Mark
15 Ej jibboñtata wõt ak bũrij ro reutiej, ri-tõl ro an ri-Ju ro, im skraib ro, ak jen ba aolep ro uwaan Im̦õn Ekajet eo El̦ap an ri-Ju,* rar kweilo̦k ippãn doon. Ãlikin, rar lukwõje pein Jesus im bõkl̦o̦ke ñan ippãn Pail̦at. 2 Innem Pail̦at ear kajjitõk ippãn im ba: “Kwe ke Kiiñ eo an ri-Ju?” Im ear uwaak im ba: “Ejim̦we am̦ ba.” 3 Bõtab bũrij ro reutiej rar n̦aruon Jesus kõn elõñ men. 4 Kõn men in, Pail̦at ear bar jino an kajitũkini im ba: “Etke kwõjjab uwaak? Lale joñan an lõñ men kein rej n̦aruom̦ kaki.” 5 Ak Jesus ear jab uwaak ñan jidik, im Pail̦at ear kanooj in bwilõñ.
6 Aolep iien ñe rej kõm̦m̦ane kwõjkwõjin kijoone eo, ekkã an Pail̦at karõl̦o̦k juon ri-kalbuuj ñan armej ro, jabdewõt eo armej ro rekõn̦aan bwe en rõl̦o̦k. 7 Ilo kar tõre in, ekar wõr juon em̦m̦aan ej pãd ilo kalbuuj etan Barabbas. Rar kalbuuji em̦m̦aan in im bar jet armej kõnke rar m̦anm̦an armej ilo iien eo rar jum̦ae kien. 8 Innem armej ro rar itok ñan ippãn Pail̦at im kajjitõk bwe en karõl̦o̦k juon ri-kalbuuj, ãinwõt an kõn kõm̦m̦ane ñan er. 9 Pail̦at ear uwaak im ba: “Kom̦ kõn̦aan ke bwe in karõl̦o̦k ñan kom̦ Kiiñ eo an ri-Ju?” 10 Pail̦at ear jel̦ã bwe bũrij ro reutiej rar ebbanbane Jesus im eñin unin rar liaakel̦o̦k ñane. 11 Bõtab bũrij ro reutiej rar kareel armej ro bwe ren kajjitõk ippãn Pail̦at bwe en karõl̦o̦k Barabbas, im jab Jesus. 12 Pail̦at ear bar kajjitõk ippãer im ba: “Innem ta eo in kõm̦m̦ane ñan em̦m̦aan in kom̦ij ba bwe ej Kiiñ an ri-Ju?” 13 Im armej ro rar bar lam̦õj im ba: “Dilaiki ilo jurõn al̦al̦!” 14 Bõtab Pail̦at ear ba: “Etke? Ta eo enana ear kõm̦m̦ane?” Ak armej ro rar kõl̦l̦aajl̦o̦k wõt ainikieer im ba: “Dilaiki ilo jurõn al̦al̦!” 15 Kõn an Pail̦at kar kõn̦aan kabuñbũruon armej ro, ear karõl̦o̦ke Barabbas ñan er; ear jiroñ rũttarin̦ae ro bwe ren deñl̦o̦ke Jesus, im ear lel̦o̦ke ñan er bwe ren m̦ane ilo aer dilaiki ilo jurõn al̦al̦.
16 Innem rũttarin̦ae ro rar bõkl̦o̦ke ñan ilowaan mel̦an m̦weo im̦õn kom̦ja* eo, im rar kũrtok aolep rũttarin̦ae ro. 17 Im rar kanuknuki kõn juon nuknuk piolõt, im rar kõm̦m̦ane juon kũrawũn jãn kãlõklõk im likũti ioon bõran, 18 im rar ba: “Yokwe eok, Kiiñ en̦ an ri-Ju!” 19 Bareinwõt, rar deñl̦o̦ke bõran kõn juon al̦al̦ im rar kaplouki, im rar bukwelõlõ im badikdik * ñane. 20 Ãliktata, ãlikin aer kar kõm̦m̦an kõjak kake, rar utũki nuknuk piolõt eo im bar kanuknuki kõn nuknuk ko an. Innem rar ãñinl̦o̦ke bwe ren dilaiki ilo jurõn al̦al̦. 21 Bareinwõt, rar iioone juon em̦m̦aan in Sairine etan Saimõn ej jibadektok jikin eo. Em̦m̦aan in ej jemãn Alexander im Rufõs. Rũttarin̦ae ro rar kõm̦akokoiki bwe en ineeke al̦al̦ in eñtaan* eo an Jesus.
22 Rar bõkl̦o̦ke ñan jikin eo etan Golgota, mel̦el̦ein naan in ñe jej ukote ej, “Jikin L̦atin Bar.” 23 Innem rar kajjioñ kaidaake wain em̦õj kãreiki kõn mõr,* bõtab ear jab idaak. 24 Innem rar dilaiki n̦a ilo jurõn al̦al̦, im rar kũbween kijdik ñan ajeji nuknuk ko an bwe ren jel̦ã ta eo kajjojo iaaer en bõke. 25 Kar 9 awa jim̦a ilo jibboñ* ke rar dilaiki n̦a ilo jurõn al̦al̦. 26 Rekar likũti juon jain itulõñin bõran ñan kwal̦o̦k ta eo rej n̦aruon kake. Jain eo ej ba: “Eñin ej Kiiñ eo An Ri-Ju.” 27 Bareinwõt, rar bõktok ruo ri-ko̦o̦t im totoiki erro ilo jurõn al̦al̦ ko iturin Jesus, juon ituanmoon̦in im eo juon ituanmiiñin. 28 *—— 29 Im ro rar etetal ijo tok rar kajjirere kake e im kajjeboululi bõraer im ba: “A, ãinwõt kwaar ba bwe kwõmaroñ rupe tampel̦ eo im bar kalõke ium̦win jilu wõt raan, 30 eokwe kwõn lo̦mo̦o̦ren eok make im karõl̦o̦k eok make jãn al̦al̦ in eñtaan* n̦e.” 31 Bareinwõt, bũrij ro reutiej im skraib ro rar kõm̦m̦an kõjak kake im ba ñan doon: “Ejel̦ã lo̦mo̦o̦ren ro jet ak ejaje lo̦mo̦o̦ren e make! 32 Jen m̦õk lale an Christ, Kiiñ in Israel n̦e karõl̦o̦k e make jãn al̦al̦ in eñtaan* n̦e bwe jen loe im tõmake.” Ri-ko̦o̦t ro me rar ettoto ilo jurõn al̦al̦ ko iturin rar bar kajjirere kake e.
33 Ke ear 12 awa jim̦a,* ear jok marok ioon aolepen ãneo l̦o̦k ñan 3 awa jim̦a* ãlikin raelep. 34 Im ke ej 3 awa jim̦a,* Jesus ear lam̦õj kõn juon ainikien el̦ap im ba: “Eli, Eli, lama sabaktani?” mel̦el̦ein naan kein ñe jej ukote ej: “Aõ Anij, aõ Anij, etke kwaar ilo̦k jãn eõ?” 35 Ke jet iaan armej ro rar jutak ijo rar roñ an ba men in, rar ba: “Lale m̦õk! Ej kũri Ilaija.” 36 Innem juon iaan armej ro ear ettõrl̦o̦k im katutuuki juon matmat ilo wain meo̦, im ear lelõñl̦o̦k kõn juon al̦al̦ bwe Jesus en idaak, im ear ba: “Jen kõttar im lale Ilaija eitok ke im lelal̦tak.” 37 Innem Jesus ear lam̦õj kõn juon ainikien el̦ap im ear mej.* 38 Im katiiñ eo ilowaan jikin eo eokkwõjarjar ilo tampel̦ eo ear potak jãn lõñ ñan lal̦ ilo ruo m̦õttan. 39 Kapen eo an jarin tarin̦ae ear jutak ijo ikijjeen Jesus, im ear lo an men kein aolep wal̦o̦k ke Jesus ear mej. Kõn men in ear ba: “Lukkuun m̦ool ke em̦m̦aan in ej Nejin Anij.”
40 Ekar bar wõr kõrã ijo rej reitok jãn juon jikin ettol̦o̦k. Jet iaan kõrã rein ej Meri Magdalini, Selome, im Meri jinen Jemes eo edik* im Joses. 41 Kõrã rein rekõn l̦oore Jesus im jipañe ke ear pãd ilo Galili. Ebar lõñ kõrã ro jet ijo me rar itok ippãn Jesus tok ñan Jerusalem.
42 Ilo tõre in ekar jino jotal̦o̦k, im kõnke ekar jejjet raanin Kõppojak eo,* ak raan eo m̦okta jãn Jabõt,* 43 Josep, juon ri-Arimatia, ear peran im jãdel̦o̦k ñan ippãn Pail̦at im kajjitõk an bõk ãnbwinnin Jesus. Em̦m̦aan in ear juon eo el̦ap an armej ro lõke, im ear ro uwaan Im̦õn Ekajet eo El̦ap an ri-Ju, im ear bar juon iaan ro rar kõttare Aelõñ eo an Anij.* 44 Pail̦at ear kõn̦aan jel̦ã el̦aññe em̦õj an mej. Kõn men in, ear kũrtok kapen in jarin tarin̦ae eo im kajjitõk el̦aññe emej Jesus. 45 Innem ãlikin an kam̦oole jãn kapen eo bwe em̦õj an mej, ear kamãlim an Josep bõk ãnbwin eo. 46 Ãlikin an Josep wiaik juon m̦õttan nuknuk* ekanooj em̦m̦an, ear doorlal̦l̦o̦k ãnbwin eo im kũtimi kõn m̦õttan nuknuk eo. Innem ear likũti ãnbwin eo ilo juon lõb * kar kõm̦m̦ane itõrerein juon tol̦, im ear kadãpill̦o̦k juon dekã kileplep bwe en pinej mejãn lõb eo. 47 Bõtab Meri Magdalini im Meri eo jinen Joses rar pãdwõt ijo, im rel̦akkar reilo̦k ñan ijo rar kõbabuuki ie.