Luk

14 Ilo bar juon iien, Jesus ear etal im m̦õñã ilo m̦weo im̦õn juon iaan ri-tõl ro an Parisi ro ilo raanin Jabõt,* im ro rej pãd ijo rar lukkuun lale wãween an m̦akũtkũt. 2 Ekar wõr juon em̦m̦aan ej pãd ijo im̦aanin, im ewõr an nañinmej me ej kõm̦m̦an an ebbõj pein im neen. 3 Innem Jesus ear kajjitõk ippãn ro retijem̦l̦o̦k kõn Kien eo im ippãn Parisi ro im ba: “Emãlim ke ñan kõmour ri-nañinmej ilo raanin Jabõt ak jaab?” 4 Bõtab rar ikõñ. Kõn men in, ear likũt pein ioon em̦m̦aan eo im kõmouri, innem ear ba bwe en etal. 5 Ãlikin men in, ear ba ñan er: “El̦aññe l̦eo nejũm̦ ak juon nejũm̦ kau kom̦aan enaaj kar wõtlo̦k ilowaan juon aebõj lal̦ ilo raanin Jabõt, wõn iaami eban kar m̦õkaj im kotake lõñtak?” 6 Bõtab rar jab maroñ uwaake.

7 Ke ear lo an em̦m̦aan ro me kar kũrtok er kããlõt jikin ko rem̦m̦antata, ear kwal̦o̦k juon waanjoñak ñan er im ba: 8 “El̦aññe juon armej ej kũr eok ñan juon iien kõjota in m̦are, kwõn jab jijet ilo jikin ko rem̦m̦antata kõnke emaroñ wõr juon eo eutiejl̦o̦k jãn kwe em̦õj bar kũri. 9 Innem eo ear kũrtok komiro jim̦or enaaj iwõj im ba ñan kwe im ba, ‘Kwõn kõtl̦o̦k an l̦ein jijet ijen̦e.’ Kõn men in, kwõnaaj jook im etal im jijet ilo liktata. 10 Bõtab ñe renaaj kũr eok, kwõn etal im jijet iliktata kõnke ñe armej eo ear kũrtok eok enaaj itok, enaaj ba ñan kwe, ‘Jera, kwõn etal ñan im̦aan.’ Innem enaaj kautiej eok im̦aanin aolep ri-lotok ro jet. 11 Jabdewõt eo ej kautiej e make naaj kõttãiki, bõtab jabdewõt eo ej kõttãik e make naaj kautieje.”

12 Tokãlik, Jesus ear ba ñan em̦m̦aan eo ear kũrtok e im ba: “Ñe kwõj kõm̦m̦an iien m̦õñã ak kõjota, kwõn jab kũrtok ro m̦õttam̦, ak ro jeim̦ im jatũm̦, ak ro nukum̦, ak ro ri-turum̦ me rem̦weiie. Ñe kwõnaaj kõm̦m̦ane men in, juon iien remaroñ kũrl̦o̦k eok ñan m̦õko im̦weer bwe en on̦ããn jouj eo am̦. 13 Bõtab ñe kwõj kõm̦m̦an iien m̦õñã ko rel̦l̦ap, kwõn kũrtok ro rejeram̦õl, im ro rõkũrro, im ro rejaje etetal, kab ro repilo. 14 Ñe kwõnaaj kõm̦m̦ane men in, kwõnaaj m̦õn̦õn̦õ kõnke armej rein rejjab maroñ n̦aon̦ããn jouj eo am̦. Bõtab Anij enaaj n̦aon̦eam̦ ilo iien eo ro rewãnõk renaaj jerkakpeje.”

15 Ke juon iaan ri-lotok ro ijo ej roñ men kein, ear ba ñan Jesus: “Em̦õn̦õn̦õ armej eo enaaj m̦õñã* ilo Aelõñ eo an Anij.”*

16 Im Jesus eba ñane: “Ewõr juon em̦m̦aan ear kõm̦m̦ane juon kõjota el̦ap, im ear kũrtok elõñ armej. 17 Ear jilkinl̦o̦k ri-karejar* eo an ke ej iien kõjota bwe en ba ñan ro ear kũrtok er im ba, ‘Kom̦win itok kõnke aolep men im pojak kiiõ.’ 18 Bõtab er aolep rar jino kõm̦m̦an jekpen. Juon iaaer ear ba, ‘Iar wiaik juon wãto im ij aikuj etal im lale. Kwõn lukkuun jol̦o̦k aõ bõd ak ijjab maroñ iwõj.’ 19 Im bar juon ear ba, ‘Iar wiaik joñoul kau im ij etal im lale rem̦m̦an ke ñan aõ kõjerbali. Kwõn lukkuun jol̦o̦k aõ bõd ak ijjab maroñ iwõj.’ 20 Im bar juon eba, ‘Ijjab maroñ iwõj kõnke ej kab m̦õj aõ m̦are.’ 21 Kõn men in, ri-karejar eo ear jepl̦aaktok im ba ñan irooj eo an kõn aolep men kein. Innem irooj eo ear illu im ear ba ñan ri-karejar eo an, ‘Kwõn kaiur im etal ñan ial̦leplep ko im ial̦ ko reddik ilo bukwõn in, im bõktok ro rejeram̦õl im ro rõkũrro, im ro repilo kab ro rejaje etetal.’ 22 Ke ri-karejar eo ear jepl̦aaktok, ear ba, ‘Irooj, em̦õj aõ kõm̦m̦ane men eo kwaar ba, bõtab ej wõr wõt jikin ñan ro jet.’ 23 Innem irooj eo ear ba ñan ri-karejar eo an, ‘Kwõn diwõjl̦o̦k jãn bukwõn in im etal ñan ial̦ ko jet im ba ñan armej ro bwe ren itok bwe en obrak m̦wiin im̦õ. 24 Ij ba ñan kom̦ bwe ejjel̦o̦k juon iaan ro iar kũrtok er ilo jinoin enaaj edjoñi m̦õñã kein ilo iien kõjota in aõ.’”

25 Kiiõ ewõr juon jarlepju ear etal ippãnl̦o̦k, im ear oktakl̦o̦k ñan er im ba: 26 “El̦aññe jabdewõt armej ekõn̦aan bwe en juon ri-kal̦oora, ej aikuj l̦apl̦o̦k an yokwe ña jãn an yokwe* jemãn, ak jinen, ak lio pãleen, ak ajri ro nejin, ak ro jein im jatin, ak e make.* El̦aññe ejjab, innem ejjab maroñ ri-kal̦oora. 27 Jabdewõt eo ejjab ineek al̦al̦ in eñtaan* eo an im l̦oore eõ, ejjab maroñ ri-kal̦oora. 28 Ñan waanjoñak, el̦aññe jabdewõt iaami ekõn̦aan kalõk juon em̦ eutiej, ta eban m̦okta jijet im lale joñan jããn eo ej aikuji bwe en jel̦ã ebwe ke ñan an kadedel̦o̦k an kalõk m̦weo ke? 29 Ñe ejjab kõm̦m̦ane men in, emaroñ kadedel̦o̦k pedped eo bõtab ejab m̦õj m̦weo. Innem ro rej lo men in, renaaj kajjirere kake 30 im ba: ‘L̦ein ear jino ekkal ak ejjab maroñ kam̦õje.’ 31 Ak ewõr ke kiiñ en̦ 10,000 an rũttarin̦ae ak ej etal im tarin̦aeik bar juon kiiñ 20,000 an rũttarin̦ae, bõtab ejjab jijet m̦okta im pepe ippãn ri-kakapilõk ro an ñe emaroñ anjo̦? 32 El̦aññe ej kile bwe ejjab maroñ anjo̦, enaaj jilkinl̦o̦k jet an rũkkõnono im kajjitõk bwe en wõr aenõm̦m̦an ikõtaer ke ejja ettol̦o̦k wõt kiiñ eo juon. 33 Ilo ejja wãween in wõt, kom̦win jel̦ã bwe el̦aññe jabdewõt iaami ejjab ilo̦k jãn* aolep men ko m̦weien, innem eban ri-kal̦oora.

34 “Jo̦o̦l̦ el̦ap an em̦m̦an, bõtab el̦aññe ejako nemãn jo̦o̦l̦ eo, enaaj ewi wãween an bar jepl̦aak nemãn? 35 Enaaj jekkar ñan kãreiki ippãn bwidej ak ippãn kõn̦, im armej renaaj jol̦o̦ke. Eo ewõr lo̦jilñin ñan roñjake, en roñjake.”