Jerbal
6 Ilo tõre eo ke ear lõñl̦o̦k oran ri-kal̦oor ro, ri-Ju ro me rej kajin Grik rar ellotaane ri-Ju ro me rej kajin Hibru. Unin ej kõnke ilo iien ajej ko ilo kajjojo raan, rar jab lel̦o̦k kõj ko an kõrã ro rej kajin Grik me emej l̦õm̦aro pãleer. 2 Kõn men in, rijjilõk ro 12 rar kakobaiktok aolep ri-kal̦oor ro im rar ba ñan er: “Ejjab jim̦we* ñan am ilo̦k jãn naanin Anij* bwe kõmin ajej m̦õñã ilo tebõl̦. 3 Kõn men in, ro jeim im jatim, kom̦win kããlõt jimjuon em̦m̦aan jãn ibwiljimi me em̦m̦an etaer im robrak kõn mãlõtlõt im jetõb kwõjarjar.* Innem kõm naaj jitõñ er ñan bõk eddon jerbal in eaorõk. 4 Bõtab kõm naaj kõjerbal iien ko am ñan jar im katakin kõn naanin Anij.” 5 Innem ear em̦m̦an men in ippãn aolep ri-kal̦oor ro, im rar kããlõt Stipen, juon em̦m̦aan eo eobrak kõn tõmak im jetõb kwõjarjar.* Rar bar kããlõt Pilip, Prokorõs, Nikenor, Taimon, Parminas, im Nikolas, juon ri-Antiok me ear oktak ñan kabuñ eo an ri-Ju. 6 Rar bõktok em̦m̦aan rein ñan ippãn rijjilõk ro, innem ãlikin aer jare er, rar likũt peier ioer.
7 Innem naanin Anij ear ajeededl̦o̦k wõt im ear lukkuun lõñl̦o̦k wõt oran ri-kal̦oor ro ilo Jerusalem, im juon jarlepju el̦ap in bũrij rar oktak im rũttõmak.
8 Stipen ear obrak kõn jouj eo an Anij im kõn kajoor, im ear kõm̦m̦an menin kabwilõñlõñ ko rel̦l̦ap im kõkal̦l̦e ko ibwiljin armej ro. 9 Bõtab jet em̦m̦aan jãn doulul eo etan Im̦õn Kabuñ eo an ri-Anemkwõj, ekoba jet jãn Sairine, Alexandria, Silisia, im Eijia* rar wõnm̦aantak bwe ren akwããl ippãn Stipen. 10 Ijoke rar jab maroñ jum̦aiki Stipen kõnke ear kõnono ilo mãlõtlõt im kõn an jetõb kwõjarjar* kar jipañe. 11 Kõn men in, rar kareel jet em̦m̦aan ilo ittino bwe ren ba: “Kõmar roñ an l̦ein kwal̦o̦k naan ko relukkuun nana n̦ae Moses im Anij.” 12 Innem rar kairuj armej ro, ri-tõl ro, im skraib ro, im rar itok ñan ippãn ilo jidimkij im rar kajju jibwe im bõkl̦o̦ke ñan Im̦õn Ekajet eo El̦ap an ri-Ju.* 13 Im rar bõktok jet aer ri-kam̦ool bwe ren riab n̦ae e im ba: “L̦ein ejjab bõjrak jãn an kõnono n̦ae tampel̦ eo an Anij im n̦ae Kien eo. 14 Ñan waanjoñak, kõmar roñ an ba bwe Jesus ri-Nazeret enaaj rupe tampel̦ eo im enaaj ukote m̦anit ko Moses ear litok ñan kõj.”
15 Innem ke aolep ro rej jijet ilo Im̦õn Ekajet eo El̦ap an ri-Ju rej kalimjeke Stipen, rar lo bwe mejãn ej ãinwõt mejãn enjel̦.