2 Korint
7 Kõn men in, ro rejitõnbõro ippa, kõnke epãd ippãd kallim̦ur kein, jen karreoik kõj jãn men otemjej rej kattoon ãnbwinnid* im l̦õmn̦ak* ko ad bwe jen maroñ lukkuun kwõjarjar ilo ad mijak Anij.
2 Kom̦win kõm̦m̦an jikim ilo bũruomi. Ejjel̦o̦k en̦ kõm nañin bõd n̦ae, ak kõjorrããne ak m̦on̦e bwe kõmin maroñ bõk tokjãn ñan kõm make. 3 Ijjab ba men in ñan n̦aruomi, kõnke ãinwõt aõ kar ba m̦oktal̦o̦k, kom̦ pãd ilo bũruem jekdo̦o̦n ñe jej mour ak ñe jenaaj mej. 4 El̦ap aõ peran ilo aõ kõnono ñan kom̦. El̦ap an utiej bũruõ kake kom̦. El̦ap an aenõm̦m̦an bũruõ, im ilo aolep apañ ko kõmij iiooni, el̦ap aõ lañlõñ.
5 Ilo m̦ool, ke kõmar tõparl̦o̦k Masedonia, ãnbwinnim* ear jab kakkije ñan jidik, im kõmar iioon apañ ilo wãween ko otemjej, kõmar iioon el̦ap jum̦ae jãn ilikin, im itulowa kõmar bareinwõt inepata. 6 Ijoke, Anij, eo ej kaenõm̦m̦an ro rej bũrom̦õj, ear kaenõm̦m̦an kõm ke Taitõs ear pãd ippem; 7 im ejjab kõn wõt an pãd ippem ak bareinwõt kõn an kar kwal̦o̦k kõn wãween ami kaenõm̦m̦ane. Ear kõnnaanek kõm kõn joñan ami kõn̦aan lo eõ, kõn an l̦ap ami bũrom̦õj, im kõn ami lukkuun kea* kõn ña. Kõn men in, ear l̦apl̦o̦k wõt aõ lañlõñ.
8 Jekdo̦o̦n ñe iar kabũrom̦õj kom̦ kõn lõta eo aõ, ijjab ajl̦o̦k kake. Im meñe imaroñ kar ajl̦o̦k kake ilo jinoin (ãinwõt ke lõta eo ear kabũrom̦õj kom̦, ijoke ium̦win jidik wõt iien), 9 ak ij lañlõñ kiiõ, ejjab kõn wõt ami kar bũrom̦õj, ak ej kõnke ami bũrom̦õj ear kõm̦akũt kom̦ ñan ukel̦o̦k. Kom̦ar bũrom̦õj ilo wãween eo ej kabuñbũruon Anij, eñin unin kom̦ij jab jorrããn kõn wõt kõm. 10 Bũrom̦õj ilo wãween eo ej kabuñbũruon Anij ej kõm̦akũt juon bwe en ukel̦o̦k, im men in ej tõll̦o̦k ñan an bõk lo̦mo̦o̦r, im eban ajl̦o̦k kake. Bõtab bũrom̦õj in lal̦ in ej tõll̦o̦k ñan mej. 11 Lale m̦õk men kein rej wal̦o̦k jãn ami lukkuun kate kom̦ kõn wõt ami bũrom̦õj ilo wãween eo ej kabuñbũruon Anij: ejako an nana etami, kom̦ dike men eo enana, kom̦ mijak Anij, kom̦ lukkuun kõn̦aan ukel̦o̦k, kom̦ lukkuun kijejeto, im kom̦ar kajim̦we men eo ebõd kom̦ar kõm̦m̦ane! Kom̦ar kaalikkar ilo men otemjej bwe kom̦ erreo* ilo men in. 12 Ke iar jejewaj ñan kom̦, iar jab kõm̦m̦ane men in ñan eo ear kõm̦m̦an bõd ak ñan eo kar bõd n̦ae, bõtab iar kõm̦m̦ane bwe en alikkar im̦aan mejãn Anij el̦aññe kom̦ij lukkuun kõn̦aan pokake kõm. 13 Eñin unin kõmij aenõm̦m̦an.
Kõmij jab aenõm̦m̦an wõt ak el̦apl̦o̦k am lañlõñ kõn an Taitõs lañlõñ kõnke kom̦ar aolep kõketake. 14 El̦aññe iar kõmjãje ñane kõn kom̦, ijjab jook kake men in kõnke ãinwõt an m̦ool aolep men ko kõmar ba ñan kom̦, ãindein an bar m̦ool men ko kõmij kõmjãje kaki ñan Taitõs. 15 Bareinwõt, el̦apl̦o̦k wõt an yokwe kom̦ ilo an keememejtok ami aolep pokake, im kõn ami kar karwaineneiki kõn mijak im wũdiddid.* 16 Ij lañlõñ kõnke ij lukkuun lõke kom̦* ilo men otemjej.