Hibru
13 En jab bõjrak ami yokwe jeimi im jatimi. 2 Jab mel̦o̦kl̦o̦k in kwal̦o̦k karwainene,* bwe ro jet rar kõm̦m̦ane men in im jaje ke ro rej kwal̦o̦k karwainene ñan er rej enjel̦. 3 Kom̦win keememej ro rej pãd ilo kalbuuj* im ãinwõt ñe kom̦ij kalbuuj ippãer, im bar ro enana an armej ro kõm̦m̦an ñan er kõnke kom̦ij bareinwõt pãd ilo ãnbwinnin kanniõk.* 4 Armej otemjej ren kautiej mourin m̦are im en jab ettoon jikin aer babu, bwe Anij enaaj ekajet ri-l̦õñ* otemjel̦o̦k im ro rej lejãn.* 5 Kom̦win jab arõk* jããn ñan jidik ilo wãween ami mour ak kom̦win jokwane kõn men ko ewõr ippemi, bwe ear ba: “Ijjãmin el̦l̦o̦k jãn eok im ijjãmin kõjekdo̦o̦n eok.” 6 Unin ej kõnke jen maroñ peran im ba: “Jeova* ej aõ rijjipañ, ijjãmin mijak. Ta eo armej remaroñ kõm̦m̦ane ñan eõ?”
7 Kom̦win keememej ro rej bõk jerbalin tõl ibwiljimi, ro rar kõnono naanin Anij ñan kom̦, im ilo ami kõl̦mãnl̦o̦kjen̦ kõn men ko rem̦m̦an rej wal̦o̦k jãn kõm̦m̦an ko aer, kom̦win l̦oore tõmak eo aer.
8 Jesus Christ eban oktak, inne, rainin, im ñan indeeo enaaj ãindein wõt.
9 Kom̦win jab kõtl̦o̦k bwe katak ko rekajjo wãweer im reoktak ren kõjebwãbweik kom̦. Em̦m̦anl̦o̦k ñe jouj eo el̦ap ej men eo ej kõkajoor bũruomi im en jab m̦õñã ko,* bwe ro rej dãpdep ilo men in rejjab bõk tokjãn.
10 Ewõr juon ad lokatok im ejjel̦o̦k an ro rej kõm̦m̦ani jerbal ko rekkwõjarjar ilo im̦õn kõppãd eo maroñ ñan kañi men ko ie. 11 Bwe bũrij l̦apl̦ap eo ej bõkl̦o̦k bõtõktõkin menninmour ko ñan jikin eo eokkwõjarjar bwe en ajel̦o̦k ãinwõt menin katok kõn jerawiwi ko, im ãnbwinnin menninmour ko rej tũli itulikin jikin kõppãd ko. 12 Ãindein Jesus ear bareinwõt eñtaan inabõjin wõrwõrin jikin eo bwe en kokkwõjarjar armej ro kõn bõtõktõkin make. 13 Kõn men in, jen etal ippãn ñan itulikin jikin kõppãd ko im kijenmej ilo menin kajjookok ko ear kijenmej kaki, 14 bwe ejjel̦o̦k juon jikid ijin enaaj pãdwõt indeeo, bõtab jej lukkuun kõttõpar jikin eo ej itok wõt. 15 Innem ikijjeen e, iien otemjej jen ajel̦o̦k ad menin katok in nõbar ñan Anij, aet leen tied, eo ej kwal̦o̦k kõn etan ilo̦bwilej. 16 Bareinwõt, jab mel̦o̦kl̦o̦k in kõm̦m̦an em̦m̦an im jipañ ro jet kõn men ko ewõr ippemi bwe Anij ej buñbũruon kõn menin katok rot kein.
17 Kom̦win pokake im kõttãik kom̦ ñan ro rej tõl ibwiljimi bwe ejjab bõjrak aer lale kom̦ kõnke renaaj aikuj in uwaak kõn wãween aer kõm̦m̦ane eddo in. El̦aññe kom̦ij ãindein, renaaj kõm̦m̦ane eddo in aer ilo lañlõñ, im jab ilo aer ñatñat bwe men in enaaj bõktok jorrããn ñan kom̦.
18 En jab bõjrak ami jar kõn kõm bwe kõmij lõke bwe am bõklõkõt em̦ool* im kõm kõn̦aan bwe en m̦ool ammim kõm̦m̦an ilo men otemjej. 19 El̦aptata ij akwel̦ap bwe kom̦win jar bwe en maroñ m̦õkaj aõ bar jepl̦aakwaj ñan ippemi.
20 Kiiõ Anij in aenõm̦m̦an, eo ear kõjerkak jãn mej ad Irooj Jesus, jabõt eo el̦ap an jiip ko, eo im epãd ippãn bõtõktõk eo kõn bujen eo ej ñan indeeo, 21 en lewaj ñan kom̦ men otemjej rem̦m̦an bwe kom̦win maroñ kõm̦anm̦an ankilaan, im en jerbal ilo kõj ikijjeen Jesus Christ bwe jen kõm̦m̦ani men ko ebuñbũruon kaki, aiboojoj en ilo̦k ñane ñan indeeo im indeeo. Amen.
22 Kiiõ ij akwel̦ap ñan kom̦ ro jeiũ im jatũ bwe kom̦win kanooj in roñjake naanin rõjañ in bwe ejjab lukkuun aetok lõta in iar je waj ñan kom̦. 23 Ikõn̦aan bwe kom̦win jel̦ã bwe em̦õj karõl̦o̦k jeid im jatid Timote. Ejjabto jãn kiiõ, ñe enaaj iwõj, inaaj iwõj ippãnwaj im lowaj kom̦.
24 Lel̦o̦k aõ naanin yokyokwe ñan aolep ran̦e rej tõl ibwiljimi im ñan aolep ro rekkwõjarjar. Ro ilo Itali rej lewaj aer yokwe.
25 Jouj eo el̦ap an Anij en pãd ippemi aolep.