1 Piter
4 Kõnke Christ ear eñtaan ilo kanniõk, kom̦ij aikuj bareinwõt kõpooj kom̦ make bwe ami l̦õmn̦ak en ãinwõt l̦õmn̦ak ko an Christ, kõnke jabdewõt armej eo ear eñtaan ilo kanniõk, em̦õj an bõjrak jãn an jerawiwi. 2 Kõn men in, toon wõt an armej in mour, ejjab bar mour ekkar ñan kõn̦aan ko an armej, ak ej mour ñan kõm̦anm̦an ankilaan Anij. 3 Ilo iien ko m̦okta, kom̦ kõn kõm̦m̦ani men ko armej in aelõñ ko rekõn̦aan kõm̦m̦ani. Kom̦ kõn peran in kõm̦m̦ani men ko renana,* l̦oor kõn̦aan ko rettoon im epen dãpiji, idaak l̦e jãn joñan, pãd ilo iien iiãio ko robrak kõn m̦anit nana, koba ippãn doon ñan baj kadek wõt, im kabuñ ñan ekjab ko rekajjõjõ. 4 Innem kiiõ rejjab mel̦el̦e etke ejako ami l̦oor er ilo m̦anit ko aer rettoon im renana. Kõn men in, rej kõnanaik kom̦. 5 Bõtab armej rein renaaj aikuj uwaak ñan eo ej pojakin ekajete ro remour im ro remej. 6 Eñin unin kar bareinwõt kwal̦o̦k kõn ennaan eo em̦m̦an ñan ro remej, bwe ren maroñ mour ikijjeen tõl eo jãn jetõb kwõjarjar* ekkar ñan l̦õmn̦ak eo an Anij, meñe rej bõk ekajet ilo kanniõk ekkar ñan l̦õmn̦ak ko an armej.
7 Bõtab, jem̦l̦o̦kin men otemjej ej epaaktok. Kõn men in, en jim̦we ami l̦õmn̦ak, im kom̦win pojakin* jar iien otemjej. 8 El̦aptata, kom̦win lukkuun yokwe doon kõnke yokwe ej kalbubu elõñ jerawiwi. 9 Kom̦win kwal̦o̦k karwainene ñan doon* ilo ami jab watõk. 10 Anij ear lewaj menin lewaj ñan kom̦ kajjojo. Kõn men in, kom̦win kõjerbale ñan jipañ doon, ãinwõt ke kom̦ij ri-karejar ro rar bõk jouj eo el̦ap jãn Anij, eo ear kwal̦o̦ke ilo elõñ wãween. 11 El̦aññe jabdewõt ej kõnono, en kõnono kõn ennaan ko jãn Anij. Im el̦aññe jabdewõt ej jerbal ñan jipañ ro jet, en kõm̦m̦ane kõn kajoor eo Anij ej lel̦o̦k ñane. Ilo wãween in, nõbar en etal ñan Anij ilo men otemjej ikijjeen Jesus Christ. Nõbar im kajoor rej an ñan indeeo im indeeo. Amen.
12 Ro rejitõnbõro ippa, kom̦win jab bwilõñ kõn mãlejjoñ ko rel̦l̦ap* kom̦ij iiooni, im ãinwõt ñe rekããl aer wal̦o̦k ñan kom̦. 13 Bõtab, kom̦win m̦õn̦õn̦õ wõt kõnke kom̦ij eñtaan kõn ejja un ko wõt Christ ear eñtaan kaki. Ilo wãween in, kom̦ maroñ obrak kõn lañlõñ ilo iien eo enaaj wal̦o̦k aiboojoj eo an Christ. 14 Ñe rej kõnono n̦ae* kom̦ kõn etan Christ, kom̦ij m̦õn̦õn̦õ kõnke aiboojoj eo an Anij, aet jetõb kwõjarjar* eo an, ej pãd ippemi.
15 Ak ijjab kõn̦aan bwe jabdewõt iaami en eñtaan itok wõt jãn an ko̦o̦t, uror, kõm̦m̦ani men ko renana, im bõkjab ilo men ko ejjel̦o̦k an l̦o̦k ie. 16 Bõtab jabdewõt eo ej eñtaan kõnke ej juon Kũrjin, eokwe en jab jook, ak en wõnm̦aanl̦o̦k wõt im nõbar Anij ilo an bõk ãt in. 17 Bwe emoottok iien ekajet eo im ej ijjino ilo m̦weo im̦õn Anij. Ak kiiõ el̦aññe ej ijjino ippãd, ta eo enaaj wal̦o̦k ñan ro rejjab pokake ennaan eo em̦m̦an an Anij? 18 “El̦aññe ro rewãnõk rej aikuj lukkuun kate er bwe Anij en lo̦mo̦o̦ren er, ta eo enaaj wal̦o̦k ñan ro rej jum̦ae Anij im ro rijjerawiwi?” 19 Kõn men in, ro rej eñtaan kõn aer kõm̦anm̦an ankilaan Anij, ren wõnm̦aanl̦o̦k wõt im likũt mour ko aer ioon* ri-Kõm̦anm̦an eo etiljek, im ren bareinwõt wõnm̦aanl̦o̦k wõt im kõm̦m̦ani men ko rem̦m̦an.