k mour eo an kõn jiip ko nejin. 12 Ñe em̦m̦aan eo rar kõjerbale ñan lale jiip ko ej lo an ol̦ip eo itok, ej etal jãn jiip ko im ko jãni kõnke ejjab e juon jabõt im ejjab nejin jiip ko. Innem ol̦ip eo ej kõpl̦i im bõk jet jiip im jiip ko jet reko im ejjeplõklõk. 13 Em̦m̦aan eo ej ko kõnke ej jerbal kõn on̦ããn im ejjab kaorõk jiip ko. 14 Ña ij jabõt eo em̦m̦an. Ijel̦ã kajjien jiip ko aõ im jiip ko aõ rejel̦ã kajjieõ, 15 ãinwõt an Jema jel̦ã kajjieõ im aõ jel̦ã kajjien Jema. Ij lel̦o̦k aõ mour kõn jiip ko aõ.
16 “Ebar wõr jet aõ jiip, ak rejjab jãn wõrwõr in. Ij aikuj bar kadel̦o̦ñtok jiip kein im renaaj roñjake ainikiõ im renaaj erom juon wõt bwij, im enaaj juon wõt aer jabõt. 17 Unin an Jema yokwe eõ ej kõnke ij lel̦o̦k aõ mour bwe in maroñ bar bõke. 18 Ejjel̦o̦k en̦ ej bõk mour e aõ jãn ña, bõtab ij lel̦o̦ke kõnke ikõn̦aan. Em̦õj kamãlim eõ bwe in lel̦o̦ke, im em̦õj kamãlim eõ bwe in bar bõke. Iar bõk kakien in jãn Jema.”
19 Jãn wõt naan kein ak ear bar wõr jepel ikõtaan ri-Ju ro. 20 Elõñ iaaer rar ba: “Etke kom̦ij roñjake l̦õn̦e ke euwe jetõb ettoon* ippãn im ejorrããn kõmãlij n̦e an?” 21 Ak ro jet rar ba: “Juon eo euwe jetõb ettoon ippãn eban kwal̦o̦k naan rot kein. Ta m̦ool ke jetõb ettoon emaroñ kõm̦m̦an bwe ro repilo ren lol̦o̦kjen̦ ke?”
22 Ilo tõre in, ekar jejjet iien Kwõjkwõjin Aje* eo ilo Jerusalem. Iien in ej iien m̦õl̦o 23 im Jesus ear etetal ilo Ettõñaak eo an Solomon ilo tampel̦ eo. 24 Innem ri-Ju ro rar kaapool̦e im rar jino ba ñane: “Ewi toon am̦ naaj kõm̦m̦an bwe kõmin kõttar? El̦aññe kwe Christ, kwõn kajju ba ñan kõm.” 25 Im Jesus ear uwaak er im ba: “Em̦õj aõ ba ñan kom̦ ak kom̦ij jab tõmak. Jerbal ko ij kõm̦m̦ani ilo etan Jema rej kwal̦o̦k kõn ña. 26 Bõtab kom̦ij jab tõmak, kõnke kom̦ij jab aõ jiip. 27 Jiip ko aõ rej roñjake ainikiõ im ijel̦ã kajjier, im rej l̦oor eõ. 28 Inaaj lel̦o̦k ñan er mour indeeo im rejjãmin jako ñan jidik, im ejjel̦o̦k juon enaaj bõk er jãn ña.* 29 Ro Jema ear letok ñan ña raorõkl̦o̦k jãn men otemjej, im ejjel̦o̦k juon emaroñ bõk er jãn Jema.* 30 Ña im Jema kõm̦ro ej juon wõt.”*
31 Innem ri-Ju ro rar bar ebbõk dekã bwe ren itõn kade ñan mej. 32 Ak Jesus ear ba ñan er: “Iar kõm̦m̦ani elõñ jerbal ko rem̦m̦an ñan kom̦ im rej jãn Jema. Ewi iaan jerbal kein kom̦ij itõn kad eõ kake?” 33 Ri-Ju ro rar uwaak im ba: “Kõmij itõn kad eok kõn am̦ kõnono n̦ae Anij, ejjab kõn am̦ kõm̦m̦ani jerbal ko rem̦m̦an. Kwe armej ak kwõj make ba bwe kwe juon anij.” 34 Innem Jesus ear ba ñan er: “Jeje ko* ami rej ba, ‘Ij ba: “Kom̦ anij.”’ 35 Anij ej ba ‘kom̦ anij’ ñan ro me naan eo an ej kwal̦o̦k rueer, im Jeje ko reban oktak. 36 Ak ña, Anij ear kokkwõjarjar eõ im jilkintok eõ ñan lal̦ in. Innem etke kom̦ij ba, ‘Kwõj kõnono n̦ae Anij,’ kõn aõ ba, ‘Ña Nejin Anij’? 37 El̦aññe ijjab kõm̦m̦ani jerbal ko an Jema, kom̦win jab tõmak eõ. 38 Jekdo̦o̦n ñe kom̦ij jab tõmak eõ ak el̦aññe ij kõm̦m̦ani jerbal ko an Jema, innem kom̦win tõmaki jerbal ko ij kõm̦m̦ani. Ilo wãween in, kom̦ naaj maroñ jel̦ã im wõnm̦aanl̦o̦k wõt im tõmak bwe Jema ej bõro wõt juon ippa im ij bõro wõt juon ippãn Jema.” 39 Kõn men in, rar bar kajjioñ in jibwe bõtab ear ko jãn er.
40 Innem ear kijoone Reba Jordan im bar jepl̦aak ñan jikin eo Jon ekõn peptaij armej ie m̦okta, im ear pãdwõt ijo. 41 Im elõñ armej rar itok ñan ippãn, im rar jino kõnnaan ñan doon im ba: “Ejjel̦o̦k menin bwilõñ en̦ Jon ear kõm̦m̦ane ñan jidik, bõtab aolep men ko ear ba kõn em̦m̦aan in rem̦ool.” 42 Innem elõñ rar kwal̦o̦k aer tõmak ilo Jesus ilo ijin.