Hibru

1 Ilo iien ko etto, elõñ iien im elõñ wãween ko Anij ear kõnono ñan ro jim̦m̦aad ikijjeen ri-kanaan ro. 2 Ak kiiõ, ilo jem̦l̦o̦kin raan kein, ej kõnono ñan kõj ikijjeen Nejin, eo ear kããlõte bwe en jolõt men otemjej, im kõn e, kar kõm̦m̦ane men ko ilo aolepen lañ im lal̦.* 3 Aiboojoj eo an Anij ej alikkar an wal̦o̦k ippãn, im ej lukkuun ãinwõt E ilo aolep wãween, bareinwõt ej dãpij men otemjej kõn naan eo an ekajoor. Ãlikin an kar karreoik kõj jãn jerawiwi ko ad, ear jijet ituanbwijmaroñin pein eo Eutiejtata ilañ. 4 Innem eutiejl̦o̦k jãn enjel̦ ro kõnke em̦õj an bõk juon ãt eutiejl̦o̦k jãn ãt ko etaer.

5 Ñan waanjoñak, wõn iaan enjel̦ ro Anij enañin kar ba ñane im ba: “Kwe kwõj nejũ; rainin em̦õj aõ erom jem̦am̦”? ak, “Inaaj erom jemãn, im enaaj erom nejũ”? 6 Bõtab ikijjeen iien eo enaaj bar jilkintok M̦aanje eo nejin ñan lal̦ in, ear ba: “Enjel̦ otemjej an Anij ren kwal̦o̦k kautiej* ñane.”

7 Bareinwõt, ej ba kõn enjel̦ ro: “Ej kõm̦m̦an bwe enjel̦ ro an ren jetõb ro rekajoor, im kõm̦m̦an bwe ri-jerbal ro an* ren ãinwõt urur in kijeek.” 8 Ak kõn Nejin, ej ba men in: “Anij ej am̦ tũroon ñan indeeo im indeeo, im jokon̦ in Aelõñ eo am̦* ej jokon̦ in wãnõk.* 9 Kwõj yokwe wãnõk im kwõj dike nana. Eñin unin Anij, aet am̦ Anij, ear kapit eok kõn weil̦ in kautiej el̦apl̦o̦k jãn ro jet m̦õttam̦.” 10 Bareinwõt ej ba: “Ilo jinoin, O Irooj, kwaar likũt pedped ko an lal̦, im lañ ko rej jerbal an peim̦. 11 Men kein renaaj jako, bõtab kwõnaaj pãdwõt; im renaaj m̦adeoñeoñl̦o̦k ãinwõt an nuknuk ko m̦orl̦o̦k, 12 im kwõnaaj limi men kein ãinwõt juon kopã, im ãinwõt juon nuknuk naaj kõkããli, bõtab kwe kwoban oktak, im iiõ ko am̦ reban jem̦l̦o̦k.”

13 Ak wõn iaan enjel̦ ro Anij enañin kar ba ñane im ba: “Kwõn jijet ituanbwijmaroñin peiũ m̦ae iien inaaj likũt ro rej kõjdate eok bwe ren eran neem̦”? 14 Ta ejjab er aolep jetõb ro rej kõm̦m̦ani jerbal ko rekkwõjarjar, im kar jilkinl̦o̦k er bwe ren jipañ ro renaaj bõk lo̦mo̦o̦r ke?