Revelesõn

14 Innem iar reilo̦k im lo L̦aam̦ eo ej jutak ioon Tol̦ Zaion, im 144,000 rej pãd ippãn, ro em̦õj je etan im etan Jemãn ioon dem̦aer. 2 Iar roñ juon ainikien jãn lañ ãinwõt ainikien dãn ko rel̦l̦ap im ainikien jourur ko rel̦l̦ap; im ainikien eo iar roñ ear ãinwõt ainikien ri-al ro rej al im kõjañjañ kõn arp ko aer. 3 Im rej al im̦aan tũroon eo im im̦aan enjel̦ ro emãn im elder ro kõn juon al ãinwõt juon al ekããl, im ejjel̦o̦k juon emaroñ jel̦ã al in ijello̦kun wõt ro 144,000, ro kar wiaik er jãn lal̦. 4 Rein rar jab kattoon er make ippãn kõrã ro; ilo m̦ool, er bõjin. Errein ro rej wõnm̦aanl̦o̦k wõt im l̦oore L̦aam̦ eo ijoko jabdewõt ej etal iel̦o̦k. Kar wiaik er jãn ibwiljin armej ro ãinwõt jom̦õkaj ñan Anij im ñan L̦aam̦ eo, 5 im ejjel̦o̦k naanin etao ear wal̦o̦k jãn lo̦ñier; ejjel̦o̦k lippijinjin ippãer.

6 Im iar lo bar juon enjel̦ ej ekkãke imejatoto, im epãd ippãn ennaan eo em̦m̦an ej ñan indeeo bwe en kwal̦o̦ke ñan ro rej jokwe ioon lal̦, ñan aelõñ otemjej, bwij, kajin* im ñan armej otemjej. 7 Im ej ba ilo juon ainikien el̦ap: “Kom̦win mijak Anij im lel̦o̦k ñane aiboojoj, kõnke emoottok awa in ekajet armej, innem kom̦win kabuñ ñan Eo ear kõm̦anm̦an lañ im lal̦ im lo̦meto im unin dãn ko.”

8 Bar juon enjel̦, eo kein karuo, ear itok ãlikin enjel̦ eo juon im ear ba: “Ebuñ! Ebuñ Babil̦on El̦ap, e eo ear kaidaak aelõñ otemjej kõn wain in l̦õñ* eo an ekajoor!”

9 Im bar juon enjel̦, eo kein kajilu, ear itok ãlikierro im ej ba ilo juon ainikien el̦ap: “El̦aññe jabdewõt ej kabuñ ñan menninmour awiia eo im ekjab eo ekjabin, im em̦õj kõkal̦l̦eik dem̦an ak pein, 10 innem enaaj bareinwõt idaak jãn wain in illu eo an Anij ejjel̦o̦k kein kãre ie im kar lutõkl̦o̦k ñan cup in illu eo An, im armej in enaaj eñtaan kõn kijeek im sulfur* im̦aan mejãn enjel̦ ro rekkwõjarjar im L̦aam̦ eo. 11 Im baat eo jãn kijeek eo rej eñtaan kake ej wanlõñl̦o̦k ñan indeeo im indeeo. Im ro rej kabuñ ñan menninmour awiia eo im ekjab eo ekjabin im jabdewõt eo ear bõk kõkal̦l̦en ãt eo etan, rejjab kakkije raan im boñ. 12 Kõn men in, ro rekkwõjarjar rej aikuj kijenmej, ro rej l̦oore kien ko an Anij im rej dãpij wõt tõmak eo ilo* Jesus.”

13 Im iar roñ juon ainikien jãn lañ ej ba, “Kwõn je men in: Em̦õn̦õn̦õ ro rej mej ilo aer juon wõt ippãn Irooj jãn iien in m̦aanl̦o̦k. Innem jetõb kwõjarjar* ej ba, aet, kõtl̦o̦k aer kakkije jãn jerbal ko aer, kõnke men ko rej kõm̦m̦ani rej m̦õkaj im l̦oorel̦o̦k er.”*

14 Innem iar reilo̦k im lo juon kõdo̦ emouj, im eo ej jijet ioon ear ãinwõt nejin armej, im juon kũrawũn gold ej pãd ioon bõran im ej jibwe juon jikõl̦* ekkañ.

15 Im bar juon enjel̦ ej diwõjtok jãn jikin eo eokkwõjarjar ilo tampel̦ eo,* im ej lam̦õj ilo juon ainikien el̦ap ñan eo ej jijet ioon kõdo̦ eo im ba: “Kwõn jino kõjerbale jikõl̦ n̦e ippam̦ im m̦adm̦õd bwe emoottok awa in m̦adm̦õd, kõnke elukkuun kalo jonikkan in lal̦.” 16 Im eo ej jijet ioon kõdo̦ eo ear kõjerbal jikõl̦ eo ippãn n̦a ioon lal̦, im kar m̦adm̦õde lal̦ in.

17 Im bar juon enjel̦ ej diwõjtok jãn jikin eo eokkwõjarjar ilo tampel̦ eo ilañ, im ear bareinwõt wõr juon jikõl̦ ekkañ ippãn.

18 Innem bar juon enjel̦ ej diwõjtok jãn lokatok eo, im ewõr an maroñ ioon kijeek eo. Im ear lam̦õj ilo juon ainikien el̦ap ñan eo epãd jikõl̦ eo ekkañ ippãn, im ej ba: “Kwõn jino kõjerbale jikõl̦ n̦e ippam̦ im ae urorin kũreep ko ilo lal̦, kõnke ekalo leer.” 19 Innem enjel̦ eo ear kõjerbal jikõl̦ eo ippãn n̦a ioon lal̦, im ear aini kũreep ko ilo lal̦ im julo̦ki ñan lowaan jikin kõm̦m̦an wain eo el̦ap, eo ej kõkkar kõn illu eo an Anij. 20 Innem kar jujuuri kũreep ko inabõjin jikin eo, im bõtõktõk ear to̦o̦rl̦o̦k jãn jikin kõm̦m̦an wain eo, im joñan utiejen emaroñ tõpar to eo ej dãpij lo̦ñiin kidia ko, im ettol̦o̦kin ijo ear to̦o̦rl̦o̦k ñane ej 1,600 stadia.*