Jon
19 Kõn men in, Pail̦at ear ba bwe ren bõk Jesus im deñl̦o̦ke. 2 Innem rũttarin̦ae ro rar kõm̦m̦ane juon kũrawũn jãn kãlõklõk im likũti ioon bõran, im rar kanuknuki kõn juon nuknuk piolõt, 3 im ear jab bõjrak aer wõnm̦aantak ñan ippãn im ba: “Yokwe eok, Kiiñ en̦ an ri-Ju!” Ear jab bar bõjrak aer jeptake. 4 Pail̦at ear bar diwõjl̦o̦k ñan ippãn armej ro im ba: “Ij kadiwõjtok bwe kom̦win jel̦ã ke ijjab ellolo ruõn.” 5 Innem Jesus ear diwõjl̦o̦k ak ej kũrawũn kõn kãlõklõk im ej kõn̦ak juon nuknuk piolõt, im Pail̦at ear ba ñan er: “Eñin ej em̦m̦aan eo!” 6 Bõtab ke bũrij ro reutiej im ri-waj ro rar loe, rar lam̦õj im ba: “Dilaiki ilo jurõn al̦al̦! Dilaiki ilo jurõn al̦al̦!” Ak Pail̦at ear ba ñan er: “Kom̦win make bõke im m̦ane* bwe ijjab lo ruõn.” 7 Innem ri-Ju ro rar uwaak im ba: “Ewõr juon ammim kien, im ekkar ñan kien in l̦õn̦e ej aikuj mej, kõnke ej make ba bwe e nejin Anij.”
8 Ke Pail̦at ear roñ naan kein aer, ear l̦apl̦o̦k wõt an mijak, 9 im ear bar del̦o̦ñl̦o̦k ilo m̦weo im̦õn im ear ba ñan Jesus: “Kwõj itok jãn ia?” Bõtab Jesus ear jab uwaake. 10 Kõn men in, Pail̦at ear ba ñane: “Kwõm̦akoko in kõnnaantok ñan ña ke? Ta kwõjjab jel̦ã bwe ewõr aõ maroñ ñan karõl̦o̦k eok im ebar wõr aõ maroñ ñan m̦an eok ke?”* 11 Jesus ear uwaak im ba: “El̦aññe kar jab lewaj maroñ ñan kwe jãn lañ, eban kar wõr am̦ maroñ ioõ. Eñin unin armej eo ear liaakewaj ña ñan kwe el̦apl̦o̦k an jerawiwi* jãn kwe.”
12 Kõn men in, Pail̦at el̦akkar pukot kilen an karõl̦o̦ke, ak ri-Ju ro rar lam̦õj im ba: “El̦aññe kwõnaaj karõl̦o̦ke l̦õn̦e, ealikkar bwe kwõjjab jeran Sizar.* Jabdewõt eo ej make kõm̦m̦an bwe en kiiñ ej jum̦ae* Sizar.” 13 Ke Pail̦at ear roñ naan kein, ear kadiwõjtok Jesus im ear etal im jijet ilo jea in ekajet eo ilo jikin eo etan Pedpedin Dekã, ak etan ilo kajin Hibru ej Gabbeta. 14 Kiiõ ear jejjet raanin Kõppojak eo ñan Kwõjkwõjin Kijoone* eo, im ilo tõre in ekar 12 awa jim̦a* ilo raelep. Innem Pail̦at ear ba ñan ri-Ju ro: “Eñin ej kiiñ eo ami!” 15 Bõtab rar lam̦õj im ba: “M̦an l̦õn̦e! M̦an l̦õn̦e! Dilaiki ilo jurõn al̦al̦!” Im Pail̦at ear ba ñan er: “Kom̦ kõn̦aan bwe in m̦an kiiñ e ami ke?” Bũrij ro reutiej rar uwaak im ba: “Ejjel̦o̦k bar ammim kiiñ ijello̦kun wõt Sizar.” 16 Kõn men in, ear lel̦o̦ke ñan er bwe ren m̦ane ilo aer dilaiki ilo jurõn al̦al̦.
Innem rar bõk Jesus jãn ijo, 17 im ear make ineek al̦al̦ in eñtaan* eo ñan jikin eo etan L̦atin Bar, im etan ilo kajin Hibru ej Golgota. 18 Innem rar dilaiki ilo jurõn al̦al̦ iturin ruo em̦m̦aan, juon ituanmiiñin im eo juon ituanmoon̦in, im Jesus ear pãd iol̦apeerro. 19 Pail̦at ear je juon jain im likũti itulõñin al̦al̦ in eñtaan* eo. Naan ko ie rej ba: “Jesus Ri-Nazeret Kiiñ eo An Ri-Ju.” 20 Elõñ ri-Ju rar riiti jain eo kõnke ijo rar dilaiki Jesus ie ilo jurõn al̦al̦ eo ear pãd iturin Jerusalem. Kar je jain eo ilo kajin Hibru, Latin, im Grik. 21 Bõtab bũrij ro reutiej rar ba ñan Pail̦at: “Kwõn ukote jain en̦ jãn an ba, ‘Kiiñ eo an ri-Ju,’ ñan men eo l̦een̦ ear ba, ‘Ña Kiiñ eo an ri-Ju.’” 22 Pail̦at ear uwaak: “Men eo em̦õj aõ je, iban ukote.”
23 Ãlikin an rũttarin̦ae ro dilaiki Jesus ilo jurõn al̦al̦ eo, rar bõk nuknuk ko an im ajeji ilo emãn m̦õttan, juon m̦õttan ñan juon rũttarin̦ae, im rar bar bõk nuknuk eo ej kõn̦ake ilowa. Nuknuk in em̦õj ãje jãn lõñ ñan lal̦ im ejjel̦o̦k annañin keke ie. 24 Kõn men in, rar kõnnaan ñan doon im ba: “Jen jab kekõle ak jen kũbween kijdik im lale wõn eo enaaj bõke.” Men in ear wal̦o̦k ñan kajejjet kũtien eoon eo ej ba: “Rar ajeji nuknuk ko aõ ñan doon im kũbween kijdik kõn nuknuk ko aõ.” Rũttarin̦ae ro rar kõm̦m̦ani men kein.
25 Jinen Jesus im lio jatin jinen, kab Meri lio pãleen Kliopas, im Meri Magdalini rar jutak iturin al̦al̦ in eñtaan* eo. 26 Ke Jesus ear lo an jinen im ri-kal̦oor eo ej yokwe jutak ijo, ear ba ñan jinen: “Jinõ, jãn kiiõ im etal, nejũm̦ likao n̦e!” 27 Ãlikin, ear ba ñan ri-kal̦oor eo: “Jãn kiiõ im etal, jinõm̦ kõrã n̦e!” Innem jãn iien eo m̦aanl̦o̦k, ri-kal̦oor eo ear bõk Meri ñan m̦weo im̦õn.
28 Tokãlik ke Jesus ear kile bwe aolep men im dedel̦o̦k, ear ba: “Imaro.” Ear ba men in ñan kajejjet kũtien men eo Jeje ko rej ba. 29 Ear wõr juon jãpe ebool̦ kobban kõn wain meo̦ ej pãd ijo, innem rar katutuuk juon matmat kõn wain meo̦ eo im likũti ilo juon ra* im lelõñl̦o̦k ñan lo̦ñiin. 30 Ãlikin an nemake wain meo̦ eo, ear ba: “Ededel̦o̦k!” Innem ear jillo̦k im jol̦o̦k kũtuon.*
31 Im kõnke ekar raanin Kõppojak* men eo, ri-Ju ro rar kajjitõk ippãn Pail̦at bwe ren bwilo̦ke neen ro ilo al̦al̦ in eñtaan ko im bõk ãnbwinnier jãn ijo. Unin ej kõnke rejjab kõn̦aan bwe ãnbwin ko ren pãdwõt ilo al̦al̦ ko ñan raanin Jabõt* (kõnke Jabõt jab in ejej uwaan). 32 Innem rũttarin̦ae ro rar itok im bwilo̦ke neen em̦m̦aan ro rar ettoto iturin Jesus. 33 Ak ke rar tõpar Jesus, rar lo bwe em̦õj an mej, innem rar jab bwilo̦ke neen. 34 Bõtab juon iaan rũttarin̦ae ro ear wãkare katin kõn juon m̦ade, im ear kajju to̦o̦r bõtõktõk im dãn. 35 Eo ear lo men in ear kwal̦o̦k kake, innem em̦ool men in ear kwal̦o̦ke. Ejel̦ã bwe men ko ej ba rem̦ool, im ej ba men kein bwe kom̦win maroñ tõmak. 36 Ilo m̦ool, men kein rar wal̦o̦k bwe en jejjet kũtien eoon eo ej ba: “Ejjel̦o̦k juon iaan di ko diin enaaj bwilo̦k.” 37 Bar juon eoon ej ba: “Renaaj reilo̦k ñan eo rar wãkare.”
38 Ãlikin men kein, Josep jãn Arimatia ear kajjitõk ippãn Pail̦at ñe emaroñ bõk ãnbwinnin Jesus. Em̦m̦aan in ear juon iaan ri-kal̦oor ro an Jesus, bõtab ilo ittino wõt, kõn an mijak ri-Ju ro.* Ãlikin an Pail̦at lel̦o̦k mãlim, Josep ear ilo̦k im bõk ãnbwin eo. 39 Nikodimõs, em̦m̦aan eo ear lol̦o̦k Jesus ilo boñ kar m̦oktal̦o̦k, ear bar itok im ear bõktok juon tũroro in mõr* im aloe, eddon ej enañin 100 bo̦un.* 40 Innem rar bõk ãnbwinnin Jesus im kũtimi kõn m̦õttan nuknuk ippãn kein tol̦aj ko, ekkar ñan m̦antin kallib ko an ri-Ju. 41 Ear wõr juon jikin kallib ilo ijo rar m̦ane* ie, im ilo jikin kallib in, ear wõr juon lõb* kããl im ejjañin wõr en̦ enañin kõjerbale. 42 Rar likũti ãnbwinnin Jesus ilo lõb in kõn an epaak im kõnke raan eo ej raanin Kõppojak* eo an ri-Ju ro.