Mark

12 Innem ear jino an kwal̦o̦k waanjoñak ko ñan er ke ear ba: “Juon em̦m̦aan ear kõm̦m̦ane juon an jikin kallib kũreep, im ear wõrwõre jikin kallib in an im kõm̦m̦ane juon jikin kõm̦m̦an wain.* Bareinwõt, ear kalõk juon im̦õn waj eutiej. Innem ear lel̦o̦k bwe jet ri-kallib ren kõjerbale * im ear etal ñan bar juon aelõñ. 2 Ke ear jejjet iien m̦adm̦õd, em̦m̦aan eo ear jilkinl̦o̦k juon iaan ri-karejar * ro an ñan ippãn ri-kallib ro bwe en bõktok kõj eo an jãn ippãer ilo jikin kallib kũreep eo. 3 Bõtab ri-kallib ro rar jibwe ri-karejar eo an im m̦ane, im rar jilkinl̦o̦ke ak rar jab lel̦o̦k jabdewõt men ñane. 4 Em̦m̦aan eo ear bar jilkinl̦o̦k juon ri-karejar, ak ri-kallib ro rar no bõran ri-karejar eo im rar kõm̦m̦an bwe en jook. 5 Innem ear bar jilkinl̦o̦k juon, bõtab ri-kallib ro rar m̦ane im emej. Ebar lõñ ro ear jilkinl̦o̦k er tokãlik, im rar m̦ane jet ak ro jet rar m̦ane er ñan mej. 6 Kiiõ kar m̦õttan wõt juon armej ippãn, l̦eo nejin ejitõnbõro. Ear jilkinl̦o̦ke ak ej ba, ‘Renaaj kautieje l̦e nejũ.’ 7 Bõtab ri-kallib ro rar ba ñan doon im ba, ‘Eñin armej eo enaaj jolõte jikin kallib in. Jen m̦ane im enaaj ad jikin kallib in.’ 8 Innem rar jibwe im m̦ane ñan mej im iperl̦o̦k jãn jikin kallib kũreep eo. 9 Kiiõ ta eo em̦m̦aan eo an jikin kallib kũreep eo enaaj kõm̦m̦ane? Enaaj itok im m̦an ri-kallib ro im lel̦o̦k jikin kallib kũreep eo ñan ro jet. 10 Ta kom̦ar jab riiti eoon in ke? Eo ej ba: ‘Dekã eo rũkkal ro rar kõjekdo̦o̦ne em̦õj an oktak im erom dekã eo eaorõktata. 11 Dekã in ear itok jãn Jeova* im ekanooj aiboojoj ippãd.’”

12 Ãlikin an ba men in, bũrij ro reutiej im skraib ro rar pukot kilen aer jibwe* kõn aer jel̦ã bwe ear waanjoñak kõn er. Ijoke kõn aer mijak armej ro, rar etal jãn ippãn im ilo̦k jãn ijo.

13 Tokãlik, jet iaan Parisi ro im armej ro doon Herod rar itok ñan ippãn Jesus bwe ren pukot kilen aer maroñ kõm̦m̦an bwe en bõd an kõmel̦el̦e. 14 Ke rar tõpare, rar ba: “Ri-Kaki, kõm jel̦ã bwe kwe juon eo em̦ool. Kwõjjab kappok nõbar jãn jabdewõt kõnke kwõjjab lale paotokin armej, bõtab kwõj katakin armej ro m̦ool eo kõn Anij. Ak kiiõ, kwõl̦ak lale emãlim ke* bwe jen kõl̦l̦ã eowõj ñan Sizar? * 15 Jej aikuj kõl̦l̦ã ke, ak jaab?” Jesus ear kile aer etao, im ear ba ñan er: “Etke kom̦ij mãlejjoñe eõ? Letok juon denariõs* bwe in lale.” 16 Innem rar lel̦o̦k juon denariõs* ñane, im ear ba ñan er: “Pijain wõn in ej wal̦o̦k ilo jããn in im etan wõn in ie?” Rar uwaak im ba: “Sizar.” 17 Innem Jesus ear ba: “Eokwe, kom̦win lel̦o̦k ñan Sizar men ko an Sizar, im lel̦o̦k ñan Anij men ko an Anij.” Im rar kanooj bwilõñ kõn e.

18 Innem Saddusi* ro ak ro rej ba bwe ejjel̦o̦k jerkakpeje, rar itok ñan ippãn im ba: 19 “Ri-Kaki, Moses ear je im ba bwe ñe juon em̦m̦aan emej jãn lio pãleen ak ejjel̦o̦k nejierro, l̦eo jatin* ej aikuj m̦areiki kõrã eo kõnke en l̦ak wõr nejierro, en tarrin nejin l̦eo ekar mej. 20 Ewõr jimjuon em̦m̦aan rej jemjati. L̦eo erũtto ear bõk juon pãleen, bõtab tokãlik ear mej ak ejjel̦o̦k nejin. 21 L̦eo kein karuo ear m̦areiki kõrã eo, bõtab ebar mej ak ejjel̦o̦k nejin. Ear bar wal̦o̦k ejja men in wõt ñan l̦eo kein kajilu. 22 Aolep jemjati ro jimjuon rar mej ak ejjel̦o̦k nejier. Ãliktata, kõrã eo ear mej. 23 Ak kiiõ, ilo iien jerkakpeje en̦, wõn iaan em̦m̦aan rein jimjuon enaaj pãleek lio ke aolepeer rar m̦areiki?” 24 Jesus ear ba ñan er: “Ejjab ke eñin unin ami lukkuun bõd kõnke kom̦ jaje kõn Jeje ko im kõn kajoor eo an Anij? 25 Ñe ro remej renaaj bar mour, ejjel̦o̦k em̦m̦aan im kõrã renaaj m̦are kõnke renaaj ãinwõt enjel̦ ran̦ ilañ. 26 Ta kom̦ij jañin riiti men eo Moses ear je kõn an Anij kar kõnono ñane jãn wõjke eo eurur ke? Anij ear kõnono kõn ro remej me renaaj bar mour ke ear ba: ‘Ña ij Anij eo an Ebream, Aisak, im Jekob.’ 27 Alikkar bwe ej Anij an ro remour im jab an ro remej. Kõn men in, kom̦ lukkuun bõd.”

28 Juon iaan skraib ro me ear itok im roñjake aer kõnnaan ear kile an jejjet wãween an Jesus uwaak er. Kõn men in, ear kajjitõk ippãn im ba: “Kien ta eo m̦oktata* iaan aolep kien ko?” 29 Jesus ear uwaak im ba: “Kien eo m̦oktata in, ‘Kom̦ ri-Israel kom̦win roñjake, Jeova* ej ad Anij, im Jeova* ej juon wõt. 30 Kwõn yokwe Jeova* am̦ Anij kõn aolepen bũruom̦, im kõn aolepen am̦ mour, im kõn aolepen am̦ l̦õmn̦ak, im kõn aolepen am̦ kajoor.’ 31 Kien eo kein karuo ej eñin, ‘Kwõn yokwe ri-turum̦* ãinwõt am̦ yokwe eok make.’ Ejjel̦o̦k bar juon kien eaorõkl̦o̦k jãn kien kein.” 32 Im skraib eo ear ba ñane: “Ri-Kaki, men kein kwõj ba rem̦ool. ‘Juon wõt Anij im ejjel̦o̦k bar juon ijello̦kun.’ 33 Juon ej aikuj yokwe Anij kõn aolepen bũruon, kõn aolepen an l̦õmn̦ak, im kõn aolepen an kajoor, im ej aikuj yokwe ro ri-turin ãinwõt an yokwe e make. Men kein el̦apl̦o̦k aer aorõk jãn aolep menin katok.”* 34 Jesus ear lo bwe elukkuun em̦m̦an an l̦ein kõmel̦el̦e, im ear ba ñane: “Kwõjjab ettol̦o̦k jãn Aelõñ eo an Anij.”* Ejjel̦o̦k juon ear peran in bar kwal̦o̦k kajjitõk ko ñan Jesus.

35 Innem ke Jesus ear wõnm̦aanl̦o̦k wõt im katakin armej ro ilo tampel̦ eo, ear kajjitõk im ba: “Innem etke skraib ran̦ rej ba bwe Christ ej nejin Devid? 36 Jetõb kwõjarjar * ear kõm̦akũt Devid bwe en ba, ‘Jeova* ear ba ñan aõ Irooj: “Kwõn jijet ituanbwijmaroñin peiũ m̦ae iien inaaj likũt ro rej kõjdate eok bwe ren pãd ium̦win neem̦.”’ 37 Ewi wãween an maroñ nejin Devid el̦aññe Devid make ear ãñinñini im ba Irooj?”

Jarlepju in armej ro rar m̦õn̦õn̦õ in roñjake. 38 Ke ej katakin er, ear bar ba: “Kom̦win kõjparok kom̦ jãn skraib ran̦. Ñe rej itoitak rej kõn̦ak kopã ko raetok, im rekõn̦aan bwe armej ren yokyokwe er ilo jikin wia ko. 39 Bareinwõt, rekõn̦aan bwe ren jijet ilo jea ko im̦aantata* ilo im̦õn kabuñ ko, im ilo jikin ko rem̦m̦antata ilo iien kõjota ko. 40 Rej bũki men ko m̦weien kõrã ro emej l̦õm̦aro pãleer,* im rej kaetok aer jar ñan kõmje mejãn armej. Enaaj l̦apl̦o̦k an armej rein bõk kaje jãn ro jet.”

41 Innem ear jijet ilo juon jikin ej reilo̦k im lo jikin jaba ko im lale wãween an armej ro likũt jaba ko aer. Ear lo an elõñ ri-m̦weiie jaba kõn elõñ jããn. 42 Bõtab juon kõrã ejeram̦õl im emej l̦eo pãleen ear itok im jaba kõn ruo jããn jiddik.* 43 Kõn men in, ear kũrtok ri-kal̦oor ro an, im ear ba: “Ij ba ñan kom̦ bwe el̦apl̦o̦k joñan eo kõrã in ejeram̦õl im emej l̦eo pãleen ear likũti ilo jikin jaba jãn armej ro jet. 44 Armej rein rar jaba kõn bween jããn ko aer. Bõtab kõrã in, meñe ejeram̦õl ak ear jaba kõn aolepen jããn ko an, men ko en kar mour kaki.”