Mark
11 Ke rar epaakel̦o̦k Jerusalem, rar bõjrakl̦o̦k ilo Tol̦ Olive, ijo bukwõn ko etaer Betpeje im Betani rej pãd ie. Innem ear jilkinl̦o̦k ruo iaan ri-kal̦oor ro an, 2 im ear ba: “Komiro iwõj ñan bukwõn n̦e im̦aan im ñe komiro tõparl̦o̦k, komiro naaj lo juon koon in donkey em̦õj lukwõje im ejjel̦o̦k en̦ enañin kar uwe ioon ñan kiiõ. Komiro en jel̦ate im bõktok ñan ijin. 3 Im ñe jabdewõt enaaj ba, ‘Etke komiro ej jel̦ate koon n̦e?’ komiro en ba, ‘Irooj ej aikuji, im enaaj m̦õkaj an bar karo̦o̦letok.’” 4 Innem rar etal im loe koon eo em̦õj lukwõje ilo kõjãmin juon em̦ ej pãd iturin ial̦, im erro ar jel̦ate. 5 Bõtab jet iaan armej ro rej jutak ijo rar ba: “Etke komiro ej jel̦ate koon n̦e?” 6 Im ri-kal̦oor ro rar ba men ko Jesus ear jiroñ erro bwe ren ba, im armej ro rar kõtl̦o̦k er.
7 Innem rar bõktok koon in donkey eo ñan ippãn Jesus, im rar ere ioon kõn kopã ko aer, im ear uwe ioon. 8 Bareinwõt, elõñ armej rar erl̦o̦ki kopã ko aer ioon ial̦ eo, ak ro jet rar jekjek tok kimej jãn mel̦aaj ko. 9 Ro rar etal im̦aaninl̦o̦k im ro rar etal ilikinl̦o̦k rar jab bõjrak jãn aer kõl̦l̦aaj ainikieer im ba: “O Anij, kwõn kõjparoke em̦m̦aan in! Ejeraam̦m̦an wõt eo ej itok ilo etan Jeova!”* 10 Ejeraam̦m̦an wõt Aelõñ eo ej itok, eo ej an jemãd Devid! Kwe eo kwõj pãd ijo eutiejtata ilañ, kwõn kõjparoke!” 11 Im ear del̦o̦ñl̦o̦k ilo Jerusalem im etal ñan tampel̦ eo, im ear lale men otemjej ie. Bõtab kõn an jino jok marok, e im rijjilõk ro 12 rar ilo̦k ñan Betani.
12 Raan eo tok juon, ke rar etal jãn Betani, Jesus ear jino kwõle. 13 Innem ear reilo̦k im lo juon wõjke fig ettol̦o̦k im ewõr bwilikõn, im ear etal bwe en lale ñe ewõr leen. Bõtab ke ear tõparl̦o̦k wõjke eo, ear lo bwe ejjel̦o̦k leen ak bõlõk wõt, kõnke ejjañin iien an wõjke fig kalle. 14 Kõn men in, ear ba ñan wõjke eo: “Ejjel̦o̦k en̦ enaaj bar m̦õñã jãn leem̦ ñan indeeo.” Ri-kal̦oor ro rar roñ an ba men in.
15 Innem rar itok ñan Jerusalem, im ear del̦o̦ñl̦o̦k ilo tampel̦ eo im jino kadiwõjl̦o̦k ri-wiakake ro im armej ro rej wia ilo tampel̦ eo. Ear ukõji tebõl̦ ko an ro rej jãnij jããn im jea ko an ro rej wiakake m̦ul̦e, 16 im ear jab kõtl̦o̦k an jabdewõt armej bõktok jabdewõt kein jerbal ilowaan tampel̦ eo tok. 17 Bareinwõt, ear katakin armej ro im ba ñan er: “Ta kom̦ij jab jel̦ã ta eo Jeje ko rej ba ke? ‘Naaj likũt m̦weo im̦õ bwe en jikin an armej in aelõñ otemjej jar,’ bõtab em̦õj ami ukote bwe en im̦õn ri-ko̦o̦t.” 18 Bũrij ro reutiej im skraib ro rar roñ men in im rar pukot kilen aer m̦ane. Unin ej kõnke remijake kõn an armej ro wõj bwilõñ kõn katak ko an.
19 Im ke ear jota, Jesus im ri-kal̦oor ro rar diwõjl̦o̦k jãn Jerusalem. 20 Jimmarokin raan eo juon, ke rar bar ilo̦k ilo ial̦ eo l̦o̦k, rar lo wõjke fig eo ak em̦õj an mej jãn okran lõñtak. 21 Piter ear keememej ta eo ear wal̦o̦k, im ear ba ñane: “Rabbai,* lale m̦õk wõjke en̦ kwaar ko̦o̦le, em̦õj an mej.” 22 Im Jesus ear jiroñl̦o̦k er im ba: “Kom̦win tõmak ilo Anij. 23 Ij ba ñan kom̦ bwe jabdewõt eo enaaj ba ñan tol̦ in im ba, ‘Kwõn em̦m̦akũt jãn ijin im jok ilo̦jet,’ im ejjel̦o̦k an pere ñan jidik ilo bũruon ak ej tõmak bwe men eo ej ba enaaj wal̦o̦k, innem enaaj tõprak men eo ej ba. 24 Eñin unin ij ba ñan kom̦ bwe aolep men ko kom̦ij jar im kajjitõk kaki, kom̦win tõmak bwe em̦õj kadede ami bũki, innem renaaj ami. 25 Ñe kom̦ij jutak im jar, kom̦win jol̦o̦k an ro jet bõd ñe ear wõr rueer ippemi. Innem Jememi, eo ej pãd ilañ, enaaj bar jol̦o̦k bõd ko ami.” 26 *——
27 Tokãlik rar bar etal ñan Jerusalem. Im ke Jesus ear etetal ilo tampel̦ eo, bũrij ro reutiej im skraib ro im ri-tõl ro an ri-Ju ro rar itok ñan ippãn 28 im ba: “Wõn n̦e ear kõmaroñ eok bwe kwõn kõm̦m̦ani men kein? Im kwaar bõk jãn ia am̦ mãlim?” 29 Jesus ear uwaak er im ba: “In kajjitõk juon kajjitõk ippemi m̦okta. Kom̦win uwaak eõ im inaaj kwal̦o̦k ñan kom̦ wõn eo ear kõmaroñ eõ bwe in kõm̦m̦ani men kein. 30 Wõn eo ear kõmaroñ Jon bwe en peptaiji armej ro, Anij* ke ak armej? Kom̦win uwaake eõ.” 31 Innem rar jino kõnnaan ñan doon im ba: “Ñe jeba, ‘Anij,’ enaaj ba, ‘Innem etke kom̦ar jab tõmake?’ 32 Bõtab ñe jeba, ‘Armej,’ ta eo enaaj wal̦o̦k ñan kõj?” Rar mijak armej ro kõnke armej ro rar watõk Jon bwe ej juon ri-kanaan. 33 Kõn men in, rar uwaake Jesus im ba: “Kõm jaje.” Im Jesus eba: “Ñe ãindein, iban kwal̦o̦k ñan kom̦ wõn eo ear kõmaroñ eõ ñan kõm̦m̦ani men kein.”