Matu

12 Juon iien, Jesus ear ilo̦k ibul̦õn jikin kallib in wiit ko ilo raanin Jabõt.* Innem ri-kal̦oor ro an rar kwõle im rar jino ittũm̦ leen wiit im m̦õñã. 2 Ke Parisi ro rar lo men in, rar ba ñane: “Lale m̦õk men n̦e ri-kal̦oor ran̦e am̦ rej kõm̦m̦ane, emo̦ kõm̦m̦ane ilo raanin Jabõt.” 3 Ak ear ba ñan er: “Ta kom̦ar jab riit kõn men eo Devid ear kõm̦m̦ane ke e im l̦õm̦aro doon rar kwõle ke? 4 Ear del̦o̦ñl̦o̦k ilo m̦weo im̦õn Anij im rar kañi bũreet in ajel̦o̦k* ko. Kom̦ar jab jel̦ã ke bwe emo̦ an kar Devid im l̦õm̦aro doon kañi men kein kõnke rej ñan bũrij ro wõt? 5 Kom̦ar jab bar riit ilo Kien eo ke bwe ilo raanin Jabõt otemjej, bũrij ro ilo tampel̦ eo rej jerbal bõtab ejjel̦o̦k rueer? 6 Ij ba ñan kom̦ bwe ewõr juon armej ijin im eaorõkl̦o̦k jãn tampel̦ en̦. 7 Bõtab ñe kom̦win kar jel̦ã mel̦el̦ein an jeje ko ba, ‘Em̦m̦anl̦o̦k tũriam̦o jãn katok,’ kom̦ ban kar liaakel̦o̦k ro ejjel̦o̦k rueer. 8 Nejin armej* ej Irooj in Jabõt.”

9 Ãlikin an ilo̦k jãn ijo, ear etal ñan im̦õn kabuñ eo aer. 10 Im juon em̦m̦aan emej rãjetin pein ear pãd ijo. Im Parisi ro rar kajjitõk ippãn Jesus im ba, “Emãlim ke ñan kõmour ri-nañinmej ilo raanin Jabõt?” Rar ba men in bwe ren kappok ruõn. 11 Im eba ñan er: “El̦aññe ewõr juon nejimi jiip im ewõtlo̦k ilowaan juon ro̦ñ ilo raanin Jabõt, ta ejjel̦o̦k iaami enaaj kar jibwe im lelõñtak ke? 12 Eaorõkl̦o̦k armej jãn jiip! Kõn men in, emãlim ñan kõm̦m̦ane juon men em̦m̦an ilo raanin Jabõt.” 13 Innem ear ba ñan em̦m̦aan eo: “Kwõn erl̦o̦ke peim̦.” Im ke ear erl̦o̦ke pein, pã eo ear oktak im bar em̦m̦an ãinwõt pã eo juon. 14 Ak Parisi ro rar jepl̦aak im pepe ippãn doon bwe ren m̦an Jesus. 15 Ke Jesus ear jel̦ã kõn men in, ear etal jãn ijo. Elõñ armej rar l̦oorel̦o̦k, im ear kõmour aolep ro rar nañinmej. 16 Bõtab, ear lukkuun jiroñ er bwe ren jab kõnnaanek ro jet kõn e, 17 kõnke en jejjet men eo ri-kanaan Aiseia ear kanaan kake, ke ear ba:

18 “Eñin eo karejera im iar kããlõte, eo ejitõnbõro ippa im ebuñbũruõ kake. Inaaj lel̦o̦k jetõb kwõjarjar* eo aõ ñane, im enaaj kwal̦o̦k ñan armej otemjej kõn wãween ekajet ilo jim̦we. 19 Eban akwããl im eban lam̦õj. Bareinwõt, ejjel̦o̦k en̦ enaaj roñ ainikien iturin ial̦leplep ko. 20 Eban ko̦kkure jabdewõt menin eddek ko* rokob, im eban kune jabdewõt l̦aam̦ me jidik wõt an urur. Eban kõm̦m̦ane men kein m̦ae iien enaaj ekajete ro renana. 21 Im ejjel̦o̦k pere bwe armej otemjej renaaj likũt aer kõjatdikdik ilo etan.”

22 Tokãlik, jet armej rar bõktok juon em̦m̦aan ñan ippãn Jesus me ejaje kõnnaan im ejjab lol̦o̦kjen̦ kõnke em̦õj an juon jetõb ettoon mo̦k* ilo ãnbwinnin.* Innem ear kõmour em̦m̦aan eo, im em̦m̦aan eo ear maroñ kõnnaan im lol̦o̦kjen̦. 23 Im jarin armej ro rar lukkuun bwilõñ im ba: “L̦eo Nejin Devid* in ke?” 24 Ke Parisi ro rar roñ men in, rar ba: “L̦ein ej kadiwõjl̦o̦k jetõb ko rettoon ikijjeen Beelzebub,* ri-tõl eo an jetõb ko rettoon.” 25 Jesus ear jel̦ã l̦õmn̦ak ko aer, innem ear ba ñan er: “Juon aelõñ enaaj jorrããn ñe armej ro ie rej jum̦aik doon. Im juon bukwõn ak baam̦le enaaj jorrããn ñe armej ro ie rej jum̦aik doon. 26 Ilo ejja wãween in wõt, ñe Setan ear kadiwõjl̦o̦k Setan, mel̦el̦ein ej jum̦aik e make, im enaaj jako an tõl. 27 Innem el̦aññe Beelzebub eo ear kõmaroñ eõ ñan kadiwõjl̦o̦k jetõb ko rettoon, wõn eo ear kõmaroñ ro nejimi bwe ren kadiwõjl̦o̦k jetõb ko rettoon? Eñin unin renaaj ekajete kom̦. 28 Ak ñe iar kadiwõjl̦o̦k jetõb ko rettoon kõn jetõb kwõjarjar* eo an Anij, innem mel̦el̦ein bwe Aelõñ eo an Anij* epãd ijin ak kom̦ij jab kile. 29 Ekõjkan an juon armej maroñ del̦o̦ñe m̦weo im̦õn juon em̦m̦aan ekajoor im bũki men ko ilowaan m̦weo? Ej aikuj m̦okta lukwõje em̦m̦aan eo ekajoor innem emaroñ ko̦o̦ti men ko ilowaan m̦weo. 30 Jabdewõt eo ejjab rejetake ña ej jum̦aik eõ, im jabdewõt eo ejjab jipañ eõ aintok armej ro ñan ippa, ej ubaakel̦o̦k armej ro jãn ña.

31 “Kõn men in, ij jiroñ kom̦ bwe Anij enaaj jol̦o̦k jerawiwi otemjej an armej. Bareinwõt, enaaj jol̦o̦k aer bõd jekdo̦o̦n ñe rej kõnono n̦ae men ko rekkwõjarjar. Bõtab, jabdewõt eo ej kõnono n̦ae jetõb kwõjarjar,* innem Anij ejjãmin jol̦o̦k an bõd. 32 Ñan waanjoñak, jabdewõt eo ej kõnono n̦ae Nejin armej, Anij enaaj jol̦o̦k an bõd. Bõtab, jabdewõt eo ej kõnono n̦ae jetõb kwõjarjar,* innem Anij ejjãmin jol̦o̦k an bõd. Eban jol̦o̦k an bõd ilo jukjukun pãd* in im ilo jukjukun pãd eo ej pedotok.

33 “El̦aññe kwõj kõjparok juon wõjke, enaaj em̦m̦an men ko leen, ak el̦aññe kwõjjab kõjparoke enaaj nana men ko leen. Men ko leen juon wõjke rej kaalikkar el̦aññe em̦m̦an wõjke eo ak jaab. 34 Kom̦ ro nejin jineik vaiper ko, ekõjkan ami maroñ kõnono kõn men ko rem̦m̦an ke kom̦ armej nana? Men ko juon armej ej ba rej itok jãn bũruon. 35 Juon armej em̦m̦an, ej kõnnaan kõn men ko rem̦m̦an kõnke em̦m̦an bũruon. Juon armej enana, ej kõnnaan kõn men ko renana kõnke enana bũruon. 36 Ij jiroñ kom̦ bwe ilo naaj Raanin Ekajet eo, armej ro renaaj aikuj uwaak kõn men ko renana rar kõnono kaki. 37 Naaj kõwãnõk eok ikijjeen naan ko am̦, im naaj liaakel̦o̦k eok ikijjeen naan ko am̦.”

38 Innem skraib im Parisi ro rar ba ñane: “Ri-Kaki, kõm kõn̦aan bwe kwõn kwal̦o̦k juon kõkal̦l̦e ñan kõm.” 39 Im eba ñan er: “Kom̦ij juon epepen enana im kom̦ij lejãn.* Kom̦ij jab bõjrak jãn ami kappok kõkal̦l̦e, bõtab ejjel̦o̦k kõkal̦l̦e enaaj wal̦o̦k ijello̦kun wõt menin kabwilõñlõñ* eo ear wal̦o̦k ñan ri-kanaan eo, Jona. 40 Bwe ãinwõt an kar Jona pãd ilowaan lo̦jien ek kileplep eo ium̦win jilu raan im jilu boñ, ãindein Nejin armej enaaj pãd ilo lõb ium̦win jilu raan im jilu boñ. 41 Ilo naaj iien ekajet en̦, armej in Nineva renaaj jerkak jãn mej ippãn armej in epepen in im liaakel̦o̦k er kõnke ri-Nineva ro rar ukel̦o̦k ke Jona ear kwal̦o̦k naan ñan er. Ak ij jiroñ kom̦ bwe ewõr juon eo eutiejl̦o̦k jãn Jona im ej pãd ijin. 42 Ilo naaj iien ekajet en̦, lerooj eo an ijoko iturõk enaaj jerkak jãn mej ippãn armej in epepen in im liaakel̦o̦k er kõnke ear itok jãn juon jikin ettol̦o̦k bwe en roñjake naan ko rekapeel an Solomon. Ak ij jiroñ kom̦ bwe ewõr juon eo eutiejl̦o̦k jãn Solomon im ej pãd ijin.

43 “Ñe juon jetõb ettoon ej diwõjl̦o̦k jãn juon armej, ej etal ñan ãne jem̦aden im kappok jikin an pãd. Bõtab ñe ejjab ellolo, 44 ej ba, ‘Inaaj bar ro̦o̦l ñan m̦weo im̦õ, ijo iar itok jãne.’ Innem ke ear tõparl̦o̦k m̦weo, ej lo bwe ejjel̦o̦k kobban bõtab erreo im eaiboojoj. 45 Innem ej etal im bõktok ippãntok jimjuon jetõb ettoon me el̦apl̦o̦k aer nana jãne, im rej mo̦k ilo ãnbwinnin armej eo im pãd ie. Innem ear nanal̦o̦k wõt an armej eo pãd jãn kar m̦okta. Enaaj ãindein armej ro renana ilo epepen in.”

46 Im ke Jesus ej kõnnaan wõt ñan jarlepju eo, jinen im l̦õm̦aro jatin rar jãdetok. Rar jutak inabõj kõnke rej pukote bwe ren kõnnaan ippãn. 47 Innem juon iaan armej ro eba ñane: “Jinõm̦ im l̦õm̦aro jatũm̦ ran̦ rekõn̦aan kõnnaan ippam̦, erran̦ rej jutak inabõj.” 48 Im ear uwaake armej eo ear kõnnaanl̦o̦k ñane im ba: “Wõn eo jinõ, im wõn ro jatũ?” 49 Im ear jitõñl̦o̦k ri-kal̦oor ro an im ba: “Errein ej ro jinõ im ro jatũ! 50 Jabdewõt eo ej kõm̦anm̦an ankilaan Jema, eo ej pãd ilañ, armej in ej jinõ im jeiũ kab jatũ.”