2 Korint
8 Ro jeim im jatim, kõm kõn̦aan bwe kom̦win jel̦ã kõn an kar Anij kwal̦o̦k jouj eo an el̦ap ñan eklejia ko ilo Masedonia. 2 Meñe rar pãd ilo eñtaan kõn mãlejjoñ ko rel̦l̦ap im rar lukkuun jeram̦õl, bõtab ear l̦ap aer lañlõñ im el̦ap aer kar letok peier im jipañ. 3 Rar kõm̦m̦ane men in ekkar ñan joñan aer maroñ. Ilo m̦ool, ear el̦l̦ã jãn joñan maroñ eo aer, im imaroñ kam̦oole men in. 4 Rar make em̦m̦akũt im akwel̦ap ñan kõm bwe ren bõk jeraam̦m̦an eo ñan jipañ ro jet, kõnke rekõn̦aan bõk kun̦aaer ilo jerbal eo ñan jipañl̦o̦k ro rekkwõjarjar me rej pãd ilo aikuj. 5 Men in rar kõm̦m̦ane el̦apl̦o̦k jãn joñan eo kõmar kõtmãne kake, kõnke m̦okta rar lukkuun kõmaat joñan aer maroñ ñan Irooj im ñan kõm ikijjeen ankilaan Anij. 6 Kõn men in, kõmar rõjañ Taitõs bwe en kadedeikl̦o̦k jerbal in ear jinoe ibwiljimi, jerbalin aini men ko kom̦ij m̦õn̦õn̦õ in lel̦o̦k. 7 Kõn men in, ãinwõt ami obrak ilo men otemjej, ilo tõmak im ilo naan im ilo jel̦ãl̦o̦kjen̦ im ilo kijejeto im bareinwõt kõn yokwe eo am ñan kom̦, kom̦win bar lukkuun kate kom̦ ilo ami m̦õn̦õn̦õ in lel̦o̦k.*
8 Ijjab ba men in ñan kakien kom̦, ijoke ij ba kõnke ikõn̦aan bwe kom̦win jel̦ã kõn an ro jet kate er ñan jipañ, im bareinwõt ñan lale ewi joñan an m̦ool yokwe eo ami. 9 Kom̦ jel̦ã kõn jouj eo el̦ap an ad Irooj Jesus Christ, bwe meñe ekar m̦weiie, bõtab ear erom juon eo ejeram̦õl kõn wõt kom̦, kõnke ikijjeen an jeram̦õl, kom̦win maroñ erom ro rem̦weiie.
10 Eñin l̦õmn̦ak eo aõ ilo men in: Kom̦ naaj bõk tokjãn jãn ami kõm̦m̦ane men in kõnke kom̦ar jab baj jinoe wõt jerbal in juon iiõ emootl̦o̦k, bõtab kom̦ar bar kwal̦o̦k ami kõn̦aan kõm̦m̦ane. 11 Kõn men in, kom̦win kiiõ kadedel̦o̦k men eo kom̦ kar jino kõm̦m̦ane bwe en tõprak kõn̦aan in ami ñan jipañ ro jet kõn men ko ewõr ippemi. 12 El̦aññe juon armej ej kõn̦aan jipañ, elukkuun em̦m̦an men in ippãn Anij ñe armej in ej lel̦o̦k jãn men ko ewõr ippãn, im jab kõn men ko ejjel̦o̦k ippãn. 13 Ijjab kõn̦aan kõm̦m̦an bwe en pidodo ñan ro jet ak en pen ñan kom̦. 14 Bõtab, joñan dam̦ol̦o̦k in men eo ewõr ippemi emaroñ jipañ er kõn aikuj ko aer, innem dam̦ol̦o̦k in men eo ewõr ippãer emaroñ jipañ kom̦ kõn aikuj ko ami. Ilo wãween in, en wõr jokkun wõt juon. 15 Enaaj jejjet men eo kar je: “Eo el̦ap an ae, ejjab kanooj in lõñ an, im eo edik an ae, ejjab kanooj in dik an.”
16 Kõmij kam̦m̦oolol Anij bwe el̦ap an Taitõs kea kõn kom̦ ãinwõt bar kõm, 17 kõnke men ko kõmar ba ñane rar kõm̦akũt bũruon, im kõn an lukkuun m̦õn̦õn̦õ in jipañ, ear make pepe bwe en iwõj ñan ippemi. 18 Bõtab kõmij jilkinwaj Taitõs ippãn eo jeid im jatid me el̦ap an aolep eklejia ko nõbare kõn an kwal̦o̦k kõn ennaan eo em̦m̦an. 19 Ejjab men in wõt ak eklejia ko rar kããlõte bwe en itoitak ippem ilo ammim ajeji menin lel̦o̦k kein me rej bõktok aiboojoj ñan Irooj, im men in ej kam̦ool bwe kõm m̦õn̦õn̦õ in jipañ. 20 Kõmij kanooj kõjparok bwe ejjel̦o̦k juon en n̦otaik kõm kõn wãween ammim ajeji menin lel̦o̦k kein ami rel̦l̦ap. 21 Unin ej kõnke kõmij ‘kate kõm bwe kõmin m̦ool ilo aolep men ko kõmij kõm̦m̦ani, ejjab im̦aan mejãn Jeova* wõt, ak bar im̦aan mejãn armej.’
22 Bareinwõt, kõmij jilkinwaj eo jeid im jatid ippãerro waj im em̦õj ammim etale im kile bwe etiljek ilo elõñ wãween, ijoke kiiõ enaaj l̦apl̦o̦k wõt an tiljek kõn wõt an lukkuun lõke kom̦. 23 Bõtab el̦aññe ewõr jabdewõt kajjitõk kõn Taitõs, eokwe e ej m̦õtta im ej jerbal ippa ñan em̦m̦an eo ami. Ak el̦aññe ewõr kajjitõk kõn em̦m̦aan ro jet jeid im jatid, er rej rijjilõk an eklejia ko im rej bõktok aiboojoj ñan Christ. 24 Kõn men in, kom̦win kaalikkar ñan er bwe kom̦ij yokwe er, im kwal̦o̦k ñan eklejia ko unin ammim kõmjãje kõn kom̦.