Taitõs
2 Bõtab kwe, kwõn wõnm̦aanl̦o̦k wõt im kõnono kõn men ko rej ekkejell̦o̦k ippãn katak ko rejim̦we.* 2 Em̦m̦aan ro rerũtto rej aikuj jet ro rejel̦ã kõm̦m̦an joñan ilo men otemjej, jet ro rerũtto ilo l̦õmn̦ak, relol̦o̦kjen̦, rãjmour ilo tõmak, ilo yokwe, im rejel̦ã kijenmej. 3 Ãindein bareinwõt kõrã ro rerũtto, ej aikuj kwõjarjar m̦wilier, ren jab ri-ruruwe, ri-kõm̦akoko ñan el̦ap wain, ak rej aikuj ri-katakin kõn men eo em̦m̦an 4 bwe ren maroñ rõjañ* jiroñ ro ñan yokwe l̦õm̦aro pãleer, yokwe ajri ro nejier, 5 im bwe ren lol̦o̦kjen̦, dãpij wõt aer erreo, jerbal ilo m̦õko m̦weer,* em̦m̦an kõm̦m̦an ko aer, im ren kõttãiki er ñan l̦õm̦aro pãleer kõnke en ejjel̦o̦k en̦ ej kõnono n̦ae naanin Anij.
6 Ãindein, en jab bõjrak am̦ kakapilõk likao ro bwe ren lol̦o̦kjen̦, 7 ilo am̦ likũt juon joñak em̦m̦an kõn jerbal ko rem̦m̦an ilo men otemjej. Kwõn lukkuun kate eok ilo am̦ katakin ro jet kõn men eo erreo,* 8 kõjerbal naan ko rejim̦we* im reban letok lo̦ñiin armej, bwe ro rej jum̦ae ren jook kõnke ejjel̦o̦k men en̦ enana* remaroñ ba n̦ae kõj. 9 Ro ri-kõm̦akoko ren kõttãik er ilo men otemjej ñan karo ro aer, ren kabuñbũrueer, jab ukok aer naan, 10 im jab ko̦o̦t jãn er, ak ren kaalikkar bwe rej jet ro remaroñ lukkuun lõke er, kõnke ren bõktok nõbar ilo jabdewõt wãween ñan katak ko an Anij, eo ej ad ri-Lo̦mo̦o̦r.
11 Jouj eo el̦ap an Anij em̦õj an lukkuun alikkar, im ej bõktok lo̦mo̦o̦r ñan jabdewõt armej. 12 Ej katakin kõj ñan bõbraiki kõj jãn men ko renana im kõn̦aan ko an lal̦ in, im bwe jen mour ilo lol̦o̦kjen̦, wãnõk, im bwe jen tiljek wõt ñan Anij ibwiljin jukjukun pãd* in, 13 ke jej kõttare kõjatdikdik eo ekam̦õn̦õn̦õ im an naaj wal̦o̦k aiboojoj eo an Anij l̦apl̦ap, im Jesus Christ ad ri-Lo̦mo̦o̦r, 14 eo ear lel̦o̦k e make kõn kõj ñan kanemkwõj kõj* jãn jabdewõt nana im ñan karreoik kõj armej bwe jen an m̦weiuk eaorõk, im bwe jen kijejeto ilo jerbal ko rem̦m̦an.
15 Wõnm̦aanl̦o̦k wõt im kwal̦o̦k kõn men kein im rõjañ* im kauweik ro jet ekkar ñan maroñ eo kar lewaj ñan kwe. Jab kõtl̦o̦k bwe jabdewõt en reilal̦waj ñan kwe.