Matu
16 Innem Parisi ro im Saddusi ro rar itok ñan ippãn im mãlejjoñe. Rar kajjitõk ippãn bwe en kwal̦o̦k ñan er juon kõkal̦l̦e ilo etan Anij. 2 Im eba ñan er: “Ñe ejota kom̦ij ba, ‘Enaaj em̦m̦an lañ ilju kõnke ebũrõrõ lañ.’ 3 Bõtab ñe ejibboñ kom̦ij ba, ‘Enaaj nana lañ im wõt rainin kõnke ebũrõrõ lañ im ejino ekkõdo̦do.’ Kom̦ jel̦ã kilen kõmel̦el̦e kõn kõkal̦l̦en men ko rej wal̦o̦k ilañ, ak kom̦ij jab mel̦el̦e kõn kõkal̦l̦en men ko ilo raan kein. 4 Kom̦ij juon epepen enana im kom̦ij lejãn.* Kom̦ij jab bõjrak jãn ami kappok kõkal̦l̦e, bõtab ejjel̦o̦k kõkal̦l̦e enaaj wal̦o̦k ijello̦kun wõt menin kabwilõñlõñ* eo ear wal̦o̦k ñan Jona.” Ãlikin an ba men kein, ear ilo̦k jãn er.
5 Ilo tõre in, ri-kal̦oor ro rar jerak ñan iturãjetin lom̦al̦o eo ak rar mel̦o̦kl̦o̦k in ebbõk pilawã. 6 Im Jesus eba ñan er: “Kom̦win kõjparok kom̦ jãn iij in kauwe kan̦ an Parisi im Saddusi ran̦.” 7 Kõn men in, ri-kal̦oor ro rar kõnnaan ñan doon im ba: “Jekar jab ebbõktok pilawã.” 8 Ke Jesus ear roñ aer kõnnaan, ear ba: “Etke kom̦ij kõnnaan kõn an ejjel̦o̦k pilawã ippemi? Edik wõt ami tõmak. 9 Ta kom̦ij jañin mel̦el̦e kõn men eo ij kajjioñ in ba ke? Kom̦ij jab keememej aõ kar naajidiki 5,000 em̦m̦aan kõn 5 wõt wũdin pilawã ke, im kõn oran iep ko kom̦ar kanni kõn bween pilawã ko? 10 Ak kom̦ij jab keememej aõ kar naajidiki 4,000 em̦m̦aan kõn 7 wõt wũdin pilawã ke, im oran iep killep ko kom̦ar kanni kõn bween pilawã ko? 11 Iar jab kõnnaan kõn pilawã. Etke kom̦ij jab mel̦el̦e men in? Ij ba kom̦win kõjparok kom̦ jãn iij in kauwe kan̦ an Parisi ran̦ im Saddusi ran̦.” 12 Innem rej kab mel̦el̦e bwe ear jab kõnnaan kõn iij in kauwe pilawã. Mel̦el̦e eo an ej bwe ren kõjparok er jãn katak ko an Parisi ro im Saddusi ro.
13 Ke Jesus ear tõparl̦o̦k bukwõn ko ilo Seseria Pilippai, ear kajjitõk ippãn ri-kal̦oor ro an im ba: “Ekkar ñan ro jet, wõn eo rej ba bwe ej Nejin armej?”* 14 Rar uwaak im ba: “Jet rej ba Jon ri-Peptaij, bar jet rej ba Ilaija, im ro jet rej ba Jeremaia ñe ejjab juon iaan ri-kanaan ro.” 15 Im eba ñan er: “Ak baj kom̦, wõn ña ilo ami l̦õmn̦ak?” 16 Saimõn Piter ear uwaak im ba: “Kwe Christ, Nejin Anij eo emour.” 17 Im Jesus ear ba: “Saimõn nejin Jona, kwõlukkuun jeraam̦m̦an kõnke armej* rar jab kwal̦o̦k men in ñan kwe. Ak Jema, eo ej pãd ilañ, ear kwal̦o̦ke ñan eok. 18 Bareinwõt, ij jiroñ eok: Kwe Piter, inaaj kajutak eklejia eo aõ ioon juon dekã ekilep, im kõjãmin Lõb* eban kajoorl̦o̦k jãne.* 19 Inaaj liwaj ki ko an Aelõñin lañ.* Jabdewõt men eo kwõj kõmo̦iki ijin ioon lal̦, enaaj m̦õj kadede kõmo̦iki ilañ. Im jabdewõt men eo kwõj kamãlimi ijin ioon lal̦, enaaj m̦õj kadede kamãlimi ilañ.” 20 Innem ear lukkuun jiroñ ri-kal̦oor ro bwe ren jab ba ñan jabdewõt armej bwe e Christ.
21 Jãn iien eo m̦aanl̦o̦k, Jesus ear jino kõmel̦el̦eik ri-kal̦oor ro an bwe ej aikuj etal ñan Jerusalem, im bwe bũrij ro reutiej, skraib ro, im ri-tõl ro an ri-Ju renaaj kanooj kaeñtaane. Bareinwõt, armej renaaj m̦ane ñan mej, bõtab ilo raan en̦ kein kajilu enaaj bar mour. 22 Kõn men in, Piter ear bõke im kõjenolo̦ke jãn er im kajjioñ kajim̦weiki ke ear ba: “Irooj, kwõn jab kõnnaan rot n̦e. Men kein reban wal̦o̦k ñan kwe.” 23 Bõtab ear oktakl̦o̦k jãn Piter im ba ñane: “Kwõn ilo̦k jãn ña Setan! Kwõj kapañ eõ kõnke l̦õmn̦ak kan̦e am̦ rej an armej im jab an Anij.”
24 Im Jesus ear ba ñan ri-kal̦oor ro an im ba: “Jabdewõt eo ekõn̦aan l̦oor eõ, en kaarmejjeteik e make im ineek al̦al̦ in eñtaan* eo an, im en jab bõjrak jãn an l̦oor eõ. 25 Jabdewõt eo ekõn̦aan kõjparoke mour eo an, enaaj mej. Bõtab, jabdewõt eo enaaj mej kõn wõt ña, enaaj bar mour. 26 Ewõr ke tokjãn ñe juon armej ej bõk aolep men ko ilo lal̦ in bwe ren an ak emej jãni? Im ta eo juon armej enaaj kõm̦m̦ane bwe en maroñ mour wõt? 27 Ilo raan ko rej pãd im̦aan, Nejin armej enaaj itok kõn aiboojoj eo an Jemãn ippãn enjel̦ ro an, im enaaj n̦aon̦ããn kajjojo armej ekkar ñan kõm̦m̦an ko aer. 28 Ij ba ñan kom̦ bwe jet iaan ro rej jutak ijin reban mej m̦ae iien renaaj m̦okta lo an Nejin armej itok ilo Aelõñ eo an.”*