Revelesõn

18 Ãlikin men in, iar bar lo juon enjel̦ ej wanlal̦tak jãn lañ im el̦ap maroñ ippãn, im ear romaak lal̦ in kõn aiboojoj eo an. 2 Im ear lam̦õj ilo juon ainikien el̦ap im ba: “Ebuñ! Ebuñ Babil̦on El̦ap, im em̦õj an erom juon jikin jokwe ñan jetõb ko rettoon,* im jetõb ettoon* otemjej im aolep bao ko rettoon im renana rej pãd ie! 3 Im kõn wain in l̦õñ* eo an ekajoor, ri-aelõñ otemjej rar buñ im jorrããn, im kiiñ ro an lal̦ rar l̦õñ ippãn im ri-wiakake ro* an lal̦ rar m̦weiie kõn wõt m̦weiuk ko raorõk kõrã in ear koorl̦o̦ki im ejjab jook kaki.”

4 Im iar bar roñ juon ainikien jãn lañ ej ba: “Armej ro aõ, kom̦win diwõjtok jãne el̦aññe kom̦ij jab kõn̦aan bwe en wõr ruomi ilo jerawiwi ko an, im el̦aññe kom̦ij jab kõn̦aan bõk m̦õttan menin kaeñtaan ko an. 5 Bwe jerawiwi ko an rar lõñl̦o̦k im tõpar lañ, im Anij ear keememej jerbal ko an rejjab jim̦we.* 6 Innem ukotl̦o̦k ñane ekkar ñan wãween an kar kõm̦m̦an ñan ro jet, aet, ukotl̦o̦k ñane ruo alen l̦apl̦o̦k jãn men ko ear kõm̦m̦ani; ilo cup eo ear kãreiki, kom̦win kãreiki ruo alen l̦apl̦o̦k ñane. 7 Kõm̦m̦an bwe en eñtaan im bũrom̦õj ekkar ñan joñan eo ear kaiboojoj e make im joñan m̦weiuk ko raorõk ear koorl̦o̦ki im ejjab jook kaki. Bwe ejjab bõjrak an ba ilo bũruon: ‘Ij jijet ãinwõt lerooj, im ijjab juon kõrã eo ejako pãleen, im ijjãmin lo bũrom̦õj.’ 8 Eñin unin ilowaan wõt juon raan, menin kaeñtaan kein, mej, bũrom̦õj im ñũta renaaj wal̦o̦k ñane, im enaaj kanooj bwil ilo kijeek kõnke Jeova* Anij, eo ear ekajete, ekajoor.

9 “Im kiiñ ro an lal̦, ro rar l̦õñ* ippãn im bõk m̦õttan m̦weiuk ko raorõk ear koorl̦o̦ki me ejjab jook kaki, renaaj jañ im lukkuun bũrom̦õj* kake ñe renaaj lo baat in an bwil. 10 Renaaj jutak jãn juon jikin ettol̦o̦k kõn aer mijak kõn an eñtaan, im renaaj ba: ‘Jerata, jerata ñan kwe Babil̦on, jikin eo el̦ap im ekajoor, kõnke ilowaan wõt juon awa ekajet eo am̦ emoottok!’

11 “Bareinwõt, ri-wiakake ro an lal̦ rar jañ im bũrom̦õj kake e, kõnke ejjel̦o̦k ej bar wiaik m̦weiuk ko aer, 12 aolep m̦weiuk ko aer ãinwõt gold, jelba, pearl, m̦õttan nuknuk* ko relukkuun em̦m̦an, m̦õttan ko repiolõt, remeoeo, im rebũrõrõ; im men otemjej kõm̦m̦an jãn al̦al̦ ñaj, jãn ivory, al̦al̦ ko raorõk, kõba, aen, im dekã ko elõñ kain kõl̦arier; 13 ekoba cinnamon, im juon kein kãre jãn India, menin kaijurjur, weil̦ eñaj, ijur, wain, olive weil̦, pilawã ko rem̦m̦an, wiit, kau, jiip, kidia, jariot, ri-kõm̦akoko ro, im mour an armej. 14 Aet, leen wõjke ko rekalo kwaar ijol̦i em̦õj aer jako, im aolep m̦õñã ko renno̦ ippam̦ im men ko rekanooj em̦m̦an em̦õj aer jako, im kwõjjãmin bar loi.

15 “Ri-wiakake ro rar wiakaki men kein, ro rar m̦weiie kõn wõt e, renaaj jutak jãn juon jikin ettol̦o̦k kõn aer mijak kõn an eñtaan im renaaj jañ im bũrom̦õj, 16 im renaaj ba: ‘Jerata, jerata, bwe jikin eo el̦ap, eo ej kõn̦ak nuknuk* ekanooj em̦m̦an, epiolõt im bũrõrõ, im el̦ap an lõtlõt kõn gold, dekã ko raorõk im pearl, 17 em̦õj rakimi m̦weiuk kein rel̦l̦ap ilowaan wõt juon awa!’

“Im aolep kapen in waan ejjerakrõk ko, im aolep ro rej uwe im ejjerakrõk, im jel̦a ro kab aolep ro rej bõk aer mour jãn aer ejjerakrõk ilo̦meto rar jutak jãn juon jikin ettol̦o̦k 18 im ke rar reilo̦k im lo baatat in an bwil, rar lam̦õj im ba: ‘Ewõr ke bar juon jikin ãinwõt jikin in el̦ap?’ 19 Im rar illik bũñal ioon bõraer im jañ im bũrom̦õj, im rar lam̦õj im ba: ‘Jerata, jerata, bwe jikin eo el̦ap, eo im kõn wõt an m̦weiie, ear kõm̦m̦an bwe aolep ro ewõr waer waan ejjerakrõk ilo̦meto ren m̦weiie, em̦õj rakimi ilowaan wõt juon awa!’

20 “Kom̦ ro ilañ, kom̦win m̦õn̦õn̦õ kõn men eo ear wal̦o̦k ñane, im bareinwõt kom̦ ro rekkwõjarjar, rijjilõk ro, im ri-kanaan ro, kõnke kõn wõt kom̦, Anij ear kwal̦o̦k ekajet eo an n̦ae kõrã in!”

21 Im juon enjel̦ ekajoor ear kotake juon dekã ãinwõt dekein irir* ekilep, im ear jol̦o̦ke n̦a ilo̦meto im ba: “Ãindein naaj kajju jolal̦l̦o̦k Babil̦on, jikin eo el̦ap, im ejjel̦o̦k enaaj bar loe. 22 Im ejjel̦o̦k enaaj bar roñ jãn kwe ainikien ri-al ro im rej kõjañjañ kõn arp, ro rej kõjañjañ kõn flute, im ro rej kõjañjañ kõn jilel kab ri-kõjañjañ ro jet. Bareinwõt, ejjel̦o̦k enaaj bar lo ilo kwe ro rekapeel ilo jabdewõt kain jerbal, im ejjel̦o̦k enaaj bar roñ ainikien dekein irir* jãn kwe. 23 Ejjel̦o̦k bar meramin l̦aam̦ enaaj bar romaak ilo kwe, im ejjel̦o̦k enaaj bar roñ ainikien ro rej pojakin m̦are ilo kwe; bwe ri-wiakake ro am̦ rar armej ro el̦ap aer utiej ilo lal̦, im ikijjeen m̦antin kajjetõbtõb ko am̦, kar m̦on̦e ri-aelõñ otemjej. 24 Aet, ilo jikin in, kar lo bõtõktõkin ri-kanaan ro im ro rekkwõjarjar im ro otemjej kar m̦an er ioon lal̦.”