Jerbal

10 Ekar wõr juon em̦m̦aan ilo Seseria etan Korniliõs, juon kapen* in jarin tarin̦ae ilo kumi* eo an ri-Itali. 2 Em̦m̦aan in ej juon eo etiljek im e im armej ro ilo m̦weo im̦õn rar aolep mijak Anij, im ear lel̦o̦k elõñ m̦weien tũriam̦o ñan armej ro im aolep iien ear jar im akwel̦ap ñan Anij. 3 Ke ear 3 awa jim̦a* ãlikin raelep, ear lo juon iaan enjel̦ ro an Anij ilo juon pijen, im ear itok ñan ippãn im ba: “Korniliõs!” 4 Korniliõs ear kalimjeke im lukkuun lõl̦ño̦ñ, im ear kajjitõk im ba: “Irooj, ewõr ta?” Im ear ba ñane: “Jar ko am̦ im m̦weien tũriam̦o ko am̦ rar wanlõñl̦o̦k ñan ippãn Anij im ej keememej men kein. 5 Kõn men in, kwõn ijjilõkl̦o̦k em̦m̦aan ñan Joppa bwe ren bõktok juon em̦m̦aan etan Saimõn, eo rej ãñinñini im ba Piter. 6 Em̦m̦aan in ear lol̦o̦k Saimõn im ej jokwe ippãn kiiõ. M̦ween̦ im̦õn Saimõn ej pãd iturin lo̦jet im ej juon eo ej kõjerbal kilin menninmour ñan kõm̦m̦an elõñ men.” 7 Ãlikin wõt an kar enjel̦ eo ba men in, ear ilo̦k. Innem Korniliõs ear kũrtok ruo iaan ri-karejar ro an im juon rũttarin̦ae etiljek jãn ibwiljin ri-jerbal ro an, 8 im ear kwal̦o̦k men otemjej ñan er im jilkinl̦o̦k er ñan Joppa.

9 Raan eo tok juon ke rej etal wõt ilo ial̦ eo aer l̦o̦k im epaakel̦o̦k jikin eo, Piter ear wanlõñl̦o̦k ñan raan m̦weo ke ej 12 awa jim̦a* ilo raelep bwe en jar. 10 Bõtab ear uwetok an lukkuun kwõle im ear kõn̦aan m̦õñã. Ke rej kõpooj m̦õñã ko, ear lo juon pijen. 11 Ear lo an lañ pel̦l̦o̦k im juon men ãinwõt jiit* kileplep kar jibwe kona ko emãn ie im ej wanlal̦tak ñan lal̦ in, 12 im aolep kain menninmour ko emãn neer, im menninmour ko rej tõbalbal, im bao in mejatoto ko rej pãd ioon. 13 Innem juon ainikien ear ba ñane: “Piter, kwõn jutak im m̦an menninmour kan̦e im kañi!” 14 Bõtab Piter ear ba: “Irooj, ijjãmin, kõnke ijjañin kar m̦õñã jabdewõt men emo̦ kañe im ettoon.” 15 Im ainikien eo ear bar kõnnaan ñane alen eo kein karuo im ba: “Kwõn bõjrak jãn am̦ ba bwe ettoon men ko em̦õj an Anij karreoiki.” 16 Ainikien eo ear bar wal̦o̦k alen eo kein kajilu, im ilo m̦õkaj, kar bõklõñl̦o̦k men eo Piter ear loe.

17 Ke Piter ej l̦o̦kjenaan wõt kõn mel̦el̦ein pijen eo ear loe, em̦m̦aan ro Korniliõs ear jilkintok er rar kajjitõk epãd ia m̦weo im̦õn Saimõn. Innem rar ilo̦k im jutak inabõjin wõrwõr eo, 18 im rar ikkũrl̦o̦k im lale epãd ke Saimõn ilo m̦weo, eo rej ãñinñini im ba Piter. 19 Ke Piter ej kõl̦mãnl̦o̦kjen̦ wõt kõn pijen eo, jetõb kwõjarjar* ear ba ñane: “Roñjake m̦õk! Jilu en̦ em̦m̦aan rej kappukot eok. 20 Kõn men in, kwõn jutak im wanlal̦l̦o̦k im etal ippãerl̦o̦k, im kwõn jab pere ñan jidik kõnke ña eo iar jilkintok er.” 21 Innem Piter ear wanlal̦l̦o̦k ñan ippãn em̦m̦aan ro im ba: “Ña eo kom̦ij pukote, ewõr ta?” 22 Im reba: “Korniliõs ear jilkintok kõm, e ej juon kapen in jarin tarin̦ae, im ej juon eo ewãnõk im ej mijak Anij im ekanooj em̦m̦an etan ippãn aolep ri-Ju ro. Anij ear jilkinl̦o̦k juon enjel̦ eokkwõjarjar ñane im jiroñe bwe en kũrl̦o̦k eok ñan m̦ween̦ im̦õn bwe en roñjake ta ko kwõnaaj ba.” 23 Innem Piter ear kadel̦o̦ñ er im rar pãd ippãn ãinwõt an ri-lol̦o̦k.

Raan eo juon, ear jerkak im ilo̦k ippãerl̦o̦k, im jet iaan em̦m̦aan ro jein im jatin ilo tõmak jãn Joppa rar etal ippãnl̦o̦k. 24 Innem raan eo tok juon ke rar tõparl̦o̦k Seseria, Korniliõs ear kõttar er im em̦õj an kũrtok ro nukũn im ro jeran. 25 Ke Piter ear del̦o̦ñl̦o̦k, Korniliõs ear wõnm̦aiki im buñpedo iturin neen im kwal̦o̦k kautiej ñane. 26 Bõtab Piter ear kajutake im ba: “Kwõn jutak bwe ña bar juon armej.” 27 Piter ear kõnono ippãn ilo aer del̦o̦ñl̦o̦k ilo m̦weo, im ear lo bwe elõñ armej rar kobatok. 28 Innem ear ba ñan er: “Kom̦ kanooj jel̦ã bwe emo̦ an juon ri-Ju kobal̦o̦k ak kepaake bar juon armej in juon aelõñ, bõtab em̦õj an Anij kwal̦o̦k ñan ña bwe in jab watõk jabdewõt armej bwe ettoon. 29 Eñin unin iar jab m̦akoko in itok ke kom̦ar ijjilõktok ñan eõ bwe in itok. Innem kiiõ ikõn̦aan jel̦ã unin ami kar kajjitõk bwe in itok.”

30 Innem Korniliõs ear ba: “Emãn raan emootl̦o̦k ilo ejja awa in wõt, 3 awa jim̦a* ãlikin raelep, iar jar ilo m̦wiin im̦õ im ilo jidimkij juon em̦m̦aan ebbõl nuknuk eo an ej jutak im̦aõ 31 im ba: ‘Korniliõs, Anij ear roñjake jar eo am̦ im ear keememej m̦weien tũriam̦o ko am̦. 32 Kõn men in, kwõn ijjilõkl̦o̦k ñan Joppa im bõktok Saimõn, eo rej ãñinñini im ba Piter. Em̦m̦aan in ear lol̦o̦k Saimõn im ej jokwe ippãn ilo m̦weo im̦õn. M̦ween̦ im̦õn Saimõn ej pãd iturin lo̦jet im ej juon eo ej kõjerbal kilin menninmour ñan kõm̦m̦an elõñ men.’ 33 Innem iar m̦õkaj im ijjilõkwaj armej ñan ippam̦, im kom̦m̦ool kõn am̦ kar itok. Kõmar aolep kobatok ijin im̦aan mejãn Anij bwe kõmin roñjake aolep men ko Jeova* ear jiroñ eok bwe kwõn ba.”

34 Innem Piter ear jino kõnono im ba: “Kiiõ ij kab lukkuun mel̦el̦e bwe Anij ejjab kalijekl̦o̦k, 35 bõtab ilo aelõñ otemjej, ej buñbũruon kake jabdewõt eo ej mijake* im kõm̦m̦ani men ko rejim̦we. 36 Ear ijjilõkl̦o̦k ennaan ñan ro nejin Israel bwe en kwal̦o̦k ñan er ennaan eo em̦m̦an kõn aenõm̦m̦an ikijjeen Jesus Christ, eo ej Irooj ñan armej otemjej. 37 Kom̦ jel̦ã ta eo kar kõnnaan kake ilo aolepen Judia, jino jãn kar Galili ãlikin an kar Jon kwal̦o̦k kõn peptaij. 38 Men in ej kõn Jesus, eo ej itok jãn Nazeret, im kõn an kar Anij kapiti* kõn jetõb kwõjarjar* im kajoor, im ear itoitak ilo aolepen ãneo im kõm̦m̦ani men ko rem̦m̦an im kõmour aolep armej ro Tepil̦ ear kaeñtaan er. Ear maroñ kõm̦m̦ani men kein kõnke Anij ear pãd ippãn. 39 Kõmij ri-kam̦ool kõn aolep men ko ear kõm̦m̦ani ilo ijoko jikin ri-Ju ro im ilo Jerusalem. Bõtab armej rein rar m̦ane ilo aer kar totoiki ilo juon jurõn al̦al̦.* 40 Anij ear kõmouri ilo raan eo kein kajilu im kõtl̦o̦k an armej loe, 41 ijoke ejjab ñan aolep armej, bõtab ñan kõm, ri-kam̦ool ro me Anij ear jitõñ er m̦oktal̦o̦k, kõm ro kõmar m̦õñã im idaak ippãn ãlikin an kar jerkak jãn mej. 42 Bareinwõt, ear jiroñ kõm bwe kõmin kwal̦o̦k naan ñan armej ro im lukkuun kam̦ool ñan er bwe eñin armej eo Anij ear jitõñe bwe en ri-ekajet ñan ro remour im ñan ro remej. 43 Aolep ri-kanaan ro rar kwal̦o̦k bwe aolep ro rej likũt aer tõmak ilo e, naaj jol̦o̦k jerawiwi ko aer ikijjeen ãt eo etan.”

44 Piter ej kõnono wõt kõn men kein ak jetõb kwõjarjar* ear itok ioon aolep ro rej roñjake ennaan eo. 45 Innem rũttõmak ro* em̦õj aer m̦wijm̦wij me rar itok ippãn Piter rar kanooj bwilõñ, kõnke jetõb kwõjarjar,* menin letok eo ejjel̦o̦k on̦ããn, ear bareinwõt itok ioon armej in aelõñ ko. 46 Rar roñ aer kõnono ilo kajin ko jet* im wũjtake Anij. Innem Piter ear ba: 47 “Armej rein rar bõk jetõb kwõjarjar* ãinwõt kõj, innem wõn ej ba bwe rejjab maroñ peptaij ilo dãn?” 48 Kõn men in, ear jiroñ er bwe ren peptaij ilo etan Jesus Christ. Innem rar kajjitõk bwe en pãd ippãer ium̦win jejjo raan.